Ziyini Iindaba Ezimnandi?

“Iindaba ezimnandi . . .”—MATEWU 24:14.

AMAKRESTU kufuze atjhumayele “iindaba ezimnandi ngombuso” ngokutjela abanye ngazo, ahlathulule bona uMbuso loyo ngurhulumende wephasi wangomuso ozokubusa iphasi ngokulunga. Nokho, ikulumo ethi “iindaba ezimnandi” iberegiswa nangezinye iindlela eBhayibhilini. Ngokwesibonelo, kukhulunywa ‘ngeendaba ezimnandi zephuluso’ (IRhalani 96:2); “iindaba ezimnandi zakaZimu” (KwebeRoma 15:16); ‘nangeendaba ezimnandi ngoJesu Krestu.’—Markosi 1:1.

Ngendlela ebulula, iindaba ezimnandi zihlanganisa woke amaqiniso akhulunywa nguJesu begodu atlolwa bafundi bakhe. Ngaphambi kokunyukela ezulwini, uJesu watjela abalandeli bakhe: “Khambani-ke, niye ebantwini boke nanyana kukuphi nibenze abafundi; babhabhadiseni ebizweni lakaBaba, neNdodana, nomoya ocwengileko, nibafundise ukwenza koke enginilaye ngakho.” (Matewu 28:19, 20) Ngalokho umsebenzi wamaKrestu weqiniso akusikutjela abantu ngoMbuso kwaphela; kufuze godu benze abafundi.

Amasondo araga njani kilokhu? Abantu abanengi abazwisisi bona uMbuso uyini ngalokho ngeze bakwazi ukufundisa abanye ngawo ngokunembileko. Kunalokho, batjhumayela iintjumayelo ezihloselwe ukwenza abantu bazizwe kamnandi bakhuluma ngokuyihloko ngokulitjalelwa kwezono nokuba nekholo kuJesu. Godu bafuna abalandeli ngokwenza ikonzo yomphakathi namtjhana ngokubakhela iimbhedlela, iinkolo, namakhaya wabatlhagako. Ngitjho nanyana iimzamo enjalo ingandisa isibalo sabantu abaya emasondweni, ayivezi amaKrestu weqiniso afuna kwamambala ukuphila ngokuvumelana nalokho uJesu akufundisako.

Isazi sekolo esithileko satlola: “Izazi ezinengi zobuKrestu namtjhana abadosiphambili bekolo bayavuma bona kufuze senze abafundi bakaJesu begodu sibafundise ukwenza zoke izinto uJesu azitjhwileko. . . . Ngaphezu kwalokho, iinqophiso zakaJesu endabeni le, zikhanya bha. Akusikukobana asenzi lokho athe sikwenze. Asilingi ngitjho nokukwenza. Begodu kuyakhanya bona asazi bonyana singakwenza njani.”

Ngokufanako, ukuhlolwa kwamaKatolika e-United States kwatjengisa bona amaphesenti ama-95 ayavuma bona ukutjhumayela iindaba ezimnandi kuyifuneko yekholo lawo. Nokho, pheze boke banamazizo wokobana indlela engcono khulu yokwenza lokhu, akusikukhuluma ngazo, kodwana kuphila ngedlela esibonelo kwabanye. Omunye wabahlolwako wathi: “Ukutjhumayela akusikukhuluma, ukhulume, ukhulume. Kutlhogeka sibe ziiNdaba Ezimnandi.” I-U.S. Catholic, umagazini owenze ukuhlolokhu, uthi abanengi bayazaza ukuhlanganyela ikholo labo nabanye ngebanga “ledumo elimbi lesondo ngehlazo lamva nje lokutlhorisa ngokomseme neemfundiso zesondo ezimraro.”

Kokhunye, umbhitjhobhi weMethodist walila ngokobana amasodwakhe ahlukene, atjharagene, awanasibindi sokufeza ukuthunywa kwawo begodu aphila ngendlela efana neyabantu abangasondiko. Atshwenyekile, wabuza: “Bobani abanomthwalo wefanelo wokuphatha ivangeli loMbuso?”

Umbhitjhobhi lo zange awuphendule umbuzwakhe. Kodwana ikhona ipendulo. Uzoyifumana esihlokweni esilandelako.

[Umkhangiso osekhasini 6]

Iindaba ezimnandi zimalungana nakho kokubili uMbuso kaZimu nephuluso ngekholo kuJesu Krestu