Chanchin Ṭha Chu Eng Nge Ni?

“Chanchin ṭha hi . . . ”—MATTHAIA 24:14.

KRISTIANTE chu Lalram hi felnaa lei ro la rêl tûr sawrkârna a ni tih mi dangte hnêna hrilhfiahna hmanga “ram chanchin ṭha” puang tûra tih an ni a. Mahse, “chanchin ṭha” tih hi Bible-ah kawng dang pawha hman a ni a. Entîr nân, “chhandamna chanchin ṭha” (Ephesi 1:13); “Pathian chanchin ṭha” (Rom 15:15, 16); leh “Isua Krista chanchin ṭha,” tihte hi kan hmu a ni.—Marka 1:1.

A awlsam thei ang bera sawi chuan, chanchin ṭha-ah hian thutak chungchânga Isua sawi zawng zawng leh a zirtîrte ziak zawng zawng a tel a ni. Vâna a lâwn hmain, Isua chuan a hnungzuitute hnênah: “Chutichuan kal ula, hnam tina mi zirtîrahte siam ula, Pa leh Fapa leh thlarau thianghlim hmingah chuan baptis ula, thu ka pêk zawng zawng che u pawm tûrin zirtîr rawh u. Tin, ngai teh u, kei kumkhuain, khawvêl tâwp thleng pawhin, in hnênah ka awm zêl ang,” a ti a. (Matthaia 28:19, 20) Chuvângin Kristian dikte hnaah chuan mi dangte hnêna Lalram chanchin hrilhhriat mai ni lovin, zirtîra siam pawh a tel a ni.

He mi chungchângah hian Kristian sakhuate chu eng nge an an? Mi tam tak chuan Lalram tih awmzia an hre thiam lo va, chuvângin mi dangte hnênah chu mi chungchânga thu dik an zirtîr thei lo. Zirtîr a hnêkin, ngaih ṭhatna awmtîr thei sual ngaihdamna leh Isua rinna thute chu an sawi vak vak zâwk a ni. Tin, khawtlâng ṭanpuina lam emaw, damdawi in te, school te, leh retheite tâna inte sa emawin mite sakhaw inlehtîr dân an dap bawk. Chûng chuan biak ina inkhâwm tipung thei mah se, Isua zirtîrna mila tih tak zeta nun tum Kristian dik a hring chhuak lo.

Theologian pakhat chuan: “Scholar-te emaw, Kristian hruaitute emaw zîngah hian zirtîr siam tûr leh Isua thusawi zawng zawng ti tûra mite zirtîr tûr kan ni tih hre lo kan awm mang meuh lo. . . . He mi chungchânga Isua kaihhruaina chu a fiah hle si a. A sawi angin kan ti lo mai a ni. Tih kan tum tak tak lo va. A tih dân tûr pawh kan hre bawk hek lo niin a lang,” tiin a ziak a ni.

Chutiang bawkin, United States-a Catholics-te ngaih dân lâk khâwmna chuan, zaa 95-te’n chanchin ṭha hrilh hi an sakhaw mi nih nâna thil ṭûl a nihzia an pawm tih a târ lang a. Chuti chung pawhin, an za deuhthaw chuan chanchin ṭha hrilh dân kawng ṭha ber chu, ṭawngkama sawi chhuah ni lovin mi dangte entawn atâna a nuna nun chhuahpui niin an hria a ni. Ngaih dân sawi ve nu pakhat phei chuan: “Chanchin ṭha hrilh hi ṭawngkama sawi zuah zuah mai a ni lo. Keimahni hi Chanchin Ṭha kan nih a ngai a ni,” tiin a sawi. Chu ngaih dân lâk khâwmna neitu U.S. Catholic magazine chuan mi tam takin chanchin ṭha an hrilh loh chhan pakhat chu “tûn hnaia naupang khawih chingpenna leh kohhran zirtîrna buaithlâk takte avânga kohhran hmêlhem” vâng niin a sawi bawk.

Hmun danga Methodist bishop pakhat pawhin a kohhran mite chu an inṭhen darh a, an buai nuaih nuaih avânga thu hril tûra huaisenna an neih loh thu leh mi dangte aia an nungchang a ṭhat bîk loh thu a rûm chhuahpui a. “Lalram chanchin ṭha hril tûra mawhphurtute chu tute nge ni ta ang?” tiin, lungngai tak chungin zawhna a siam hial a ni.

Chu bishop chuan a zawhna siam atân chhânna a pe lo. Mahse a chhânna a awm a ni. Chu chu a dawta thuziakah i hmu ang. (w11-E 03/01)

[Phêk 6-naa thu lâk chhuah]

Chanchin ṭha chu Pathian Ram leh Isua Krista rinna azâra chhandamna chungchâng hi a ni