Ngerang a Rengedel a Dios?

“Me tial evangkelio ra rengedel a Dios . . . ”​—MATTEUS 24:14.

NGAR SEL merael a chisel el Cheldechedechal a Jesus er a Rois, e ngmilluluuch el mo er a Dios el uldekiar tia el ongtil el kmo: “A rengedem le mei.” A rebetok el miliol el chad a kmal ungil el medengelii tia el nglunguuch e dirrek el blechoel el omelekl er ngii. A ta el encyclopedia a mesaod er tia el bades el kmo “ngkmal klou a ultutelel el nglunguuch el ousbech er ngii a rokui el Kristiano.” Me nguaisei, engdi a ruumesingd er tir a kmal diak lodengei el kmo ngngerang a Renged me a lechub e ngngera ngmo meruul er ngii sel lemei.​—Matteus 6:9, 10.

E tiang a kmal diak el mechas a rengud er ngii el tekoi. A remengeteklel a Klsuul Klekristiano a olsisechakl er a rechad er a belkul a Renged el ousbech a tekoi el di ketouch, e cheleuid, e dirrek el kmal meringel a omesodel. A ta el chad a meluches er a belkul a Rengedel a Dios el kmo “ngkmal klou el ongasireng el tekoi, . . . el di sebechel el meketmokl el okiu a dingar el Dios . . . , el ngii a di ta el tekoi el sebechel a sechal me a redil el mo metik er a osobel el obengkel a Dios.” A kuk ta er a chad a oleiuid er a cheldecheduch el kirel a Renged el kmo “ngulekrael me a omellach el kirel a ikelesia.” E sel Katekismo er a Ikelesia er a Katolik a mesaod er ngii el kmo: “A rengedel a Dios a llemalt me a budech me a deurreng el ngar er a chelsel a Chedaol Reng.”

Ngsebechem el metik er a lmuut el bleketakl el omesodel el ngar er a 2 el llel tia el babier. Ngellechukl el kmo: “A Rengedel a Dios, el ngii a mera el kabelment el ngar er a eanged, a di kmedung el mo olekngemed a rokui el chelebirukel e meltii a beluulechad el mo paradis.” Ka me bo desa el kmo ngmekerang a Biblia a lolisiich er tia el tekoi.

Tirke el Mo Mengedereder er a Beluulechad er a Ngar Medad el Klebesei

A renged a kabelment el longedereder er ngii a king. Me a King er a Rengedel a Dios a ngike el mla mekiis er a kodall el Jesus Kristus. Me sel omengederederel el ngar er a eanged a obeketakl er a ues el lilsang a profet el Daniel me ngmilluches el kmo: “Ngikel kilsa er a ues er a klebesei a ua ngelekel a chad [el Jesus]. Ng mirrael el me kmeed, el mle iliuekl er a eabed, e mlor ngikel mle ngar er a irechar el mei [el Jehovah el Dios] e mlocholt er ngii. Me ngmlar isei e ngiluu a klisiich, ma omengull, ma klisichel omerreder, el kirel me losiou er ngii a re chad er a bek el beluu, ma re bek el bedengir a re chad, ma kakerous el omelekoi. E a klisichel a medechel el mo cherechar, e a rengedel me ng diak a ulebengelel.”​—Daniel 7:13, 14.

Ngdirrek el ngar er a chelsel a Biblia er a babier er a Daniel e ngochotii el kmo a Renged a bo leteketekii a Dios, e ngii el Renged a mo okngemed aike el rokui el kabelment er a klechad, e ngii a mo medechel el mo cherechar. Ngar er a 2 el bliongel er tia el babier e ngmesaod er a berrusel a  king er a Babilon, el ulemerrous er a klou el bleob el chaus, el ngii a omtechei er a cherrengelel a rokui el klisiich er a beluulechad. A profet el Daniel a milsaod er a belkul tia el berrous el kirel “a ikel mo duubech er a ngar a medad” el kmo: “A Dios el ngar a eanged a mo toketekii a rengedel el mo diak a ulebengelel. Misel renged a diak a sebechel el mo mesisiich er ngii, e ng bai mo okngemed a ikel bebil er a renged el rokui e sola e ngii a mo medechel el mo cherechar.”​—Daniel 2:28, 44.

