?Jasin fɛ’n yɛle benin?

“Jasin fɛ nga [...]”—MATIE 24:14.

Ɔ FATA kɛ Klistfuɛ’m be bo ‘Nyanmiɛn sielɛ’n i jasin fɛ’n’ be kle sran mun. Maan be yiyi nun kle be kɛ Ɲanmiɛn Sielɛ’n ti mɛn wunmuan’n nun awa kun m’ɔ́ síe asiɛ’n i kpa ɔ. Sanngɛ Biblu’n nun’n, be kan “jasin fɛ” wafa uflɛ i ndɛ ekun. Yɛle kɛ Biblu’n waan Ɲanmiɛn ‘ti defuɛ, [naan] e kɛn i jasin fɛ’n.’ (Jue Mun 96:2) Kpɛkun ɔ kan “Nyanmiɛn i jasin fɛ’n” i ndɛ. (Rɔmfuɛ Mun 15:16) Yɛ ɔ kan ‘Jésus-Krist i jasin fɛ’n’ i ndɛ wie.—Mark 1:1.

I kpo’n yɛle kɛ jasin fɛ’n, yɛle ndɛ nanwlɛ kwlaa nga Zezi kannin mɔ i sɔnnzɔnfuɛ’m be klɛli’n. Ka naan Zezi w’a ɔ ɲanmiɛn su’n, ɔ seli be kɛ: “An wɔ ko kle nvle-nvle’n kwlaa be like maan be kaci n sɔnnzɔnfuɛ, yɛ an yo be batɛm e Si Nyanmiɛn, nin i Wa’n, ɔ nin i Wawɛ’n be dunman nun. Yɛ like kwlaa nga n kleli amun’n, amun kusu an kle be maan be fa su.” (Matie 28:19, 20) Ɔ maan junman ng’ɔ fata kɛ Klistfuɛ kpa’m be di’n, nɛ́n i yɛle Ɲanmiɛn Sielɛ’n i ndɛ’n i kanlɛ sa ngbɛn. Sanngɛ ɔ fata kɛ be mian be ɲin be kle sran’m be like naan be kaci Zezi i sɔnnzɔnfuɛ wie.

?I sɔ’n nun’n, ngue yɛ be nga be tɔn be wun suɛn kɛ be ti Klistfuɛ’n be yo ɔ? Be siman Ɲanmiɛn Sielɛ’n. Ɔ maan be kwlá kleman sran mun i su ndɛ nanwlɛ’n. Sanngɛ ndɛ ng’ɔ yo sran’m be fɛ’n yɛ be kan ɔn. Yɛle kɛ be kan sran’m be wun sa’n i yaci cɛlɛ’n ɔ nin Zezi i su lafilɛ ndɛ. Asa ekun’n, kɛ ɔ ko yo naan sran’m b’a ɔ be asɔnun’n be nun’n ti’n, be di junman wie mun man be, annzɛ be kplan dɔɔtrɔ sua, annzɛ suklu, annzɛ kusu be kplan sua be man yalɛfuɛ mun. Kɛ be mian be ɲin be yo i sɔ ninnge mun’n, sran kpanngban be kwla kɔ be asɔnun’m be nun. Sanngɛ be kwlá kaciman Klistfuɛ kpa mɔ be tu be klun be nanti like nga Zezi kleli’n su’n.

Ɲanmiɛn Ndɛ’n su like suanfuɛ kun klɛli i kɛ: “Ɲanmiɛn i su like suanfuɛ nin asɔnun kpɛnngbɛn be sunman lika be waan, ɔ fata kɛ e kle sran’m be like naan be kaci Zezi i sɔnnzɔnfuɛ. Yɛ e kle be kɛ be yo like kwlaa nga Zezi waan be yo’n. [...] Afin i kwlaa yoli o ndɛ nga Zezi kɛnnin i sɔ’n su’n, fiɛn kaan sa nunmɛn i sin. Ɔ ti weiin kɛ e yoman like nga i waan e yo’n. E mianman e ɲin naan y’a yo. Yɛ ɔ ti weiin kɛ e siman wafa ng’ɔ fata kɛ e yo i sɔ like’n.”

Asa ekun’n, be usali Amlɛnkɛn’m be lɔ Katoliki wie’m be kosan. Be nun sunman be waan jasin fɛ’n i bolɛ’n ti like cinnjin be Ɲanmiɛn sulɛ’n nun. Sanngɛ be dan lika be waan nán jasin fɛ’n i ndɛ kanlɛ’n yɛ be flɛ i jasin fɛ’n i bolɛ’n niɔn. Ajalɛ nga be kle i be mɛn dilɛ nun’n, yɛ be flɛ i jasin fɛ’n i bolɛ’n niɔn. Sran nga be usali be kosan sɔ’m be nun kun seli kɛ: “Ijɔlɛ kpanngban’n, nɛ́n i yɛle jasin fɛ’n bolɛ’n. Ɔ fata kɛ be wun i kɛ e bɔbɔ ba’n yɛ e ti Jasin Fɛ’n niɔn.” Like nga ti yɛ sran sunman be kanman be Ɲanmiɛn sulafilɛ ndɛ be kleman sran uflɛ mun’n, Katoliki’m be fluwa sɔ’n, ɔ kɛn i ndɛ. I waan like ti yɛ ɔ ti sɔ’n yɛle “asɔnun’n i dunman mɔ w’a saci’n, ɔ nin plɛti nga be kunndɛ ba kanngan mun’n, yɛ be like klelɛ nga be kpɛ ndɛ ba’n.”—U.S. Catholic.

Lika uflɛ kusu’n, asɔnun Metodisi’m be kpɛnngbɛn kun fɛfɛli seli kɛ i asɔnun nunfuɛ’m b’a bubu be wun nun, naan be akunndan’n w’a sanngan, yɛ be leman wunmiɛn be diman be junman’n kun. Naan be aeliɛ’n nin be nga be suman Ɲanmiɛn’n, be liɛ’n ti kun. Ɔ usali ya su kɛ: “?Wan mun yɛ Ɲanmiɛn Sielɛ’n i jasin fɛ’n i bolɛ’n nin be fata ɔ? ?Yɛ wan mun yɛ be bo ɔ?”

Asɔnun kpɛnngbɛn sɔ’n w’a tɛmɛn i kosan’n su. Sanngɛ be tɛ kosan sɔ’n su ɔ yo ye. Ndɛ ng’ɔ́ bá lɛ’n nun’n é wá tɛ́ su.

[Ndɛ kwle, bue 6]

Jasin fɛ’n yɛle Ɲanmiɛn Sielɛ’n i ndɛ’n, ɔ nin e ti mɔ e ɲɛn i’n Zezi Klist i su mɔ e lafi’n ti’n.