Onondaka Onongwa Oityi?

“Onondaka ombu onongwa . . . ”—MATEUS 24:14.

OVAKRISTAU vaivisa “onondaka onongwa Mbouhamba wa Huku” mokupopila vakuavo konthele yao, okuvehangununina okuti Ouhamba oo komutwe maukatumina ouye auho nouviuki. Anthi “onondaka onongwa” mo Mbimbiliya tupu mbuhangununwa mononkhalelo ononkhuavo. Mongeleka, tuvasamo “onondaka onongwa mbeyovo” (Salmo 96:2); “onondaka onongwa mba Huku” (Romanos 15:16); no “nondaka onongwa konthele ya Jesus Kristu.”—Marcos 1:1.

Ondaka onongwa muakutikinya otyili atyiho konthele yetyi Jesus apopia netyi ovalongwa vae vahoneka. Etyi ehenelonde keulu, Jesus wapopila ovalongwa vae okuti: “Endei, kalongesei ovanthu movilongo aviho opo vakale ovalongwa. Iya amuvembatisala menyina lia Tate, no lio Mona, no liospilitu sandu. Velongesei okutavela ovipuka aviho ame nemutuma.” (Mateus 28:19, 20) Ngotyo, ovilinga vio Vakristau votyotyili, hakupopila vala vakuavo konthele Youhamba wa Huku, tupu vena okulinga ononkhono mbokulongesa ovanthu vakale ovalongwa.

Oñgeni onongeleya mbukahi nokulinga otyilinga otyo? Ovanyingi kavei oityi Ouhamba wa Huku, ngotyo kavetyivili okulongesa nawa vakuavo konthele yao. Anthi, valinga omalongomona opo ovanthu velitehelele nawa konthele yokuevelwa ononkhali, nekolelo mu Jesus. Tupu vaovola okutavelesa ovanthu, mokuveavela okulia ine okutunga onosipitali, no nosikola, no nondyuo pala vana vahepa. Okulinga ngotyo, tyiyulisa vala ovanthu movikapela, mahi katyivekalesa Ovakristau votyotyili vaovola tyili-tyili okuendela muetyi Jesus alongesa.

Omulongesi umwe konthele yongeleya wahoneka okuti: “Kavehi ovalongesi ine ononkhalamutwe mbonongeleya mbo Vakristau vouye, vetavela okuti vekahi nokulongesa ovanthu opo vakale ovalongwa va Jesus, nokuvelongesa ovipuka aviho Jesus apopile. . . . Onondonga mba Jesus konthele yotyo mbayandyuluka nawa. Onthue katulingi vala etyi apopia. Katuovola okulinga ononkhono konthele oyo. Tyimoneka ngoti katwii oñgeni otyo tyilingwa.”

Tupu, eovololo lialingwa no va Katolika mo Estadu Unidu, lilekesa okuti ovanyingi vetavela okuti vana vaivisa onondaka onongwa, omokonda yekolelo liavo. Nkhele otyinyingi vetavela okuti onkhalelo yaviuka yokuivisa, hakupopia konthele yotyo, anthi okutyinda omuenyo welikuata notyo, okuavela vakuavo ongeleka ongwa. Umwe puovo wati: “Okuivisa tyelikalela monondaka, monondaka, no nondaka. Tuesukisa okukala Onondaka Onongwa.” Omukanda wo Katolika mo Amelika vaundapesa peovololo olio, wati ovanyingi kavapopi konthele yekolelo liavo mokonda “yovipuka viasila vilingwa nongeleya, ngo maundalelapo nomalongeso anguanguanesa.”

Tupu, ombisipu umwe yongeleya Metodista weliyava okuti ongeleya yavo yanguanguana, nokueliyapauka, nokuhena vali ononkhono mbokulinga otyilinga tyavo, novituwa oviwa. Nokualimbililwa, oe wapula okuti: “Ovalie vena otyilinga tyokuivisa o evandyeliu Youhamba?”

Ombisipu oo, kakumbululile epulo liae. Mahi epulo olio lina ekumbululo. Mokelivasa monthele mailandulako.

[Onondaka Mbavilapo pefo 6]

Onondaka onongwa o Mbouhamba wa Huku neyovo mokonda yekolelo mu Jesus Kristu