Nutaarsiassaq nuannersoq suua?

“Iivangkiiliu [nutaarsiassaq nuannersoq, NV] taanna . . .” — MATTHÆUSI 24:14.

KRISTUMIUT Naalagaaffik pillugu nutaarsiassaq nuannersoq oqaluussissutigisussaavaat allanut oqaluttuarineratigut nassuiarneratigullu Naalagaaffik tassaasoq silarsuarmi naalagaaffiusussaq nunarsuarmut naapertuilluartumik naalakkersuisussaq. Oqaaserli “iivangkiiliu”, imaluunniit nutaarsiassaq nuannersoq, aamma Biibilimi allatut atorneqarpoq. Assersuutigalugu ‘Guutip iivangkiiliua’ (Romamiut 15:16); aamma ‘Jiisusi-Kristusimik iivangkiiliu’ eqqartorneqarput. — Markusi 1:1.

Paasiuminartumik oqaatigalugu nutaarsiassamut nuannersumut ilaapput sallusuissuterpassuit Jiisusip eqqartortagai ajoqersugaasalu allaatigisaat. Jiisusip qilaliannginnermini ajoqersukkani ima oqarfigai: “Taamaattumik aallarlusi inuiaqatigiit tamaasa uannut ajoqersuganngortissigit kuillugit Ataatap Ernerullu Anersaallu Illernartup aqqani ajoqersorlugillu ilissinnut peqqussutikka tamaasa maleruaqqullugit.” (Matthæusi 28:19, 20) Tassa kristumiut ilumoortut Naalagaaffik pillugu allanut paasissutissiinissaq kisiat aallutissanngilaat; aammali ajoqersuganngortitsiortorniartussaapput.

Tamatumunnga tunngatillugu oqaluffeqarfinni qanoq iliortoqarpa? Inuppassuit Naalagaaffiup tamatuma suunera paasinngilaat, taamaattumillu allanut eqqortumik ilinniartitsissutigisinnaanngilaat. Naalagaaffik pillugu eqqortumik paasissutissiinatik arlaannik inuit iluarusuutigisaannik, soorlu ajortit isumakkeerfigineqarnissaannik Jiisusimillu upperinninnermik, oqalugiaateqartarput. Aamma ilassarsiorniarsarisarput inunnik isumaginninnermut tunngasunik suliaqarnikkut imaluunniit piitsunut napparsimmaviliornikkut, atuarfiliornikkut inissialiornikkullu. Imaassinnaavoq taamatut ilungersorneq oqaluffiit ilaasortaannik amerlisitsisut, taamaaliornerilli ilumoortunik kristumiunngortitsineq ajorput, Jiisusip ajoqersuutaa naapertorlugu ilumoorlutik inoorusuttunik.

Teologi ima allappoq: “Ilisimatuut kristumiunilu siuttuusut ikittuinnaat miserratigissavaat inuit Jiisusimut ajoqersuganngortinnissaat taassumalu oqaasiinik tamanik ilinniartinnissaat pisussaaffigigipput. . . . Jiisusimmi tamanna pillugu peqqussutai paatsuugassaanngillat. Oqaasiali malillugu iliunngilagut. Ajoqersuganngortitsiniarneq pimoorutinngilarput. Qanorlu iliornissarput nalugunarparput.”

USA-mi katuullit akornanni misissuinerup takutippaa apersorneqartut 95 procentii isumaqatigiittut nutaarsiassap nuannersup oqaluussissutiginissaa katuuliusutut pisussaaffigigitsik. Tamangajammilli isumaqarput pitsaanerpaamik taamaaliorneq tassaanngitsoq tamatuminnga oqaluuserinninneq, tassaallunili allanut maligassiuilluarnikkut inooriaaseqarneq. Apersorneqartut ilaat ima oqarpoq: “Ajoqersuineq oqaasiinnaanngilaq, oqaasiinnaanngilaq, oqaasiinnaanngilaq. Uagut tassaassaagut nutaarsiassaq nuannersoq.” U.S. Catholic-imi, atuagassiami apersuisitsisumi, allassimavoq amerlasuut upperisamik allanut oqaluttuarinissaa tunuarsimaarutigisaraat “qanittukkut kinguaassiuutitigut atornerluisoqartarneranut oqaluffimmilu ajoqersuutigineqartunut nalorninartunut tunngatillugu oqaluffiup tusaamanerlugaanera” pissutigalugu.

Metodistit biskoppiisa ilaata ajuusaarutigaa oqaluffeqarfimminni avissaartuunnertik paatsiveqannginnertillu, ajoqersuganngortitsiortornissaminnullu sapiissuseqannginnertik aamma innuttaaqatigisatillu assigiipajaanik ileqqussatigut najoqqutaqarnertik. Nukillalaarpasilluni ima aperivoq: “Naalagaaffik pillugu iivangkiiliup siaruarternissaanut kikkut akisussaappat?”

Biskoppip apeqqutini akissutissaqartinngilaa. Apeqqulli akissutissaqarpoq. Tamanna allaaserisami tulliuttumi atuarsinnaavat.

[Qupp. 6-mi issuagaq]

Nutaarsiassami nuannersumi Guutip naalagaaffia aamma Jiisusimut Kristusimut uppernikkut annaanneqarneq pineqarput