Suma e preiki a bun nyunsu?

„ . . . o preiki na heri grontapu.”​—MATEYUS 24:14.

YEHOVAH KOTOIGI e preiki a bun nyunsu na heri grontapu. Den e du a wroko disi na difrenti fasi. Luku wan fasi fa den e du dati.

Den e fruteri sma a bun nyunsu. Neleki Yesus nanga den disipel fu en, Yehovah Kotoigi e go na sma fu fruteri den a bun nyunsu (Lukas 8:1; 10:1). Den no e fruwakti taki sma o kon na den. Ala den moro leki seibi milyun Kotoigi e teki prati na a wroko fu preiki fu Gado Kownukondre. Den e preiki oso fu oso, na strati, nanga yepi fu telefon èn na tra fasi. A yari di pasa, den Kotoigi preiki moro leki wán nanga afu milyard yuru.

Den no e leri trawan nomo fu Gado Kownukondre, ma sosrefi fu „ala san [Yesus] komanderi” (Mateyus 28:20). Den e hori moro leki aiti milyun oso Bijbelstudie sondro taki sma abi fu pai gi dati.

Den Kotoigi e preiki na heri grontapu na ini 236 kondre. Den e preiki gi ala sortu sma. Den e preiki na boitipresi èn na foto, na ini a bigi Amasone busi èn na ini a busi fu a kowru Siberia, na den drei sabana fu Afrika èn na den hei Himalaya Bergi. Den no e kisi pai fu a wroko disi. Den srefi e pai den kostu fu du a wroko disi èn den e gebroiki den ten fu di den lobi Gado nanga tra sma. Wan tra fasi de tu fa den e preiki a bun nyunsu.

Den e druk publikâsi. A tijdschrift disi, di nen A Waktitoren, A e taki fu Yehovah Kownukondre e kon na doro now na ini 185 tongo èn moro leki 42 milyun fu ibriwan fu den e meki. A tijdschrift Ontwaakt!, di e taki tu fu a Kownukondre e kon na doro na ini 83 tongo èn sowan 40 milyun fu a tijdschrift disi e prati.

Buku, brochure, traktaat, CD, MP3, nanga DVD de di e fruklari Bijbel leri èn den de fu feni na ini sowan 540 tongo. Na ini den tin yari di pasa, den Kotoigi meki èn prati moro leki 20 milyard fu den sani disi. Disi wani taki dati ibri sma na grontapu e kisi sowan dri fu den sani disi!

Yehovah Kotoigi ben druk noso den ben meki sma druk Bijbel na ini difrenti tongo. A heri Nyun-Grontapuvertaling fu den Santa Buku fu Bijbel noso pisi fu en, di Kotoigi vertaal, druk èn prati, de fu feni now na ini 96 tongo. Moro leki 166 milyun fu den Bijbel disi prati. Den Kotoigi e fruteri sma a bun nyunsu fu a Kownukondre na wan tra fasi tu.

Na den Kresten konmakandra. Den konmakandra di e hori ibri wiki na den Kownukondre zaal, a no fu singi nanga begi nomo, ma na fu gi sma leri. Den e hori lezing fu tori di teki puru fu Bijbel èn den e studeri Bijbel nanga yepi fu a tijdschrift A Waktitoren, nanga tra publikâsi. Na den konmakandra, den Kotoigi e leri fa fu tron moro bun preikiman fu a bun nyunsu.

Den Kotoigi e studeri a srefi sani na ini den  moro leki 107.000 gemeente na heri grontapu èn disi e yepi den fu tan na ini wánfasi. Ala sma kan kon na den konmakandra disi èn den no e piki moni. A no de fu taki dati ala den sani disi ben o de fu soso efu den Kotoigi no ben du san den e preiki. Fu dati ede den e preiki a bun nyunsu na ete wan tra fasi.

Den e gi wan bun eksempre. Den e pruberi fu tyari densrefi leki trutru Kresten èn den e du muiti fu handri nanga trawan soleki fa den wani taki trawan handri nanga den (Mateyus 7:12). Aladi den na sondusma èn den e meki fowtu son leisi, toku den wani handri na wan lobi-ati fasi nanga ala sma. Den no e du dati te den e preiki a bun nyunsu nomo, ma den e yepi sma na tra fasi tu efu den man.

Yehovah Kotoigi no e du a preikiwroko fu di den e pruberi fu meki ala sma na grontapu drai den libi. Na presi fu dati, te Yehovah feni taki a wroko dati du nofo, dan a kaba o kon soleki fa Yesus ben taki. San o pasa nanga grontapu èn nanga den sma di e libi na tapu?

[Prenki na tapu bladzijde 7]

Yehovah Kotoigi e preiki a bun nyunsu na heri grontapu