¿Tuku kilhchanima xTamapakgsin Dios?

«Xatlan tamakatsinin xla tapakgsin.» (MATEO 24:14)

KTAKGALHCHUWIN xalak Sipi, nema lu lakgapaskan Jesús kamasinilh xtamakgalhtawakgen oración nema wanikan padrenuestro, nema lhuwa millones latamanin katsinikgo chu tlawakgo. Maktum libro wan pi «uma oración [...] wa tlakg xlakaskinka akxilhkgo kstalaninanin Cristo». Uma tuku skinikgo Dios: «Kamilh milimapakgsin». Pero, lhuwa tiku tlawakgo uma oración ni katsikgo tuku kilhchanima Tamapakgsin chu tuku natlawa akxni namin (Mateo 6:9, 10).

Chuna kaʼakgspula, xlakata tiku pulalinkgo takanajla ni liwana kamasiyanikgo chu tuwa akgatekgskan chu nilakxtum tuku masiyakgo. La uma, chatum pulalina masiya pi xTamapakgsin Dios «kaj akgtum litliwakga, [...] nema makgkatsiyaw kkimpulaknikan chu tlawa pi tlan natalalinaw kiMalakatsukinakan [...], akxni tekgskan Dios nema tlawa pi latamanin nalakgtaxtukgo». Achatum wan pi xatlan tamakatsin, wa «tuku masiya Sikulan». Chu Enciclopedia Católica wan: «Tamapakgsin xla Dios wamputun [...] namapakgsinan Dios kkinakujkan».

Pero anta kpágina 2 xla uma revista wan pi: «Wa xTamapakgsin Dios —akgtum xaxlikana tamapakgsin nema wi kʼakgapun— nialh makgas namasputu tiku lixkajni xtayat chu natlawa pi Katiyatni akgtum paraíso nawan». Uma tuku tawan nituwa akgatekgskan, chu anta takilhtinit kBiblia. Kaʼakxilhwi tuku xlakata chuna wanaw.

Tiku namapakgsinankgo Katiyatni

Akgtum tamapakgsin wi xmapakgsina, ¿tiku namapakgsinan kxTamapakgsin Dios? Biblia wan pi Jesucristo, tiku malakastakwanika chu taspitpa kʼakgapun. Palakachuwina Daniel maʼakxilhnika la xʼama la akxni mapakgsina xtlawaka Jesús. Daniel tsokgli: «Chuntiya xakʼakxilha tuku xaklimanaxnama ¡chu kakxilhti!, kpuklhni xmima chatum la xkgawasa chixku [Jesús] na kakxilhli Kgolotsin [Jehová Dios] malakatsuwinika. Chu maxkika tamapakgsin, chu lilanka chu pumapakgsin, xlakata kachikinin, pulaklhuwa kachikinin chu tanu tanu tachuwin putum naskujnikgo. Wa xtamapakgsin akgtum tamapakgsin nema nikxni katisputli ni katititaxtulh, xtamapakgsin nikxni katimalakgsputuka» (Daniel 7:13, 14).

Libro xla Daniel na lichuwinan Tamapakgsin, wan pi Dios nawili kʼakgapun chu nakamalakgsputu mapakgsinanin xala katiyatni chu wan pi nikxni katimalakgsputuka. Chuna lichuwinan capítulo 2, anta tatsokgnit akxni mapakgsina xalak Babilonia limanixnalh akgtum imagen, nema xkilhchanima laklanka tamapakgsin  xalak kakilhtamaku nema xʼamakgolh tawilakgo. Daniel wanilh tuku xʼama la «kxaʼawatiya kilhtamaku»: «Dios xalak akgapun nawiliy akgtum tamapakgsin nema nikxni katisputli. Chu tama tamapakgsin ni katimatitaxtinika atanu kachikin. Nakalakxpulay chu nakamasputuy putum tamapakgsin chu tama tamapakgsin xliputum kilhtamaku natawilay» (Daniel 2:28, 44).

