Ngerang a Ungil el Chais?

“Tial evangkelio . . . ”​—MATTEUS 24:14.

A REKRISTIANO a omerk e olisechakl er tia el “ungil chais ra renged” el oeak sel louchais er a rebebil el kirel, e lebeketeklii el mo er a rechad el kmo tia el Renged a di ta el bedengel a kabelment el ngii a mo mengedereder er a beluulechad el oba llemalt. Me nguaisei, engdi a tekoi el “ungil chais” a dirrek el omesodel a bebil er a tekoi el lousbech er ngii a Biblia. El uai tiang, ngsebeched el metik er a omesodel el ‘ungil chais er a osobel’ (Psalm 96:2); me a ‘ungil chais el kirel a Dios’ (Rom 15:16); me a dirrek el ‘ungil chais el kirel a Jesus.’​—Markus 1:1.

A beot el omesodel a kmo, tia el ungil el chais a dirrek el uldimukl er a rokui el klemerang el tekoi el lullekoi a Jesus me a redisaiplo er ngii a liluches. Uchei er a lengasech el mo er a eanged a Jesus, e ngmilengelechel er a rulebengkel el kmo: “Misei e morael el mora rokuil renged el rulleterir ar chad el mo Obengkek, e molecholb er tir loba ngklel a Chedam, ma Ngalek, ma [oureor el klisichel a Dios]. E molisechakl er tir me bo lolab a ikel rokui el bla kdu er kemiu.” (Matteus 28:19, 20) Me a ureor el loruul er ngii a remera el Kristiano a diak di louchais er a rebebil el kirel a Renged; e te dirrek el kmal kirir el meruul er a remo disaiplo er a Jesus.

Me ngua ngerang a osengel a betok el klechelid el kirel tia el tekoi? A rebetok el chad el tir a diak lodengelii a mera el belkul a Renged, a diak el sebechir el losisecheklterir a rechad er a mera el belkul me a moktek er a Renged. Te bai olisechakl er a rechad el di melemolem aike el sorir el tekoi el oeak sel di losaod el kirel a klausubes er a klengit me a klaumerang er a Jesus. Te dirrek el di meruul a tekoi el di kirel a chetengakl me a chais, el oeak sel lomekedechor a osbitar me a skuul me a dirrek el blirir a remechebuul. Me alta e a chouaika el omeruul a sebechel el mo uchul e ngmo klou a ildois er a rechad el mo er a ikelesia, engdi ngkmal diak a ta el bo el sebechel el meruul er a remera el Kristiano, el tir a kiei el loba blakerreng el oltirakl aike el osisecheklel a Jesus.

A ta el brobesong er a ngarbab el skuul er a beluu er a California a meluches el kmo: “A ruumesingd er tirke el mengeteklel a klechelid a ungil el medengei el kmo ngkmal kired el meruul er a remo disaiplo er a Jesus, e dirrek el olisechakl er tir el mo meruul a tekoi el ledilung a Jesus. . . . E le a tekoi el lulsaod a Jesus el kirel tia el ureor a kmal bleketakl. Me ngbelkul a kmo ngdi kid el diak doltirakl. E dirrek el diak dolasem el meruul er ngii. Me a lmuut el tang, ngdiak dodengei el kmo ngmekerang a domuchel el meruul er tia el ureor.”

A ta er a omesuub er a beluu er a Merikel el kirel a ikelesia er a Katolik a ouchais el kmo, a 95 el basent er a rechad a kongei el kmo a berkel a ungil el chais a kmal klou a ultutelel el tekoi el kirel a klaumerang er tir. Me nguaisei, engdi a ruumesingd er tir a omdasu el kmo a kot el lungil el rolel a doruul er tiang, a ungil a lak dosaod er ngii, e bai de kiei el rullii a rolel a klengar er kid el mo ungil el kerebai el sebechir a rechad el oltirakl er ngii. A ta er a redil el luleker er ngii el kirel tia el tekoi a dilu el kmo: “A berkel a ungil el chais a diak lemeteketek el okiu a betok el omesodel a tekoi. Ngbai kirel a omerelled er a bek el sils el mo oterekeklii tia el Ungil el Chais.” A makesin el U.S. Catholic, el ngii a mlerriter er tia el omesuub, a mesaod el kmo te betok er tir a diak louchais er a rebebil el kirel a klaumerang er tir e “le ike el mekikiongel el omerellir el kirel a deleboes el omeruul el loruul me a dirrek el osisecheklir el ngii a di omuchel a meklou el uldikel me a mondai er a bek el taem a uchul.”

A ta er a mengeteklel a ikelesia er a Methodist a melekoi el kmo ngar er a chelsel a ikelesia er tir e ngkmal klou a klekakeakl me a dirrek el kmal klou a rraurreng er a rechad, e diak a blakerreng er a rechad el sebechel el rullii a chad el mo churrengelii a omesiungel, e a osisiu el taem e a omerellir a di osisiu ngii me a omerellir a rechad er a ikrel a ikelesia er tir. Me ngii a melechesuar el kmo a omerellir a kmal diak el ungil el kerebai el mo er a rechad. Me ngbai uleker el kmo: “Te rua techang a kmal ngerechelir el omerk er a evangkelio er a Rengedel a Dios?”

Me ngika el mengeteklel a klechelid a dimlak losaod er a nger er ngii el kirel tia el ker. Engdi ngkmal ngar er ngii a nger el kirel tia el ker. Ngkmal sebechem el mo metik er ngii er a chelsel sel ongingil el suobel.

[Blurb el ngar er a 6 el llel]

A ungil el chais a ouchais el kirel a Rengedel a Dios me a dirrek el kirel a osobel el mo er ngii el okiu a klaumerang er kid el mo er a Jesus Kristus