Me ngike el King er a Rengedel a Dios a diak di el ngii el tang a mengedereder. Ngar sel taem er a omesiungel a Jesus er a dirk lengar tia el chutem, e ngmillekoi er a reblak a rengrir el apostol er ngii el kmo te mo obengkel ngii me a relmuut el bebil el mengedereder, el belkul a kmo te mo nguu a okiis e mo er a eanged e dirrek el mo dengchokl er a ngarbab el kingellir. (Lukas 22:26-​30) A mera el belkul a tekingel a Jesus a diak lolutk el kirel a mera el kingall, ngbai belkul a kmo a Rengedel a mo ngar er a eanged el diak el ngar tia el chutem. Me a Biblia a mesaod el kirir tirke el mo mengedereder el obengkel a Jesus el kmo te mla “ra chelsel a bek el kebliil rar chad, ma chomelekoi, ma bliongel rar chad, ma renged.” E tirkang a “mo rengedel a king e priist el kirel a Dios er kemam, me te mo mengedereder ra belulechad.”​—Chocholt 5:9, 10.

A Uchul Me Ngkmal Ungil a Chais el Kirel a Renged

Ngsebeched el kora mtebengii el kmo a Jesus a mlukngerachel el mo mengedereder er a “bek el kebliil rar chad, ma chomelekoi, ma bliongel rar chad” me tirke el mo obengkel a mo obengkel el “mengedereder ra belulechad.” Me a ker a kmo, me te rua techang a mo chederedall er cheungel tia el Renged? Ngtirke el rokui el mo kongei er tia el ungil el chais el oberekang er a beluulechad er chelecha el taem. E tirke el mo chederedall er a Renged a uldimukl er tirke el mo mekiis el mo nguu a klengar el ngar tia el chutem e mo oba omelatk el sebechir el mo kiei el diak a ulebengelel.

A Biblia a kmal bleketakl el smodii a klengeltengat el rechad a mo ngmai er cheungel tia el Renged. Aikakid a di bebil er ngii el klengeltengat:

“Ng merrob a mekemad er a beluulchad el rokir; ng mengam a balech e melemall a biskang, e melul omekreakl er a ngau!”​—Psalm 46:9.

“A re chad a mo toketek a blai e mo kiei er ngii; el diak le ngodech el chad a mo ousbech. Te mo dualem a sers er a bilong, e mo dmeu a rengrir er a bilong; ng diak le kuk ngodech el chad a mo melim.”​—Isaia 65:21, 22.

“A Dios a mo mesuld a bek el iuosech ra mederir, e mo diak a kodall, ma klengiterreng ma langel ma ringel me ngmo diak, ele ngmla nguemed a ikel dimla ngarngii.”​—Chocholt 21:3, 4.

“A re meiko a mo sebechir el omes, ma re mechad a mo orrenges. A re chitechut a mo melechesokl e meloik, me tirkel bengong a mo oldiu er a deurreng.”​—Isaia 35:5, 6.

“A sikang a mei el bo lorrenges ra ngerel a Jesus tirikel rokui el ngara debull, me te tuobed, mar merruul a ungil a mekiis el mo nguu a klengar.”​—Johanes 5:28, 29.

“Ngdi tirkel medemedemek a mo ungilbesrir el kiei el ngar a beluu el ungil a rengrir er a cherrungel budech.”​—Psalm 37:11.

Tiang a mera el klou el ungil el chais! Me a lmuut el tang, aika el rokui el ulaoch er a Biblia el di toutang er chelechang a kmal klou el olechotel a kmo ngkmal di kmedung e tia el Rengedel a Dios a mo mengedereder er a beluulechad el rokir.