O le ā le Tala Lelei?

“O lenei tala lelei . . . ”—MATAIO 24:14.

E TALAʻI e Kerisiano le “tala lelei o le malo,” e ala i le taʻu atu i isi o lenā Malo, o le a pulea le lalolagi i le lumanaʻi i le amiotonu. Ae e ese foʻi isi auala o loo faaaogā ai i le Tusi Paia le faaupuga, “tala lelei.” O se faaaʻoaʻoga, ua tatou maua ai le faaupuga “tala lelei o le faaolataga” (Salamo 96:2); “tala lelei a le Atua” (Roma 15:16); ma le “tala lelei iā Iesu Keriso.”—Mareko 1:1.

E aofia ai i le tala lelei upu moni uma na fetalai i ai Iesu, ma tusia e ona soo. Na taʻu atu e Iesu i ona soo a o leʻi afio i le lagi: “O le mea lea, ia outou ō atu e fai tagata o nuu uma lava ma soo, ma papatiso atu iā i latou i le suafa o le Tamā, ma le Atalii, ma le agaga paia, ia aʻoaʻoina i latou ia tausi i mea uma ua ou poloaʻi atu ai iā te outou.” (Mataio 28:19, 20) O lea la, o le galuega o loo faia e Kerisiano moni, e lē na o le taʻu i isi o le Malo; ae e latou te taumafai foʻi e faia isi ma soo.

Ae po o faia e lotu lenei poloaʻiga? E lē mafai e lotu ona aʻoaʻo ma le saʻo isi e uiga i lea Malo, ona e lē o malamalama po o le ā le Malo. Nai lo o lea, e latou te lauga atu upu e logomālie i tagata, e uiga i le faamagaloina o agasala ma le faatuatua iā Iesu. E taumafai foʻi ina ia faaliliu mai nisi e ala i galuega mo le lelei o le lautele, i le fausia o falemaʻi, aʻoga ma fale mo tagata matitiva. E ui ua toʻatele tagata e liulotu ona o na taumafaiga, ae e lē o avea ai i latou ma Kerisiano moni, o ē e mananaʻo ia ola e tusa ma aʻoaʻoga a Iesu.

Na tusi se tasi tagata poto: “Ua iloa e le toʻatele o tagata popoto ma taʻitaʻi lotu, e tatau ona tatou ō atu e fai isi ma soo o Iesu, ma aʻoaʻo i latou e faia mea uma na ia fetalai mai ai. . . . O loo manino faatonuga a Iesu e faatatau i lenei mataupu. Ae e tatou te lē o faia lava le mea na ia fai mai ai. E tatou te lē o taumafai foʻi e fai, ma e foliga mai e tatou te lē iloa ona fai.”

Ua faaalia foʻi i se suʻesuʻega na faia i tagata Katoliko i Amerika, e 95 pasene ua ioe o le talaʻia o le tala lelei, o se mea e tatau ona faia e la latou lotu. Ae e toetoe lava o tagata uma e manatu, o le auala sili e faia ai lenei mea, e lē o le talanoa ae ia ola e tusa ma le tala lelei ma avea o se faaaʻoaʻoga i isi. Na faapea mai se tagata na suʻesuʻeina: “O le talanoa i le tala lelei, e lē o le auala sili lea e talaʻi ai. Ae e sili atu ona tāua le avea o i tatou o ni faaaʻoaʻoga lelei.” Ua faapea mai le mekasini U.S. Catholic lea na faia le suʻesuʻega, ua faatalatū le toʻatele e talaʻi ona o “faataʻitaʻiga leaga talu ai nei a le lotu, i le faileagaina o tamaiti ma le lavelave o a latou aʻoaʻoga.”

A ua tagi talatala mai se faifeʻau Metotisi e faapea, ua fevaevaeaʻi ma fenuminumiaʻi lana lotu, ona e lē mafai ona ō e fai le galuega, ma e tutusa lava a latou amio ma amioga a tagata lautele. Na fesili mai o ia ma le lē fiafia: “O ai la e mafai ona ō atu e talaʻi le tala lelei o le Malo?”

E leʻi tali mai le faifeʻau i lana fesili. Ae e iai le tali. O le a e mauaina i le mataupu e sosoo mai.

[Faamatalaga faaopoopo i le itulau 6]

O le tala lelei, e faatatau i le Malo o le Atua ma le faaolataga, e ala i le faatuatua iā Iesu Keriso