Chuna, xMapakgsina xTamapakgsin Dios wi tiku natamapakgsinankgo. Akxni Jesús xlama Katiyatni, kawanilh xʼapóstoles tiku ni xmakgxtakgkgo pi xʼamaka kamalakastakwanikan chu xtawilakgolh kxpumapakgsinkan kʼakgapun (Lucas 22:28-30). Akxni Jesús wa pi xtawilakgolh, xkilhchanima pi anta kʼakgapun namapakgsinankgoyacha. Biblia wan pi amakgapitsin kstalaninanin na xʼamakgolh tamapakgsinankgo. Chuna la wan Apocalipsis (Revelación) 5:9, 10, wantiku xʼamakgolh tamapakgsinankgo Jesús lhuwa «ntipalit tachuwin [...], nkani kawa xalanin» chu “namapakgsinankgoy kkatiyatni” chu chuna la wan Biblia Traducción del Nuevo Mundo «xsacerdotes Dios nawankgo».

Xatlan tamakatsin xla Tamapakgsin: masta takgalhkgalhin

Chuna la akxilhwi, Biblia wan pi Jesús nakamapakgsi putum «ntipalit tachuwin [...], nkani kawa xalanin». Na wan pi tiku natamapakgsinankgo “namapakgsinankgo kkatiyatni”. Pero ¿tiku umakgolh kaniwa xalanin tiku nalatamakgo kKatiyatni chu natapakgsinikgo xtamapakgsin Dios? Wantiku nakgalhakgaxmatkgo xatlan tamakatsin nema talichuwinama la uku. Chu tiku nakamalakastakwanikan nema nalatamakgo kKatiyatni na wa natapakgsinikgo. Putum nakamaxkikan talakaskin nalaksakkgo xliputum kilhtamaku nalatamakgo.

Lhuwa textos xalak Biblia liwana lichuwinankgo tuku natlawa xTamapakgsin Dios. Makgapitsi wa umakgolh:

«[Dios] masputu guerra kxlitilanka katiyatni. Laktukxa arco chu xlikana laktsu laktsu tlawa lanza; chu kalhkuyu carro xla guerra.» (Salmo 46:9, NM.)

«Natlawakgo chiki chu anta natawilakgo; chu nachankgo uvas chu nawakgo xtawakat. Ni atanu tiku natawila kchiki nema natlawakgo; ni katichananankgolh chu atanu tiku nawakgo.» (Isaías 65:21, 22.)

«Na paks naxakanikgo Dios xlakgpixtajatkan; na nialh katiʼanalh linin; chu na nialh katiʼanalh ntalipuwan, ni mpala wa ntatasa, chu na ni mpala wa ntakatsanajwat; xampi wa xlipaks nkatuwaj, wa ntu xʼanan xakgasiyaj, paks lakgsputli.» (Apocalipsis 21:3, 4.)

«Tama kilhtamaku xlakgastapukan lakgaxokgo nalakawanamparakgo, chu xtakgen tiku akgatapa nakgaxmatpara. Tama kilhtamaku tiku nila tlawan natlawan la tlawan juki, chu ksimakgat kgokgo lipaxuw nachuwinan.» (Isaías 35:5, 6.)

«Namin nkilhtamaku akxni xlipaks nti aknukgoy [o kaʼakgtapukanit], nakgaxmatkgoy xtachuwin [Jesús], natakxtupalakgoy. Wanti ntlan ntu ntlawakgolh nalakastakwanankgoy, naʼankgoy klatamat.» (Juan 5:28, 29.)

«Pero ti laktlan [...], ixlakan nawan ama lilakgatit pulataman, xlakan ana snun lipaxaw natalatamaj.» (Salmo 37:11.)

Xlikana, tamakatsin xlakata Tamapakgsin masta takgalhkgalhin. Chu tuku tlakg tlan, la uku kgantaxtumaja tuku lichuwinanit Biblia pi xʼama la, nema litasiya pi nialh makgas tsankga xlakata xTamapakgsin namapakgsinan kKatiyatni.