“Tyäˈädë oybyë ayuk.” (MATEWɄ 24:14)

PËNATY myëbëjktëbë Jesus nyikëjxmˈäjttëp tkäjpxwäˈkxtëdë ja “oybyë ayuk diˈibë nyimaytyakypy ja tsäjpotmëdë kutujkën”. O ja tuk peky njënäˈänëm, tnimaytyäˈägët ko Diosë yˈAnaˈamën yëˈë tuˈugë gobiernë diˈib anaˈamäämp tëyˈäjtën mëët yä Naxwiiny. Mä Biiblyë nanduˈun tmaytyaˈagyë tyäˈädë “oybyë ayuk” extëm ja “oybyë ayuk diˈib yajnitsokp”, “oybyë ayuk diˈibë tsoˈon mä Diosën”, ets “oybyë ayuk mët yëˈëgyëjxmë Jesukristë” (Salmo 96:2; Romanʉs 15:16; Markʉs 1:1).

Oybyë ayuk, yëˈë yˈandijpy tukëˈëyë ja tëyˈäjtën diˈibë Jesus tukniˈˈijxë ets diˈibë yˈëxpëjkpëty kyujäˈäyëdë. Mä Jesus kyapatëkënëm tsäjpotm, ojts ttukˈaneˈemy ja yˈëxpëjkpëty: “Nëjx yaˈëxpëktë jäˈäyëty mä tëgekyë naxwinyëdë esëts ëj njäˈäyˈattët. Yajnëbattë xyëëgyëjxmë Dios Teety, es ëj, ja yˈUˈunk, es ja espiritë santë, es tukniˈixëdë es tkuytyunët tëgekyë diˈibëts ëj miits të ndukˈanaˈamdë” (Matewʉ 28:19, 20). Pääty, pënaty jyantsy pyanëjkxtëbë Kristë, kyaj jeˈeyë tnimaytyäˈägëdë tyäˈädë Anaˈamën, nanduˈunën dyaˈëxpëkëdë jäˈäy parë Jesus tpanëjkxët.

¿Kyuytyuumbyë tyäˈädë tuunk pënaty yajpattëp tsäjptëgoty? Tsip duˈun ttundët. Pes kyaj tjaygyukëdë tidën yˈandijpy Diosë yˈAnaˈamën, pääty kyaj mbäät ttukniˈˈixëdë jäˈäy. Mayë teetytyëjk etsë pastoor, parë oy dyajnayjawëdë jyaˈay jeˈeyë tnimaytyakojtë wiˈixë poky kaytyey yajmeˈkxy ets wiˈix tmëdattëdë mëbëjkënë mä Kristë. Ets parë tganarattë mayë jyaˈay, ta dyajtundë xyëë tiempë etsë myeeny syentääbë parë tpudëkëdë jäˈäy, tkojtë hospital, eskuelë etsë albergë parë ayoobë jäˈäy. Ko duˈun ttundë, mbäät ja tsyäjptëjk dyaˈutstë, per kyaj mbäät tpudëkëdë jyaˈay parë jyukyˈattët extëmë Kristë tyukniˈˈijxë.

Tuˈugë ëxpekyjyaˈay jyënany: “Mayë jäˈäy diˈib myëbëjktëbë Kristë jyënäˈändë ko xypyatëm ets nyaˈëxpëjkëmë jäˈäy ets ndukniˈˈijxëm tijatyë Jesus ojts tniˈanaˈamë. [...] Pesë Jesus yajxon ojts tnigajpxy wiˈix yajtunäˈäny. Jeˈeyë ko ëtsäjtëm kyaj duˈun nduˈunëm. Ets ko njatunäˈänëm, kyaj njotmoˈoyëm. Ets diˈib mas oˈktëy, yëˈë ko ni jeˈeyë nganijäˈäjëm wiˈix yajtunäˈäny”.

Mä rebistë U.S. Catholic yajtuuny tuˈugë sensë jap Estados Unidos mä katolikëtëjk, ets 95% jyënandë ko pënaty myëbëjktëbë Kristë nyikëjxmˈäjttëp tkäjpxwäˈkxtëdë oybyë ayuk. Per nimay jyënandë ko wiˈix mbäät yajtuny, yëˈë ko jäˈäy yajtukniˈˈixëdët mët ja ijxpajtën. Niduˈugë tyäˈädë jäˈäy jyënany: “Ko ngäjpxwäˈkxëmë oybyë ayuk, kyaj jeˈeyë yajnimaytyäˈägäˈäny, yajtukjukyˈatäämbë duˈun”. Tyäˈädë rebistë jyënany ko may kyaj tnimaytyäˈägäˈändë myëbëjkën mët ko wyintsëndëjk “axëëgë tsäjptëjk të dyajwëˈëmdë, ko yajnimaytyäˈäktë ënäˈkuˈunk tˈaguanëˈattë ets ko dyajtsiptäˈäktë tijaty tukniˈˈijxëdëp”.

Tuˈugë obispë diˈib mä relijyonk Metodista, ojts tnigajpxy ti jotmay japˈäjtp mä tsyäjptëjk, jyënany ko jeˈeyë jyapˈatyë nayˈoo nayäˈäxë ets nipën kyanayjaygyukëdë, ets nipën tkakupëkäˈäny ja tuunk diˈib patëp ttunët pënaty myëbëjktëbë Jesus ets mayë jyaˈay nanduˈun jyukyˈattë extëm oytyimpënëty. Ta net jyënany: “¿Pën kyupëkaampy ets tkäjpxwäˈkxëdë oybyë ayuk diˈib mä [Diosë] yˈAnaˈamën?”.

Tyäˈädë obispë kyaj tnijäˈäjë pën duˈun tyunëp. Per taa diˈib duˈun tyuundëp, extëm nnijawëyäˈänëm mä ja tuˈukpë artikulo.

[Letrë diˈib miimp mä dibujë mä pajina 6]

Oybyë ayuk yëˈë nyimaytyakypyë Diosë yˈAnaˈamën ets ja nitsokën diˈib yajpatp ko nmëbëjkëmë Jesukristë