Sé mak haklaken lia-foun diʼak?

“ . . . ema sei haklaken iha mundu tomak.”—MATEUS 24:14.

IHA mundu tomak Testemuña ba Jeová haklaken lia-foun diʼak. Sira halo ida-neʼe iha dalan oioin. Dalan ida mak hodi . . .

Koʼalia ba ema. Hanesan Jesus no ninia dixípulu sira, Testemuña ba Jeová bá vizita ema atu koʼalia kona-ba lia-foun diʼak. (Lucas 8:1; 10:1) Sira la hein ema atu hakbesik ba sira. Testemuña ba Jeová hotu, hamutuk naʼin-7.000.000 liu, haklaken ba ema kona-ba Maromak nia ukun. Sira haklaken husi uma ba uma, iha dalan, liuhusi telefone, no dalan seluk tan. Iha tinan kotuk, Testemuña sira uza oras 1.500.000.000 liu hodi halaʼo serbisu haklaken neʼe.

Sira hanorin ema laʼós deʼit kona-ba Maromak nia ukun maibé sira mós hanorin kona-ba “buat hotu neʼebé [Jesus] haruka” ba ninia dixípulu sira. (Mateus 28:20) Semana-semana sira halaʼo estudu Bíblia neʼebé la selu hamutuk 8.000.000 liu.

Testemuña sira haklaken iha mundu tomak, hamutuk rai 236. Sira hakaʼas an atu koʼalia ba ema hotu. Sira haklaken iha foho no sidade, iha ai-laran iha Amazonas iha rai-Brazíl, iha fatin malirin tebes iha Sibéria iha rai-Rúsia, rai-maran fuik iha rai-Áfrika no mós foho aas sira iha Himalaia iha rai-Nepál. Sira la manán osan atu halo serbisu neʼe. Tanba sira hadomi Maromak no ema seluk, sira uza sira-nia tempu no osan rasik atu halo ida-neʼe. Dalan ida seluk neʼebé sira fó sai lia-foun diʼak mak liuhusi . . .

Livru sira. Livru neʼebé ita lee daudauk iha títulu Livru Haklaken—Fó sai Maromak Jeová nia Ukun. Testemuña sira halo livru neʼe fulan-fulan hamutuk 42,000,000 liu iha língua 188. No sira mós halo livru Sedarlah! fulan-fulan hamutuk maizumenus 40,000,000 iha língua 83. Livru neʼe mós koʼalia kona-ba Maromak nia Ukun.

Ohin loron, ema bele hetan livru sira, CD, MP3 no DVD neʼebé esplika kona-ba buat neʼebé Bíblia hanorin iha maizumenus língua 540. Husi tinan sanulu liubá toʼo agora, Testemuña ba Jeová halo no fahe ona buat hirak-neʼe barak tebes toʼo 20.000.000.000 liu. Ida-neʼe katak se sira fahe buat sira-neʼe ba ema hotu-hotu iha mundu tomak, ema ida-idak bele simu maizumenus tolu!

Testemuña ba Jeová mós fahe Bíblia ba ema barak. Sira tradús, hasai no fahe New World Translation of the Holy Scriptures (Tradusaun Mundu Foun husi Eskritura Sagrada), neʼebé kompletu ka la kompletu iha língua 96. Toʼo agora sira fahe 166.000.000 liu. Sira mós iha lisensa atu hasai Bíblia husi tradusaun seluk. Testemuña sira mós fahe lia-foun diʼak kona-ba Maromak nia Ukun liuhusi . . .

Reuniaun kristaun sira. Reuniaun neʼebé sira halaʼo semana-semana iha sira-nia reuniaun fatin laʼós kanta no halo orasaun deʼit. Sira halaʼo reuniaun sira-neʼe atu hanorin ema. Sira neʼebé  tuir reuniaun sira-neʼe bele rona diskursu kona-ba Bíblia ho tema oioin, no sira mós estuda Bíblia hodi uza Livru Haklaken no livru sira seluk. Iha reuniaun sira-neʼe, Testemuña sira mós aprende oinsá atu haklaken lia-foun diʼak iha dalan neʼebé diʼak liután.

Testemuña sira iha kongregasaun hamutuk 107.000 liu. Sira estuda informasaun neʼebé hanesan iha mundu tomak, no ida-neʼe halo sira iha unidade. Ema hotu bele tuir reuniaun sira-neʼe no Testemuña sira la husu ezmola. Maski buat sira neʼebé temi iha leten mak diʼak, maibé se sira la moris tuir buat neʼebé sira haklaken, buat hotu neʼe sei sai saugati deʼit. Tan neʼe, sira fó laran-manas ba ema atu simu lia-foun diʼak liuhusi . . .

Sira-nia ezemplu diʼak. Sira hakaʼas an atu hatudu ezemplu diʼak nuʼudar ema kristaun liuhusi sira-nia hahalok, no sira halo ba ema seluk buat neʼebé sira hakarak ema atu halo ba sira. (Mateus 7:12) Maski sira mós sala-naʼin, sira hakarak tebes atu hatudu domin ba ema hotu, laʼós deʼit hodi koʼalia kona-ba lia-foun diʼak, maibé sira mós lolo liman hodi fó ajuda ba ema neʼebé iha susar laran.

Testemuña ba Jeová la hein katak hodi halo serbisu haklaken ema hotu sei troka sira-nia relijiaun. Maibé, bainhira sira halo hotu serbisu neʼe tuir Maromak Jeová nia hakarak, buat hotu nia rohan sei toʼo mai, hanesan Jesus fó-hatene nanis. Kuandu buat hotu nia rohan toʼo mai, saida mak sei akontese ba ema no mundu neʼe?

[Dezeñu iha pájina 7]

Testemuña ba Jeová haklaken lia-foun diʼak iha mundu tomak