¿Tuku uma xatlan tamakatsin?

«Tlan tamakatsinin.» (MATEO 24:14)

KSTALANINANIN Cristo xlichuwinatkan «tlan tamakatsinin xla tapakgsin», uma wamputun pi nakawanikgo latamanin pi xTamapakgsin Dios akgtum tamapakgsin nema akgstitum namapakgsinan kKatiyatni. Chu kBiblia na lichuwinan «xasasti tamakatsin xla lakgtaxtut», «xatlan xtamakatsinin Dios» chu «xatlan tamakatsinin xla Jesucristo» (Salmo 96:2, NM; Romanos 15:16; Marcos 1:1). Wa xlakata, ¿tuku wamputun xatlan tamakatsinin?

Tamakatsin wamputun, wantuku masiyalh Jesús nema tsokgwilikgolh xtamakgalhtawakgen. Akxni nina xʼan kʼakgapun, Jesús kawanilh kstalaninanin: «Kapitit, na kamasiyunikgotit xlipaks akgmakgat chixkuwin, chu nalimunukgotit kxtukuwini xaTlat, chu kxtukuwini xaKam, chu kxtukuwini Spiritu Santo. Chu na namasiyunikgoyatit mpi natlawakgoy xlipaks yuma ntu kkalimapakgsinitan» (Mateo 28:19, 20). Wa xlakata ni kajwatiya kalitachuwinankgo Tamapakgsin, xaxlikana kstalanina Cristo lu liskuja nakamakgalhtawakge amakgapitsin xlakata na kstalanina Cristo nawankgo.

¿Chuna tlawamakgolh atanu takanajla? Ni chuna tlawamakgolh. Xlakata tlan namasiyakgo xlakata Tamapakgsin, talakaskin pulana nakatsikgo tuku wamputun, pero nipara tiku kapulalinkgo liwana katsikgo tuku wamputun. Wa xlakata lhuwa sacerdotes chu tiku pulalinkgo takanajla kaj kawanikgo pi katapatikan chu nakanajlanikgo Cristo xlakata tlan nalimakgkatsikgo latamanin. Nachuna xlakata tlakg lhuwa nakanajlakgo, limaxtukgo kilhtamaku chu limaklakaskinkgo tumin xlakata nakamakgtayakgo latamanin, matlawinankgo pumakuchin, pukgalhtawakga chu albergues niku nakamakgtayakan tiku nitu kgalhikgo. Tuku tlawakgo tlawa pi lhuwa tiku tlakg naʼankgo kxtemplojkan pero ni tlawakgo tuku tlakg xlakaskinka: ni kamasiyanikgo nalatamakgo chuna la masiyalh Cristo.

Chatum tiku kgalhtawakga xlakata takanajla wan: «Tiku kanajlanikgo Cristo, kgalhtawakganin o sacerdotes katsikgo pi kilimasiyanitkan amakgapitsin na nastalanikgo Jesús, nakgalhakgaxmatkgo xlimapakgsin. [...] Xlakata Jesús liwana wa pi chuna kilitlawatkan. Pero ni chuna tlawamaw. Chu maski min kilhtamaku tlawayaw ni liwana makgantaxtiyaw. Chu nipara katsiyaw la tlawakan».

Maktum revista nema wanikan U.S. Catholic kakgalhskilh makgapitsi católicos xalak Estados Unidos chu 95% wankgolh pi kstalaninanin Cristo xlimasiyanitkan amakgapitsin xatlan tamakatsin. Pero lhuwa wankgolh pi xlakata tlakg tlan nakalimasiniyaw wa nawiliyaw tlan liʼakxilhtit nixawa nakalitachuwinanaw. Chatum tiku kgalhskinka wa: «Lichuwinankan xatlan tamakatsin ni kaj wamputun lhuwa nachuwinana; talakaskin nalilatamayaw tuku lichuwinanaw». Uma revista wa pi lhuwa ni lichuwinamputunkgo xtakanajlakan xlakata «lu nitlan tuku wankan xlakata tiku pulalinkgo xtakanajlakan xlakata tlawamakgolh talakgxtumit xalimaxana chu ni liwana taʼakgatekgsa tuku masiyamakgolh».

Chatum obispo metodista wa tuku ni lakgati nema anan kxpusikulankan: kaj lamaʼakglhuwi chu ni liwana katsikgo tuku natlawakgo, chu nitiku makgantaxtiputun tuku kalakgayawakanit kstalaninanin Cristo chu tiku kanajlakgo nachuna tlawamakgolh la amakgapitsi latamanin. Wa xlakata obispo kgalhskininalh: «¿Tiku namakatsininan xlakata Tamapakgsin?».

Obispo ni xkatsi tiku tlan xtlawalh uma taskujut pero wi xatakgalhtin. Kʼartículo nema aku mima nakatsiyaw.

[Epígrafe xla página 6]

Xatlan tamakatsin wa lichuwinan xTamapakgsin Dios chu lakgtaxtut akxni kanajlanikan Jesucristo