Mang fare Gil’ilungun Got?

“Re thin nib fel’ n’ey ni murung’agen gil’ilungun Got . . . ”—MATTHEW 24:14, NW.

NAP’AN fare welthin rok Jesus u daken e Burey, me fil fare meybil ni yima yog e Chitamangimad ngay ni bay bang riy ni be yog ni gaar: “Ma ga par ni gur e ga be gagiyegnagmad.” Bokum milyon e girdi’ ni ke mit e re meybil ney ngorad ma yad ma sul u daken. Reb e encyclopedia e be yog ni ireray e meybil ni “ri ma fanay urngin e Kristiano ko liyor ni yad ma tay.” Machane, boor e piin ni ma un i yog e re meybil ney e gathi ri yad manang ko mang fare Gil’ilungun, fa mang e ra rin’ u nap’an nra yib.—Matthew 6:9, 10.

Dab ni gin ko re n’ey. Pi tayugang’ ko Kristiano ni googsur e yad ma weliy murung’agen fare Gil’ilungun nib mo’maw’ ni ngan nang fan. Reb e pumoon e ke yoloy ni fare Gil’ilungun e “yib rok Got, . . . maku re n’ey e bay rogon ko pigpig ku Got . . . , ni ma tay e girdi’ ni fan e ngar thapgad ngak.” Ma reb e babyor e be yog ni fare thin nib fel’ ni murung’agen Gil’ilungun Got e aram e “thin ni bay rogon ko Galesiya.”

Ga ra pirieg boch e thin nib tamilang u murung’agen Gil’ilungun Got u lan e re ke babyor ney ko page 2, ni be yog ni gaar: “Gil’ilungun Got, e riyul’ ni bay u tharmiy, ndab ki n’uw nap’an me chuweg urngin e kireb me thilyeg e fayleng nge mang ba paradis.” Ngad guyed ko uw rogon nib puluw e thin nu Bible ko re thin ney.

Piin nra Gagiyegnag e Fayleng Boch Nga M’on

Fare Gil’ilungun e aram reb e am ni bay reb e pilung ni be gagiyegnag. Fare Pilung ko Gil’ilungun Got e aram Jesus Kristus ni kan faseg ko yam’. Kan weliy murung’agen e gagiyeg rok u tharmiy u nap’an ni kan piliyeg e changar rok Daniel ni profet, me yoloy ni gaar: “Nap’an ni gu be guy e pi n’ey u malik’ay rog ni nep’, mu gguy be’ ni bod yaan ba girdi’ [Jesus], ni ke yib e manileng i ing, ma be chugur i yib min fek i yan ngak faanem ni kab kakrom [Jehovah Got] i yib ni immoy. Min pi’ mat’awun ko gagiyeg ni nge tay ma ngan tay fan, ma nge par ni ir e pilung, ya girdi’ u urngin e pi nam, nge pi racha’, nge pi thin e nguur folgad rok. Ma mat’awun ko gagiyeg ni nge tay e bay i par ndariy n’umngin nap’an, ma gagiyeg rok e dabi mus.”—Daniel 7:13, 14.

Maku be dag ko fare babyor rok Daniel ni Got e ra sunumeg Gil’ilungun ma ra chuweg urngin e am ko girdi’ ma ra par ni dariy n’umngin nap’an. Guruy ni 2 e be weliy murung’agen fare lik’ay ko fare pilung nu Babylon ni ke guy ba liyos ni be yip’ fan e pi am nu fayleng  nra gagiyeg ma nap’an nra m’ay reb me sum reb. Ke weliy Daniel fan e pi lik’ay nem. Ki yoloy Daniel ni ke yog Got ngak e n’en ni bay i m’ug ni aram e “bayi sunumeg Got nu tharmiy reb e gagiyeg ndariy e rofen nra mus. Ma binem e gagiyeg e dariy be’ nra gel ngay biid, machane bayi thirif u but’ urngin e pi pilung nem nge gagiyeg ni yad be tay me mang fa birok e gagiyeg e i par ndariy n’umngin nap’an.”—Daniel 2:28, 44.

Fare Pilung ko Gil’ilungun Got e gathi yigoo ir e ra gagiyeg. Nap’an e machib ni tay Jesus u fayleng, me micheg ngak e pi apostal rok nge boch e girdi’ ni yira fasegrad ko yam’ mi yad ra yan nga tharmiy ngar pared nga tagil’ e pilung. (Luke 22:28-30) De weliy Jesus murung’agen tagil’ e pilung nrayog ni ngan guy, ya ke yog ni fare Gil’ilungun e bay u tharmiy. Be weliy e Bible ni piin nra un ngak Jesus ko gagiyeg e kar bad u “urngin e ganong, nge thin, nge gubin mit e girdi’, nge nam.” “Bay ra manged pi prist rok Got nge Kristus, ma bay ra uned ngak ko gagiyeg u lan bbiyu’ e duw.”—Revelation 20:6.

Fan nib Fel’ fare Thin u Murung’agen Gil’ilungun Got

Mu tay fanam i yan riy ni Jesus Kristus e kan dugliy ni nge gagiyegnag e “girdi’ u urngin e pi nam, nge pi racha’, nge pi thin” ma piin ni yad ra un ngak ko gagiyeg e yad ra mang “prist rok Got nge Kristus.” Ere mini’ e ra par u tan e re Gil’ilungun ney? Piin ni yad ra fol ko fare thin nib fel’ ni yibe machibnag e ngiyal’ ney. Ma kub muun ngay e piin ni yira fasegrad ko yam’, ma bay e athap rorad ni ngar pared u fayleng ni manemus.

Rib tamilang ni be yog e Bible murung’agen e pi tow’ath ni yira pi’ ngak e girdi’ u tan Gil’ilungun Got. Baaray boch e pi thin nem ni be weliy e Bible murung’agen:

“Be taleg e pi mahl ni yibe tay u fayleng i yan; be t’ar e gat’ing, ma be kirebnag e sarey, ma be urfiy e pi talin e cham!”—Psalm 46:9.

“Girdi’ e bay ra toyed e naun mi yad par u lan, ma gathi yugu be’ e bay yib i par ngay. Bay ra yunged e woldug ni grapes me fel’ rogorad u logowen, ma gathi yugu boch e girdi’ e bay ur unumed.”—Isaiah 65:21, 22.

“Ma bayi n’ag [Got] urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.”—Revelation 21:3, 4.

“Pi malmit e bay ra guyed ban’en ma piin ni biling e bay rrung’aged ban’en. Piin ni mugutgut e bay ra oggad nga lang nguur churu’gad, ma piin ndabiyog ni ngar nonod e bay ur tolulniged e felfelan’.”—Isaiah 35:5, 6.

“Ba’ ba ngiyal’ ni be yib ni bayi taw ngay ma gubin e yam’ ni bay u lan e low ni bayi rung’ag laman [Jesus], mi yad yib u lan e low rorad nga wuru’, ma piin fel’ e tin ni ur ngongliyed e bay ni fasegrad mu ur pired ni yad ba fos.”—John 5:28, 29.

“Piin ni yad mmunguy e bay ra pired u daken e nam u fithik’ e gapas, mu ur pired u fithik’ e gapas ni yad ba felfelan’.”—Psalm 37:11.

Rib manigil e pi thin nib fel’ nem! Pi yiiy nu Bible ni ke lebug e be dag ni ke chugur ni nge gagiyeg Gil’ilungun Got u ga’ngin yang e fayleng.