I Yini Mfumo Wa Xikwembu?

“Mahungu lamanene lawa ya mfumo . . . ”—MATEWU 24:14.

EDYONDZWENI yakwe leyi dumeke ya le Ntshaveni, Yesu u endle xikhongelo xa xikombiso lexi nga ni xikombelo lexi yaka eka Xikwembu lexi nge: “Mfumo wa wena a wu te.” Vanhu va timiliyoni va nhlokohate xikhongelo xexo naswona va xi phindha-phindha ko tala. Encyclopedia yin’wana yi vula leswaku i “xikhongelo lexi tirhisiwaka hi Vakreste hinkwavo loko va gandzela.” Kambe vanhu vo tala lava xi tirhisaka a va swi tivi leswaku i yini Mfumo nileswaku wu ta endla yini loko wu ta.—Matewu 6:9, 10.

Sweswo a swi hlamarisi. Varhangeri va vukhongeri va nyikela tinhlamuselo leti pfilunganyaka ta leswi Mfumo wu nga swona. Un’wana u vule leswaku Mfumo wa Xikwembu i “nchumu lowu nga tolovelekangiki, . . . lowu nga eka Xikwembu lexi hanyaka . . . , lexi ponisaka vanhu.” Un’wana u vule leswaku Mfumo i “swiletelo swa kereke.” Nakambe Catechism of the Catholic Church yi ri: “Mfumo wa Xikwembu i vululami, ku rhula ni ntsako lowu tisiwaka hi Moya lowo Kwetsima.”

Nhlamuselo leyi kongomeke u nga yi kuma eka tluka 2 ra magazini lowu. Yi hlayeka hi ndlela leyi: “Mfumo wa Xikwembu lowu nga hulumendhe ya xiviri ya le tilweni, ku nga ri khale wu ta herisa vuhomboloki hinkwabyo kutani wu hundzula misava yi va paradeyisi.” A hi voneni ndlela leyi Bibele yi yi seketelaka ha yona mhaka leyi.

Vafumi Va Misava Va Nkarhi Lowu Taka

Mfumo i hulumendhe leyi fumiwaka hi hosi. Hosi ya Mfumo wa Xikwembu i Yesu Kreste la pfuxiweke. Ku vekiwa kakwe exiluvelweni etilweni ku hlamuseriwe exivonweni lexi kombiweke muprofeta Daniyele, la nga te: “Ndzi ya emahlweni ndzi languta eswivonweni swa nivusiku, kutani waswivo, lahaya mapapeni ya le matilweni a ku ri ni loyi a fanaka ni n’wana wa munhu [Yesu] a ri karhi a ta; kutani a nghena eka Nkulukumba wa Masiku [Yehovha Xikwembu], a tshinetiwa swinene emahlweni ka Yena. Kutani a nyikiwa ku fuma ni xindzhuti ni mfumo, leswaku vanhu, vanhu va matiko ni tindzimi hinkwato va n’wi tirhela. Ku fuma ka yena i ku fuma loku tshamaka hilaha ku nga heriki loku ku nga ta ka ku nga hundzi, mfumo wakwe a wu nge lovisiwi.”—Daniyele 7:13, 14.

Buku ya Bibele ya Daniyele yi tlhela yi kombisa leswaku Mfumo wolowo wu ta simekiwa hi Xikwembu, wu ta herisa tihulumendhe hinkwato ta vanhu naswona a wu nge lovisiwi. Ndzima 2 yi hlamusela norho lowu huhuteriweke lowu hosi ya Babilona yi veke na wona, lowu eka wona yi voneke xifaniso lexikulu lexi  kombisaka ku fuma ka tihosi ta misava hi ku landzelelana ka tona. Loko muprofeta Daniyele a hlamusela norho wolowo u te: “Emasikwini ya tihosi teto Xikwembu xa le tilweni xi ta veka mfumo lowu wu nga ta ka wu nga lovisiwi. Mfumo lowu wu nga ka wu nga hundziseriwi eka vanhu van’wana. Wu ta pfotlosa kutani wu herisa mimfumo leyi hinkwayo, kambe wona wu ta tshama hilaha ku nga riki na makumu.”—Daniyele 2:28, 44.

Hosi ya Mfumo wa Xikwembu a yi fumi yi ri yoxe. Hi nkarhi wa vutirheli byakwe bya laha misaveni, Yesu u tiyisekise vaapostola vakwe vo tshembeka leswaku vona swin’we ni van’wana va ta pfuxeriwa etilweni naswona va ta tshama eswiluvelweni. (Luka 22:28-30) Yesu a a nga vulavuli hi swiluvelo swa xiviri hikuva u vule leswaku Mfumo wu ta va etilweni. Bibele yi vula leswaku vafumi-kulobye volavo va huma eka “tinyimba hinkwato ni tindzimi hinkwato ni vanhu hinkwavo ni matiko hinkwawo.” Va ta va “mfumo ni vaprista eka Xikwembu xa hina, va ta va tihosi emisaveni.”—Nhlavutelo 5:9, 10.

Lexi Endlaka Leswaku Mahungu Ya Mfumo Ma Va Lamanene

Xiya leswaku Kreste Yesu u nyikiwe vulawuri eka “vanhu [hinkwavo], vanhu va matiko ni tindzimi hinkwato” naswona lava fumaka na yena “va ta va tihosi emisaveni.” I vamani lava nga ta fumiwa hi Mfumo lowu? Hi lava amukelaka mahungu lamanene lama chumayeriwaka namuntlha. Vanhu volavo va ta katsa ni lava nga ta pfuxeriwa ku kuma vutomi laha misaveni naswona va ta va ni ntshembo wo hanya hilaha ku nga heriki.

Bibele yi tlhela yi hlamusela mikateko leyi vanhu va nga ta tiphina ha yona ehansi ka Mfumo wolowo. Hi leyi yin’wana ya yona:

“U herisa tinyimpi ku ya fika emakumu ya misava. Vurha u byi tshova hi le xikarhi naswona u tshovelela fumu; tigolonyi u ti hisa endzilweni.”—Pisalema 46:9.

“Kunene va ta aka tindlu va tshama eka tona; kunene va ta rima masimu ya vhinya va dya mihandzu ya wona. A va nge aki kutani ku tshama un’wana; a va nge rimi kutani ku dya un’wana.”—Esaya 65:21, 22.

“[Xikwembu] xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.”—Nhlavutelo 21:3, 4.

“Hi nkarhi wolowo mahlo ya lava nga voniki ma ta pfuriwa, ni tindleve ta lava nga twiki ti ta pfuriwa. Hi nkarhi wolowo la khutaka u ta tlula kukota mhunti, ni ririmi ra la nga vulavuriki ri ta huwelela hi ku tsaka.”—Esaya 35:5, 6.

“Nkarhi wa ta lowu hinkwavo lava nga eka masirha-bako ya xitsundzuxo va nga ta twa rito ra yena [Yesu] kutani va huma, lava endleke swilo leswinene va pfukela evuton’wini.”—Yohane 5:28, 29.

“Lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.”—Pisalema 37:11.

Hakunene lawa i mahungu lamanene! Ku engetela kwalaho, vuprofeta bya Bibele lebyi hetisekeke byi kombisa leswaku ku nga ri khale Mfumo wu ta endla leswaku ku va ni vululami emisaveni hinkwayo.