¿Pikunataq alli willakïta musyatsikïkäyan?

“Jinantin nasioncunacho[mi] [...] musya[yänan].” (MATEO 24:14.)

JEHOVÄPA testïgonkunaqa hinantin Patsachömi alli willakïkunata musyatsikïkäyan. Y tukïnöpam rurayan.

Kikin nunakunatam willayan. Jehoväpa testïgonkunaqa, Jesuswan qateqninkuna rurayanqannöllam nuna mayinkunata alli willakïkunata musyatsiyan (Lucas 8:1; 10:1). Pëkunaqa manam kikin nunakuna ashiyänantatsu shuyäyan. Antis qanchis millonpitapis masnam kayan y llapanmi punkun punkun, cällekunachö, telëfonopa y tukïnöpa Diospa Gobiernompita willakuyänan. Qanyan watallaran huk waranqa pitsqa pachak millonpitapis más hörakuna yachatsikurnin kayashqa.

Y manam Diospa Gobiernonllapitatsu yachatsikuyan, hina Jesus “llapan yachatsi[cunqantapis]” musyatsikïkäyanmi (Mateo 28:20). Hinamampis, debaldillam puwaq millonpitapis más nunakunata wayinkunachö Bibliapita yachëkätsiyan.

Jehoväpa testïgonkunaqa 236 nacionkunachö y markakunachömi alli willakïta musyatsikïkäyan. Më tsëchömi tukï rikoq nunakunawan parlayan: yachatsikuyanmi chakrakunachö y callekunachö; Amazonas nishqan selvakunachö y Siberia nacionpa selvankunachö; Africapa desiertonkunachö y Himalaya nishqan raju kinrëkunachö. Manam ni mëqan huk solta ganantsu; antis tiemponkunata y tariyanqankunatam rakiyan tsëta rurayänampaq. ¿Imanirtaq tsëta rurayan? Diosta y nuna mayinkunata kuyarninmi.

Tukïläya librokunawan y revistakunawan. Täpakoq. Jehová Diospa Gobiernompita Willakoq nishqam revistaqa cada yarqamurmi 42 millonpita más rurakämun y 185 idiömakunachömi yarqamun. Hina ¡Despertad! revistapis cada yarqamurmi 40 millonnö rurakämun y 83 idiömakunachömi yarqamun.

Hinamampis, nunakunata Bibliapita yachatsiyänanrëkurmi Jehoväpa Testïgonkunaqa 540 idiömakunachö librokunata, follëtokunata, tratädokunata y DVD, CD y MP3 nishqankunata horqayämushqa. Tsëkunataqa 20 mil millonpita mastam pasaq chunka watakunachö qarakuyashqa, tsëqa imëka  Patsachö llapan nunakunata cada ünota kimata qoshqa cuentam.

Hina Jehoväpa Testïgonkunaqa tukï traducción Bibliakunatam imprimiyämushqa o imprimitsikayämushqa. Kikinkuna traduciyanqan, imprimiyanqan y qarakuyanqan Traducción del Nuevo Mundo de las Santas Escrituras nishqan Bibliankunaqa, llapan o pullan kaqlla karpis, 96 idiömakunachömi yarqamushqa. Kanan witsanyaqqa nunakunata qarayashqa 166 millontanam.

Ellukäyanqankunachö o gorikäyanqankunachö. Jehoväpa testïgonkunaqa llapan semänakunam Yachatsikuyänan Wayichö ëllukäyan. Tsëmanqa manam cantaqllatsu ni mañakoqllatsu ëwayan, sinöqa, Bibliapita yachakoqmi. Tsëchömi Bibliapita tukï discursokunachö yachatsikuyanqanta wiyakuyan, y Bibliawanmi Täpakoq revistapita o huk publicacionkunapita yachakuyan. Hina tsë reunionkunachömi yachakuyan nunakunata alli willakïkunata imanö yachatsiyänampaqpis.

Hinantin Patsachöqa 107 milpita masmi kan congregacionkuna, y llapanchömi huk yachatsikïllata estudiayan, tsënöpam llapankuna huk yarpëyoqlla kayan. Pï më munaq kaqmi tsë reunionkunaman ëwëta puëdeyan y manam qellëta mañakuyantsu. Tsënö karpis, tsëkunata rurayanqankunaqa manachi imapaqpis servinmantsu yachatsikuyanqannö mana kawayaptinqa.

Rurëninkunawan. Jehoväpa testïgonkunaqa rasumpa cristiänonö kawëtam tïrayan, y imanöpis tratayänanta munayanqannöllam nuna mayinkunatapis tratayan (Mateo 7:12). Hutsasapam kayan y höraqa pantarmi llutanta rurayan, tsënö karpis, nuna mayinkunata allita rurayänampaqmi kallpachakuyan. Tsëmi alli willakïkunata nuna mayinkunaman chätsiyan y wanaq kaqkunata yanapayan.

Jehoväpa testïgonkunaqa manam llapan nunakuna Testigo tikrayänanrëkurtsu yachatsikuyan. Musyayanmi Jehová ninqanyaqlla yachatsikuyänampaq kaqta, y nïkurqa Mateo 24:14 texto ninqannöpis “patsapa ushenin chä[munampaq]” kaqta. Pero ¿ima ninantataq “patsapa ushenin” nirqan Jesus?

[6 kaq päginachö dibüju]

Jehoväpa testïgonkunaqa hinantin Patsachömi alli willakïkunata musyatsikïkäyan