Chanchin Ṭha Chu Tute’n Nge Hril?

“ . . . khawvêl zawng zawngah hrilhin a awm ang.”—MATTHAIA 24:14.

JEHOVA Thuhretute chuan chanchin ṭha chu khawvêl pum puiah kawng hrang hrangin  an hril a. An hrilh dân kawng khat chu hei hi a ni—

Ṭawngkam Hmangin. Isua leh a hnungzuitute angin, Jehova Thuhretute chuan mite hnênah chanchin ṭha an thlen a. (Luka 8:1; 10:1) Mite’n anmahni an va pan an beisei lo. Mite hnêna Pathian Ram chanchin hrilh chu tûna maktaduai sarih chuang tawh Thuhretu zawng zawngte thawh ṭhin a ni a. In tinah leh kawtthlêrah te thu an hril a, telephone leh kawng dang dangte hmangin an hril bawk ṭhîn. Ni kum khân, Thuhretute chuan hetiang kawnga thu hrilh nân dârkâr tlûklehdingâwn khat leh a chanve lai an hmang a ni.

Anni chuan mi dangte chu Pathian Ram chanchin mai bâkah, Isua ‘thupêk zawng zawng’ pawh an zirtîr a. (Matthaia 28:20) A thlâwna in lama Bible zirna maktaduai riat chuang lai an kaihruai reng a ni.

Thuhretute chuan khawvêl hmun tin, ram 236 laiah thu an hril a. Mi chi tinrêngte hnênah an hril a ni. Thingtlângah leh khawpuiah te, Amazon leh Siberia ram ngawa chêngte hnênah te, Africa thlalêr leh Himalaya Tlâng ramah te thu an hril a ni. Anni chuan hlawh an nei lo va; Pathian leh vêngte hmangaihna avângin mahni hun leh sum sêngin an thawk a ni. Tin, chanchin ṭha chu kawng dang pawhin an hriattîr bawk—

Lehkhabute Hmangin. He magazine, a hming pum Vênnainsâng Jehova Lalram Puanchhuahna tih hi tûnah chuan ṭawng 185-a hmu theih a ni tawh a, a chhuak apiang chu bu maktaduai 42 chuang lai chhut chhuah a ni. A kawppui Awake! magazine pawhin Lalram chungchâng a tlângaupui a, ṭawng 83-in a chhuak apiang chu bu maktaduai 40 vêl chhut chhuah a ni bawk.

Bible zirtîrna hrilhfiahtu lehkhabu te, brochure te, tract te, CD leh MP3 te, leh DVD-te chu ṭawng 540 laia hmuh theih a ni a. Thuhretute chuan kum sâwm kalta chhûng khân hêngte hi tlûklehdingâwn 20 chuang lai siamin an sem chhuak a, leia mihring awm tawh phawt chuan chawhrualin pathum zêl an nei thei tihna a nih chu!

Jehova Thuhretute chuan Bible lehlin chi hrang hrang chu an chhu chhuak emaw, mi dang an chhuttîr emaw a. Jehova Thuhretute lehlin, chhut chhuah, leh sem chhuah, New World Translation of the Holy Scriptures chu tûnah hian a bu pum emaw, a ṭhen lai emawin ṭawng chi hrang 96 laia hmuh theih a ni tawh a. Copy maktaduai 166 chuang lai sem chhuah a ni tawh bawk. Thuhretute chuan Lalram chanchin ṭha chu hetiang kawng hian an hriattîr bawk—

Kristian Inkhâwmnaah. Tualchhûng Kingdom  Hall-a chawlhkâr tin inkhâwm kan neihte hi sakhaw inkhâwmna satliah mai a ni lo; mi zirtîr thei tak ni tûra duan a ni. Bible kaihhnawih thusawite neih a ni a, Vênnainsâng magazine leh thu leh hla chhuah dangte ṭanchhanin Bible zirna neih a ni bawk. Inkhâwmnaah chuan Thuhretute chuan chanchin ṭha hriltu thiam lehzual nih theih dân an zir bawk.

Thuhretute chuan khawvêl puma kohhran 1,07,000 aia tamah thu thuhmun an zir a, chu chu an inpumkhatna belhchhahtu a ni. Chûng an inkhâwmte chu vântlâng tâna hawn a ni a. Thawhlâwm khawn a ni ngai lo. Mahse, Thuhretute’n an thu hrilh nunpui lo sela chuan hêng zawng zawng hian awmzia a nei tam lo hle ang. Chuvângin, hetiang kawng hian chanchin ṭha chu chawimawi an tum a ni—

Mi Mala Entawn Tûr Siamin. Anni chuan Kristian nungchang lamah entawn tûr nih an tum tlat a, mi dangin anmahni cheibâwl se an duh tûr ang taka mi dangte cheibâwl chu an tum hrâm hrâm a ni. (Matthaia 7:12) Ṭha famkim an nih loh avângin tlin loh châng nei ṭhîn mah se, mi dangte hnêna chanchin ṭha hrilhna mai ni lo, a theih hun apianga ṭanpuina pein hmangaihna nei taka thiltih chu an duh tak zet a ni.

Jehova Thuhretute chuan an thu hrilhna hmanga khawvêl thlâk danglam chu an tum lo. Chutih a hnêkin, chu an rawngbâwlna chu Jehova lungâwi thlenga an thawh hnuah, Isua sawi angin tâwpna chu a lo thleng zâwk ang. Chu tâwpna chuan leilung leh a chhûnga chêngte tân eng awmzia nge a neih dâwn? (w11-E 03/01)

[Phêk 7-naa milem]

Jehova Thuhretute chuan chanchin ṭha chu khawvêl pumah an hril