?Wan mun yɛ be bo jasin fɛ’n niɔn?

‘Bé wá kɛ́n i mɛn wunmuan’n nun.’—MATIE 24:14.

ZOOVA i Lalofuɛ’m be su bo jasin fɛ’n mɛn wunmuan’n nun. Wafa nga be yo i sɔ liɛ’n sɔnnin. I wafa kun yɛle ndɛ mɔ be kan kle sran mun’n.

Be kan ndɛ kle sran mun. Kɛ nga Zezi nin i sɔnnzɔnfuɛ’m be fa yoli’n sa’n, Zoova i Lalofuɛ’m be ko to sran mun naan b’a kan jasin fɛ’n b’a kle be. (Lik 8:1; 10:1) Be minndɛman kɛ sran’m be bɔbɔ be wa to be. Ɲanmiɛn Sielɛ’n i jasin fɛ’n i bolɛ’n ti like mɔ Zoova i Lalofuɛ mɔ be ti sran miliɔn nso tra su’n be kwlaa be yo ɔ. Be bo jasin fɛ’n awloawlo’m be nun, ɔ nin akpɔ’m be nuan, ɔ nin telefɔnu nun yɛ be bo i wafa uflɛ wie mun ekun. Afuɛ ng’ɔ sinnin lɔ’n nun’n, Zoova i Lalofuɛ’m be fali dɔ akpi ngbinngbin kun nin sin be dili be junman sɔ’n.

Nán Ɲanmiɛn Sielɛ’n i su like ngunmin yɛ be kle sran mun ɔn, sanngɛ ‘like kwlaa nga [Zezi] kleli be’n,’ be fa kle sran mun wie. (Matie 28:20) Anglo kwlaa nun’n, be kle sran akpinngbin mɔcuɛ be Biblu’n nun like be awlo lɔ. Dein fiteman nun.

Zoova i Lalofuɛ’m be bo jasin fɛ’n mɛn wunmuan’n nun nvlenvle 236 nun. Be bo kle sran wafawafa kwlaa. Be bo jasin fɛ’n nanmue nin klɔ dandan’m be su. Maan ɔ yo Amlɛnkɛn’m be mɛn’n i ja ngua lɔ bo ble mɔ be flɛ i Amazɔni nun lɔ o, annzɛ Risi i lika nga be flɛ i Siberi nun lɔ o, annzɛ sran ble’m be mɛn’n i aawlɛ flɛnnɛn’m be nun o, annzɛ kusu Sinua’m be bue liɛ su lɔ okaoka nga be flɛ be Imalaya be nun o, be bo jasin fɛ’n. Be tuaman be kalɛ. Be fa be bɔbɔ be sika’n nin be blɛ’n yɛ be di junman sɔ’n niɔn. Ɲanmiɛn nin be wiengu mɔ be klo be’n ti yɛ be yo sɔ ɔ. Asa ekun’n be yi fluwa be fa bo jasin fɛ’n.

Fluwa mun. Fluwa ng’ɔ o yɛ mɔ i dunman’n yɛle Sasafuɛ Tranwlɛ’n bo Zoova i Sielɛ Blɛ’n i jɔ, dɔ nga su’n be yi i aniɛnaniɛn 185 nun. Yɛ nga be yi i anglo kwlaa nun’n, ɔ ti akpinngbin ko ju 42. Fluwa Réveillez-vous ! m’ɔ bo Sielɛ’n i jɔ wie’n, be yi i aniɛn 83 nun, yɛ ng’ɔ fite anglo kwlaa nun’n ɔ tra akpinngbin 40.

Fluwa dandan nin blosili nin fluwa nɲa mun yɛ CD/MP3, ɔ nin DVD nga be yiyi Biblu’n nun’n be yili be aniɛnaniɛn 540 nun. Afuɛ blu kun nga be sinnin lɛ nun’n, Zoova i Lalofuɛ’m be yili ninnge sɔ mun akpi ngbinngbin 20 yɛ be fa manmannin sran mun. Ɔ ti kɛ nn sran nga be o asiɛ’n su’n be tinuntinun be ɲannin nsan sa!

Zoova i Lalofuɛ’m be yili Biblu mun wie, yɛ be yoli maan sran’m be yili Biblu fanunfanun. Zoova i Lalofuɛ’m be yi Biblu Les Saintes Écritures — Traduction du monde nouveau aniɛnaniɛn’m be nun’n yɛ be fa manman sran mun. Dɔ nga su’n be kwla ɲan Biblu sɔ’n i bue annzɛ i wunmuan’n aniɛnaniɛn 96 nun. Nga b’a fa manman sran mun’n, ɔ tra akpinngbin 166. Zoova i Lalofuɛ’m be kan Sielɛ’n i jasin fɛ’n be aɲia’m be bo wie.

Aɲia’m be bo. Le mɔcuɛ kwlaa nun’n, Zoova i Lalofuɛ’m be yia be Ɲanmiɛn Sielɛ sua’m be  nun. Aɲia sɔ’m be bo’n, nán Ɲanmiɛn ndɛ kanlɛ ngbɛn yɛ be kan ɔn. Be kle sran’m be ngwlɛlɛ wie. Be jran Biblu’n su be yiyi ndɛ wie’m be nun. Yɛ be fa Sasafuɛ Tranwlɛ’n ɔ nin Biblu’n i akua uflɛ wie mun ekun be fa suan Biblu’n nun like. Be suan wafa nga be kwla si jasin fɛ’n i bo kpa’n aɲia sɔ’m be bo wie.

Zoova i Lalofuɛ’m be suan like kunngba’n be asɔnun 107.000 tra su be nun asiɛ wunmuan’n su. I sɔ’n yo maan be bo yo kun. Sran ngba kwla kɔ aɲia sɔ’m be bo. Be deman sika lɔ. I yo, sɛ ɔ ti kɛ Zoova i Lalofuɛ’m be nantiman like nga be kle’n su’n, nn i kwlaa nga be yo i lɛ’n ɔ ti ngbɛn. Ɔ maan be mian be ɲin naan sran’m b’a bu jasin fɛ’n i like kpa.

Be aeliɛ’n. Be mian be ɲin naan be aeliɛ’n yo kpa kɛ Klist liɛ’n sa. I sɔ’n ti’n, like kunngba nga be klo kɛ sran yo man be’n yɛ be mian be ɲin be yo man be wiengu ɔ. (Matie 7:12) Kannzɛ fɔ o be nun naan ɔ ju blɛ wie be fɔn’n, sanngɛ be klo kpa kɛ be nin sran kwlaa trán klolɛ su. I sɔ’n nun’n, nán jasin fɛ’n i ngunmin yɛ be bo kle sran mun ɔn, sanngɛ sɛ be kwla uka be wafa uflɛ’n, be uka be.

Zoova i Lalofuɛ’m b’a seman kɛ bé yó naan asiɛ’n su sran’m be kwlaa be kaci Zoova i Lalofuɛ wie. Sanngɛ, kɛ be ko di junman sɔ’n lele ko ju kan nga Zoova klo’n, mɛn’n i awieliɛ’n jú, kɛ nga Zezi fa kannin’n sa. ?Blɛ sɔ’n nun’n, ngue sa yɛ ɔ́ jú asiɛ’n nin i su sran’m be su ɔ?

[Foto, bue 7]

Zoova i Lalofuɛ’m be su bo jasin fɛ’n asiɛ wunmuan’n su.