Mini’ e Piin ni Be Machibnag fare Thin nib Fel’?
Mini’ e Piin ni Be Machibnag fare Thin nib Fel’?
“ . . . bay ni machibnag u gubin yang u fayleng.”—MATTHEW 24:14, NW.
PI MICH ROK JEHOVAH e yad ma machibnag fare thin nib fel’ u ga’ngin yang e fayleng. Yad ma rin’ e re n’ey u boor e kanawo’. Reb e yad ma non ngak e girdi’.
Pi Mich Rok Jehovah e yad ma yan u mit e tabinaw i yan ngaur machibnaged fare thin nib fel’ ngak e girdi’ ni bod e n’en ni rin’ Jesus nge pi gachalpen. (Luke 8:1; 10:1) Gathi kemus ni yad ma sonnag e girdi’ ni nge yib ngorad. Ke pag medlip milyon e Pi Mich Rok Jehovah ni yad be machibnag murung’agen Gil’ilungun Got ngak e girdi’. Boor rogon e machib ni yad ma tay ni bod rogon e machib u mit e tabinaw, ngu kanawo’, ngu telefon. Fa binem e duw ma kar thognaged boor ko baley e bilyon e awa ni fan ko re maruwel ney.
Gathi kemus ni yad ma machibnag e girdi’ u murung’agen Gil’ilungun Got ya ku yad ma fil ngorad ni ‘nguur folgad u gubin e tin ni ka nog ngorad ni nguur rin’ed.’ (Matthew 28:20) Ke pag meruk e milyon e girdi’ ni yad be fil e Bible ngorad e chiney.
Yad ma machib u ga’ngin yang e fayleng ni ke gaman 236 e nam e chiney. Yad ma machibnag e girdi’ nib thilthil rarogorad. Yad ma yan ko pi binaw ni demtrug ko buchuuw ara boor e girdi’ ni ma par riy ngaur machibnaged yad. Yad ma rin’ e re maruwel ney ndariy puluwon; yad ma fanay e tayim nge salpiy rorad ya ba t’uf Got nge girdi’ rorad. Maku yad ma fanay boch e babyor ni be weliy murung’agen e re thin nib fel’ ney.
Re ke babyor ney ni fithingan e Fare Wulyang ko Damit ni Be Weliy Morngaagen Gil’ilungun Jehovah, e kan ngongliy u 185 mit e thin ma ra reb e issue riy ma ke pag 42 milyon ken ni kan ngongliy. Ma fare babyor ni Awake! ni ku be weliy murung’agen Gil’ilungun Got e yima ngongliy u 83 mit e thin ma ra reb e issue riy ma sogonap’an 40 milyon ken ni kan ngongliy.
Pi babyor, nge brochure nge tract nge CD/MP3 nge DVD ni be weliy murung’agen e thin nu Bible e kan ngongliy u sogonap’an 540 mit e thin. Pi Mich Rok Jehovah e kar ngongliyed ma kar wereged boor ko 20 bilyon e pi n’ey u lan ragag e duw ni ke yan, ni sogonap’an nra be’ ma dalip ken e kan pi’ ngak.
Pi Mich Rok Jehovah e kar ngongliyed reb e Bible ma kun pi’ mat’awrad ni ngar ngongliyed boch e Bible. Fare Bible ni New World Translation of the Holy Scriptures ni Pi Mich Rok Jehovah e kar pilyeged, ma kar fal’eged ke yoor ken, ma kar wereged ko girdi’ e kan piliyeg u 96 mit e thin ni boch e ba polo’ ma boch e kemus ni bang riy. Ke pag 166 milyon urngin ken ni kan wereg. Pi Mich Rok Jehovah e yad ma weliy murung’agen Gil’ilungun Got u nap’an e muulung rorad.
Pi muulung ni yad ma tay u Kingdom Hall u gubin e wik e kan yarmiy ni fan e ngan skulnag e
girdi’. Yima pi’ e welthin ni bay rogon ko thin nu Bible, ma yima fanay e re ke babyor ney ni Fare Wulyang ko Damit nge boch e babyor u nap’an ni yira fil e Bible. Maku yima fil ngak e Pi Mich Rok Jehovah u nap’an e muulung rogon ni ngar salapgad i machibnag fare thin nib fel’.Taa ban’en e ma fil e Pi Mich Rok Jehovah u ga’ngin yang e fayleng ni ke pag 107,000 e ulung e chiney, ma re n’ey e ke ayuwegrad ni nge taareban’rad. Pi muulung ney e rayog ni nge un e girdi’ ngay ndariy puluwon. Machane ra aw nib m’ay fan urngin e pi n’ey ni faanra dab ra folgad ko pi n’en ni yad ma machibnag ngak e girdi’. Aram fan ni yad ma gay rogon ni nge m’ug ko ngongol rorad fare thin nib fel’ ni yad ma weliy ngak e girdi’.
Yad be athamgil ni ngar rin’ed e ngongol nib fel’ ngak e girdi’ ni ku ireray e ngongol ni yad baadag ni nge rin’ boch e girdi’ ngorad. (Matthew 7:12) Yugu aram ndawor ra flontgad ma yu ngiyal’ e ku yad ma oloboch, machane yad ma athamgil ni ngaur t’ufeged urngin e girdi’ ma gathi kemus ni yad ma weliy fare thin nib fel’ ngorad, ya ku yad ma pi’ e ayuw u rogon nrayog rorad.
Pi Mich Rok Jehovah e darur gayed rogon ni nge fol urngin e girdi’ ko machib ni yad ma tay. Ya nap’an nra mus rogon u wan’ Jehovah e re maruwel ney, ma aram e ngiyal’ ni nge yib e tomur nrogon ni yog Jesus. Nap’an nra yib e tomur, ma mang e ra buch ko re fayleng ney nge girdi’ riy?
[Picture on page 7]
Pi Mich Rok Jehovah e yad be machibnag fare thin nib fel’ u ga’ngin yang e fayleng