Ovalie Vekahi Nokuivisa Onondaka Onongwa?

“ . . . mambukaiviswa kombanda yoohi aiho.”—MATEUS 24:14.

ONONDAKA onongwa mbukahi nokuiviswa mouye auho no Nombangi mba Jeova. Vetyilinga mononkhalelo mbelikalaila. Onkhalelo imwe omo . . .

Kupopia Ondaka. Nga Jesus novalongwa vae, Onombangi mba Jeova vatuaila ovanthu onondaka onongwa. (Lucas 8:1; 10:1) Kavakevela ovanthu veye kuvo. Onombangi aveho valamba po 7000 000, vekahi nokupopila ovanthu konthele Youhamba wa Huku. Vaivisa umbo-na-umbo, momatapalo, no kotelefone no mononkhalelo onokhuavo. Menima liokualamba, valinga onoola mbalamba pombiliau notyihupe movilinga ovio.

Kavalongesa vala vakuavo konthele Youhamba wa Huku, mahi tupu valongesa “ovipuka aviho [Jesus] atuma.” (Mateus 28:20) Apeho valongesa otyali ovanthu valamba po 8 yonomiliau momaumbo avo Ombimbiliya.

Onombangi mba Jeova vekahi nokuivisa ouye auho—movilongo 236. Vaivisa kovanthu vononkhalelo ambuho mbomuenyo. Vekahi nokuivisa movilongo no momapundaumbo, no monohika mbo Amazona no Siberia, no mbo Afilika, no Konomphunda mbo Himalaya. Kavafetwa tyina valinga otyilinga otyo, valia konombongo mbavo muene, nokuundapesa omuwo wavo, mokonda yohole vena na Huku novanthu. Tupu vaivisa onondaka onongwa . . .

Nomikanda Valinga. Omukanda ou wosapi yati Omutala Womulavi Wivisa Ouhamba wa Huku, pahe ukahi nokulingwa momalaka 185, iya kese tyikando ulingwa tyilamba po 42 yonomiliau. Ulandulwa no Despertai! tupu ipopia konthele Youhamba wa Huku, ilingwa momalaka 83, momuvalu ulamba po 40 yonomiliau kese tyikando.

Valinga omikanda, no ombrochula, no no tratadu, no CDs/MP3s, no no DVDs mbuhangununa omalongeso Ombimbiliya momalaka alamba po 540. Onombangi mba Jeova valinga nokuaava tyilamba po 20 mbiliau yomikanda ovio, mokueenda kuomanima ekwi okualamba. Omikanda ovio vituuka okuviyapula vitatu-vitatu pala kese munthu kombanda yoohi!

Onombangi mba Jeova tupu valinga ono Mbimbiliya ononyingi. Ombimbiliya Tradução do Novo Mundo das Escrituras Sagradas yapitiyua, nokualingwa, nokuaawa no Nombangi mba Jeova, pahe ilingwa momalaka 96 aiho ine otyinthimbu tyayo. Kuaawa Onombimbiliya mbalamba po 166 yonomiliau. Tupu Onombangi vaivisa onondaka onongwa Mbouhamba wa Huku mo  . . .

Maliongiyo Ovakristau. Omaliongiyo alingilwa mo Nondyuo mbo Maliongiyo kese simano, opala okufenda nokulilongesa. Valinga  omalongomona apolwa Mombimbiliya, nokulilongesa Ombimbiliya nombatelo Yomutala Womulavi, nomikanda omikuavo. Tupu, momaliongiyo oo, Onombangi mba Jeova velilongesa ounongo wokuivisa onondaka onongwa.

Onombangi ouye auho, velilongesa omikanda vielifwa momawaneno alamba po 107.000, otyo tyivewaneka kumwe. Omaliongiyo oo, opala ovanthu aveho. Kamuitwa onombongo. Tyotyili, ovilinga ovio ñgeno vitupu esilivilo, inkha Onombangi kavaendela muetyi vekahi nokuivisa. Anthi, vaivisa onondaka onongwa mokuava . . .

Ongeleka Ongwa. Valinga ononkhono mbokukala novituwa oviwa vio Vakristau, okulinga nawa vakuavo ngetyi ovo vahanda okulingwa. (Mateus 7:12) Namphila ovakuankhali pamwe valinga oviponyo, mahi vahanda okulinga nawa ovanthu aveho, ha kuvepopila vala onondaka onongwa, mahi tupu nokuvekuatesako tyina tyitavela.

Onombangi mba Jeova kavakevela ouye auho utavele etyi vekahi nokuivisa. Anthi, tyina ovilinga viamalingwa ngetyi Jeova ahanda, onthyulilo maiya, ngetyi Jesus apopile. Otyo matyikakalesa oñgeni oohi novanthu vekahimo?

[Olutalatu pefo 7]

Onondaka onongwa mbukahi nokuiviswa no Nombangi mba Jeova ouye auho