San na a Kownukondre fu Gado?

„A bun nyunsu disi fu a kownukondre . . .”​—MATEYUS 24:14.

NA INI a Bergitaki fu Yesus di furu sma sabi, a leri sma fa fu begi. Na ini a begi dati sma e aksi Gado: „Meki yu kownukondre kon.” Furu sma sabi a begi disi na ede èn den taki en furu tron. Soleki fa wan buku e taki, dan a de „a moro prenspari begi di ala Kresten e gebroiki na ini na anbegi fu den”. Ma furu sma di e taki a begi disi, no sabi san na a Kownukondre, noso san a o du te a kon.​—Mateyus 6:9, 10.

A sani dati no musu fruwondru wi. Te a abi fu du nanga a Kownukondre, dan fesiman fu Krestenhèit e leri sma difrenti sani di muilek fu frustan èn di e bruya sma. Wan fu den skrifi taki Gado Kownukondre „abi fu du nanga a krakti fu Gado, . . . èn a e meki sma firi taki den abi wan matifasi nanga a libilibi Gado . . . . A de wan sani di sma e ondrofeni nanga Gado èn di e meki mansma nanga umasma kisi frulusu.” Wan tra sma e taki dati na evangelie fu a Kownukondre e sori „san kerki musu leri”. Wan buku e taki: „A kownukondre fu Gado na retidu nanga vrede nanga prisiri na ini a Santa Yeye” (Catechism of the Catholic Church).

Na tapu bladzijde 2 fu a tijdschrift disi yu kan feni wan moro krin piki te a abi fu du nanga a tori disi. Drape skrifi „taki heri esi Gado Kownukondre di de wan trutru tirimakti na hemel, sa tyari wan kaba kon na ala ogridu èn taki a sa kenki grontapu kon tron wan paradijs”. Meki wi go luku fa Bijbel e horibaka gi a tori dati.

Den sma di o tiri heri grontapu

Wan kownukondre na wan tirimakti di abi wan kownu leki tiriman. A Kownu fu Gado Kownukondre na Yesus Krestes di kisi wan opobaka. A profeiti Danièl ben kisi wan fisyun di e sori taki Yesus Krestes kisi kownumakti na ini hemel. Danièl ben skrifi: „Na ini den fisyun di mi kisi na neti mi si wan sma e kon na tapu den wolku. A ben gersi libisma pikin [Yesus]. Ne a kisi primisi fu go na a ’sma di de sensi owruten’ [Yehovah Gado], iya, den tyari en go te na fesi a sma disi. A gi en a makti fu tiri èn a gi en glori sosrefi. A gi en wan kownukondre tu, so taki ala den pipel, nanga den sma di de fu den difrenti kondre èn di e taki difrenti tongo, ben kan dini en. A tirimakti fu en o tan fu têgo. Noiti a o kon na wan kaba. A kownukondre fu en na wan kownukondre di no sa kisi pori.”​—Danièl 7:13, 14.

A Bijbel buku Danièl e sori tu taki Gado ben o seti a Kownukondre steifi, taki a Kownukondre o tyari wan kaba kon na ala libisma tirimakti èn taki noiti a o kisi pori. Kapitel 2 e  taki fu wan dren di Gado gi a kownu fu Babilon pe a ben si wan bigi popki, di ben prenki den grontapu tirimakti di ben o tiri baka makandra. A profeiti Danièl ben fruteri san a dren dati wani taki. „Na den lasti dei”, na so Danièl ben skrifi, dan „a Gado fu hemel o seti wan kownukondre di noiti no o kisi pori. A kownukondre srefi no o gi na nowan tra pipel. A o broko ala den kownukondre disi pisipisi èn a o tyari wan kaba kon na den. A kownukondre srefi o tan fu têgo.”​—Danièl 2:28, 44.

A Kownu fu Gado Kownukondre no e tiri en wawan. Na a ten di Yesus ben du en diniwroko na grontapu, a ben gi den apostel fu en di ben tan gi yesi na en, a dyaranti taki den èn sosrefi trawan ben o kisi wan opobaka na hemel pe den ben o sidon na tapu kownusturu (Lukas 22:28-30). Yesus no ben taki fu trutru kownusturu fu di a ben sori taki a Kownukondre ben o de na hemel. Bijbel e taki dati den sma disi di o tiri makandra nanga Yesus e komoto fu „ibri lo, tongo, pipel, nanga kondre”. Boiti dati, den ben o de ’wan kownukondre èn den o tron priester gi wi Gado èn den o tiri grontapu leki kownu’.​—Openbaring 5:9, 10.

Fu san ede a nyunsu fu a Kownukondre na bun nyunsu?

Luku taki Krestes Yesus kisi makti fu tiri ala „den pipel, nanga den sma di de fu den difrenti kondre èn di e taki difrenti tongo”. Boiti dati, trawan de di o „tiri grontapu leki kownu” makandra nanga en. Ma suma o de den borgu fu a Kownukondre disi? Na den sma di e gi yesi na a bun nyunsu di e preiki na ini a ten disi. Den sma di o kisi wan opobaka fu libi na grontapu o de borgu tu èn den o abi a howpu fu libi fu têgo.

Bijbel e taki krin fu den blesi di den borgu o kisi na ondro a tiri fu a Kownukondre. Luku wan tu fu den blesi disi:

„Na ala sei fu grontapu a e meki feti kon na wan kaba. Den bo a e broko na tu èn den lansri a e koti pisipisi. Den fetiwagi a e bron na ini faya.”​—Psalm 46:9.

„Den o bow oso èn den srefi o tan na ini. Den o prani droifidyari èn den srefi o nyan fu en. Den no o bow oso, dan wan tra sma go tan na ini. Den no o prani sani, dan wan tra sma nyan fu dati.”​—Yesaya 65:21, 22.

„[Gado] o figi ala watra puru na den ai, èn dede no sa de moro; nowan sari, noso krei, noso pen no sa de moro. Den fositen sani pasa gowe.”​—Openbaring 21:3, 4.

„Na a ten dati den ai fu den breniwan o si, èn den yesi fu den dofuwan o yere. Na a ten dati lansma o kren leki dia na tapu den bergi. A tongo fu den babaw-wan o bari fu prisiri.”​—Yesaya 35:5, 6.

„A yuru o kon te ala den sma di de na ini den grebi o yere [Yesus] en sten, èn den o komopo drape; den sma di du bun sani, o opo baka fu kisi libi.”​—Yohanes 5:28, 29.

„Den safri-ati sma o kisi grontapu èn den o prisiri srefisrefi, fu di vrede o de pasa marki.”​—Psalm 37:11.

Disi na trutru bun nyunsu! Boiti dati, Bijbel profeititori di kon tru e sori taki heri esi a Kownukondre o tiri heri grontapu na wan reti fasi.