Nutaarsiassaq nuannersoq kikkunnit oqaluussissutigineqarpa?

“ . . . silarsuarmi tamarmi oqaluussissutigineqassaaq.” — MATTHÆUSI 24:14.

NUTAARSIASSAQ nuannersoq silarsuaq tamakkerlugu Jehovap Nalunaajaasuinit oqaluussissutigineqarpoq. Assigiinngitsutigut taamaaliorput. Ilaatigut ima:

Oqalunnikkut. Jiisusip ajoqersugaasalu iliortarnerattut Jehovap Nalunaajaasui inunnut orniguttarput nutaarsiassamik nuannersumik oqaluttuunniarlugit. (Lukasi 8:1, 2; 10:1) Inunnit orninneqarnissartik naatsorsuutigiinnartanngilaat. Guutip naalagaaffia pillugu inunnut oqaluussineq Jehovap Nalunaajaasuisa — maanna 7 millioninit amerlanerusut — tamarmik peqataaffigaat. Illumiit illumut, aqqusinerni, oqarasuaatikkut allatigullu oqaluussisarput. Siorna Jehovap Nalunaajaasuisa oqaluussinermi nalunaaquttap-akunneri 1,5 milliardinit amerlanerusut atorpaat.

Guutip naalagaaffia allanut oqaluttuariinnarnagu, aammali Jiisusip ‘peqqussutai tamaasa’ ilinniartitsissutigisarpaat. (Matthæusi 28:20) Akeqanngitsumik 8 millioninit amerlanerusunik Biibilimik atuaqqissaaqateqartarput.

Jehovap Nalunaajaasui silarsuaq tamakkerlugu — nunani 236-ni — oqaluussisarput. Inuiaqatigiinni qanorluunniit inissisimaffillit oqaluussifigisarpaat, asimi illoqarfinnilu, Amazonimi kiattup orpippassuini Sibiriallu tajgaani, Afrikap inoqajuitsuini Himalayallu qaqqarsuini. Taamatut sulinertik akissarsissutigineq ajorpaat; aningaasartuutitik namminneq akilertarpaat. Guutimut tullerminnullu asanninnertik kajumississutigalugu sunngiffimminni taamaaliortarput. Aamma nutaarsiassaq nuannersoq ilisimaneqalersittarpaat uku atorlugit:

Atuagassiat, tusarnaagassiat isiginnaagassiallu. Atuagassiaq una, Napasuliaq Alapernaarsuiffik — Jehovap naalagaaffianik tusarliussisoq-mik taaguutilik, maanna oqaatsini 185-ini saqqummersarpoq 42 millioninillu amerlanerusunngorlugu naqiterneqartarluni. Atuagassiaqataa, Vågn op!, aamma naalagaaffimmik tusarliussisuusoq oqaatsini 83-ini saqqummersarpoq naqiterneqartarlunilu 40 millionit missiliorlugit.

Atuakkat, atuagassiaaqqat, naqitaaqqat, CD-t/MP3-t aamma DVD-t Biibilimi ajoqersuutigineqartut nassuiaataannik imallit maanna oqaatsini 540-t missaanni pineqarsinnaapput. Ukiut qulit kingulliit ingerlanerinnaanni Jehovap Nalunaajaasuisa Biibililersaarutiliatik 20 milliardinit amerlanerusut agguaappaat — nunarsuaq tamakkerlugu inummut ataatsimut agguaqatigiissillugu pingasut!

Aamma Jehovap Nalunaajaasuisa Biibilimik nutsikkat assigiinngitsut naqitertarpaat naqiterissussisarlutillu. Biibilimik nutsigaq Ny Verden-Oversættelsen af De Hellige Skrifter — Jehovap Nalunaajaasuinit nutsigaasoq, naqitigaasoq agguaanneqartartorlu — maanna tamarmi ilaannaaluunniit oqaatsini 96-ini pineqarsinnaavoq. 166 millioninit amerlanerusut agguaanneqareerput.  Aamma Nalunaajaasut Naalagaaffimmik nutaarsiassaq nuannersoq oqaluussissutigaat ukunani:

Kristumiut ataatsimiinnerini. Sapaatit-akunneri tamaasa Jehovap Nalunaajaasuisa naalagaaffilersaarfimminni ataatsimiittarneri naalagiarnerinnaanngillat; ataatsimiinnerni ilinniartitaaneq pingaartinneqarpoq. Biibilimut tunngasunik oqalugiaateqartarpoq atuagassiarlu Napasuliaq Alapernaarsuiffik atuagassiallu allat atorlugit Biibilimik atuaqqissaartoqartarluni. Aammattaaq ataatsimiinnerni taakkunani Nalunaajaasut nutaarsiassamik nuannersumik oqaluussillaqqinneruneq ilinniartarpaat.

Nalunaajaasut silarsuarmi sumi tamaniittut ilagiinni 107.000-init amerlanerusuni atuaqqissaaqatigiissutigisartagaat assigiipput, tamannalu ataasiussuseqarnerulissutigaat. Ataatsimiinnerit taakku tamanut ammapput. Aningaasanik katersisoqarneq ajorpoq. Soorunami tamakku tamarmik iluaqutaanavianngillat Nalunaajaasut oqaluussissutigisatik namminneq maleruanngippatigik. Taamaattumik nutaarsiassaq nuannersoq allanut ima kajumississutiginiartarpaat:

Maligassiuinermikkut. Kristumiutut pissusilersornermikkut maligassiuilluarniarsaripput sapinngisaminnillu allanit iliorfiginnikkusunnermissut allat iliorfiginiartarlugit. (Matthæusi 7:12) Naammalluinnanngitsuugaluarlutik kukkusaraluarlutillu inunnut tamanut asannittuliorniarsaripput, nutaarsiassamik nuannersumik oqaluttuutiinnarnagit, aammali ajornanngikkaangat allatigut ikiuinermikkut.

Jehovap Nalunaajaasuisa oqaluussinermikkut inuit tamaasa ilasiartaariniarsarinngilaat. Jiisusilli siulittuineratut Jehovap kissaatigisaatut annertutigisumik oqaluussisoqareerpat naggatissaq nalliutissaaq. Tamanna nunarsuarmut tassanilu najugaqartunut qanoq sunniuteqassava?

[Qupp. 7-mi assiliartaq]

Nutaarsiassaq nuannersoq Jehovap Nalunaajaasuinit silarsuarmi tamarmi oqaluussissutigineqarpoq