Eme Họ Usi Uwoma Na?

“Usiuwoma . . . na . . . ”—MATIU 24:14.

ILELEIKRISTI a re whowho “usiuwoma uvie na” ẹkwoma amọfa nọ a rẹ vuẹ kpahe iẹe, dhesẹ kẹ ai inọ Uvie na họ egọmeti nọ ọ be tha nọ u ti su otọakpọ na evaọ ẹrẹreokie. Dede na, Ebaibol ọ rehọ ẹme na “usiuwoma” ta ẹme evaọ idhere efa sa-sa. Wọhọ oriruo, ma rẹ jọ Ebaibol na ruẹ eme wọhọ “usiuwoma esiwo na” (Olezi 96:2, NW); “usiuwoma Ọghẹnẹ” (Ahwo Rom 15:16); gbe “usiuwoma Jesu Kristi.”—Mak 1:1.

Re a tae kpẹkpẹe, usi uwoma na o kẹre te uzẹme nọ Jesu o wuhrẹ ahwo kpahe na, onọ ilele riẹ a kere fihotọ na. Taure Jesu o te ti muvrẹ kpohọ odhiwu, ọ vuẹ ilele riẹ nọ: “Fikiere wha wuhrẹ ahwo erẹwho kpobi, wha họ ae ame evaọ odẹ Ọsẹ, gbe Ọmọ gbe Ẹzi Ẹri, wha wuhrẹ ai, re a ru eware kpobi nọ mẹ vuẹ owhai.” (Matiu 28:19, 20) Fikiere, orọnikọ Ileleikristi uzẹme a rẹ vuẹ amọfa kpahe Uvie na ọvo ho; o gwọlọ nọ a re je ru ilele.

Ẹvẹ ichọche na i bi ru te evaọ abọ nana? Ahwo nọ a wo otoriẹ oware nọ Uvie na o rrọ họ a sai wuhrẹ amọfa kpahe iẹe gbagba ha. Ukpoye, a bi whowho ovuẹ nọ o rẹ were ahwo ezọ kpahe erọvrẹ izieraha avọ ẹrọwọ nọ a re fihọ Jesu. A be jẹ gwọlọ wo ilele tobọ ẹkwoma eware iwoma nọ a re ru kẹ ahwo hayo esipito, isukulu gbe iwou nọ a rẹ bọ kẹ iyogbere. Dede nọ iruẹru itieye na e rẹ sai se ahwo ziọ ichọche, e rẹ sai ru ahwo jọ uvi Ileleikristi nọ e ginẹ gwọlọ rọ udu kpobi rria lele eware nọ Jesu o wuhrẹ hẹ.

Owuhrẹ-egagọ jọ o kere nọ: “Isu egagọ Ileleikristi buobu a rọwo inọ o rrọ iruo nọ u te omai re ma ru ilele kẹ Jesu je wuhrẹ ae re a ru eware kpobi nọ Jesu ọ ta. . . . Iruo nana nọ Jesu ọ kẹ ilele riẹ na o rrọ vevẹ. Ma bi ru oware nọ ọ ta ha. Ma be rọ osegboja kpama re ma ru ei hi. Yọ o wọhọ nọ ma tubẹ riẹ epanọ ma re ro ru ei hi.”

Epọvo na re, evaọ ọkiẹriwo jọ nọ a jọ kiẹ ahwo ichọche Kathọlik evaọ obọ America riwi, ahwo udhone gbe ikpegbisoi evaọ udhusoi kpobi a rọwo nọ usiuwoma nọ a rẹ ta yọ abọjọ orọwọ rai. Dede na, enwenọ aikpobi a wo eriwo inọ edhere nọ ọ mai fo nọ a re ro ru onana họ, uruemu rai nọ a re ro fi oriruo hotọ kẹ amọfa orọnikọ unu rai nọ a rẹ rọ ta usiuwoma ha. Omọvo rai jọ nọ a kiẹriwi ọ ta nọ: “Orọnikọ eme, eme, eme nọ a rẹ ta họ Usiuwoma na ha. O gwọlọ nọ ma rẹ rehọ oma mai dhesẹ Usi Uwoma na via.” Obe-usi na, U.S. Catholic, nọ a jọ dhesẹ ọkiẹriwo na via o ta nọ ibuobu rai a be gwọlọ ta orọwọ rai via ha fiki “ekpehre odẹ nọ uruemu ọgbaduo nọ o roma via no evaọ ichọche na o wha se ai no gbe ebẹbẹ nọ iwuhrẹ ichọche rai e be wha ze.”

Evaọ oria ofa, ibishọpo ọrọ ichọche Methodist nọ ọ be rẹrote ubrotọ jọ ọ vioja inọ ichọche riẹ e tahaku jẹ ghale no, ababọ ajọwha nọ a rẹ rọ wha iruẹru rai haro, yọ uruemu rai u wo ohẹriẹ hẹ no orọ amọfa gheghe. Ọ nọ avọ oma uweri inọ: “Amono a bi gine whowho usi uwoma Uvie na evaọ uvi edhere?”

Ibishọpo na ọ kuyo onọ riẹ na ha. Rekọ onọ na u wo uyo. Who ti duku uyo na evaọ uzoẹme nọ o rrọ aro na.

[Ẹme nọ a fi ẹgba họ nọ ọ rrọ ẹwẹ-obe avọ 6]

Usi uwoma na u wobọ kpahe Uvie Ọghẹnẹ gbe esiwo ẹkwoma ẹrọwọ nọ a re fihọ Jesu Kristi