“Agikki Piny” Obedo Gin Ango?

“. . . ka dong lacen agikki piny bibino.”​—MATAYO 24:14.

IKARE ma cokcok-ki kiloko lok mapol i kom agikki me lobo-ni. Bukke, vidio, ki magajin, ma gikwako galowang kacel ki cayan, ginyutu yo mapat pat kit ma agikki piny bibino kwede. Yo magi aye tyeko lobo i lweny me nuclear, yokke pa asteroid, kwidi virus maraco, alokaloka me oro ki cwir, nyo jami ma gia ki i dan polo.

Ludini bene tamgi opokke woko; polgi gipwonyo ni “agikki piny” bityeko jami ma kwo ducu ma i lobo-ni. I lokke i kom Matayo 24:14, dano mo acel ma tye ka kwano lok me dini ocoyo lok magi: “Man tye tyeng acel i kin mogo ma pigi tego loyo i Lok pa Lubanga . . . Agikki ma tye ka bino-ni bigudo yalwak me karewa-ni i yo marac atika, pien jo manok i kinwa keken aye gitamo pi kit ma bibedo kwede.”

Tam ma kit meno keto cac pol kare i kom lok man ma pire tek-ki: Lubanga Jehovah omiyo lobo “ocung omoko matek kakare,” en “yam pe oketo lobo ci oweko woko kun onyobbe atata, en oketo ni dano twero bedo iye.” (Icaya 45:18) Pi meno, i kare ma Yecu oloko i kom “agikki piny,” en onongo pe tye ka wacci lobo [ngom] kibityekone woko; dok bene onongo pe tye ka wacci kibijwero dano ducu woko. En onongo tye ka lok i kom jo maraco​—ma gikwero kwo i yo ma rwatte ki tira ma Jehovah miyo​—en aye kibityekogi.

Tam kong lapor man. Go ni itye ki paco mo maleng adada ento imiyo ni dano gubed iye me nono. Jo mogo ma gibedo iye gikwo ki kuc i kingi dok gigwoko paco-ni maber. Ento mukene ticgi tye me kelo ayela keken, gilwenyo i kingi, dok bene giyeto luwotgi ma kitgi beco-ni. Gibalo jami ni dok gikwero winyo lokki kadi bed i temme me jukogi.

Ngo ma ibitimo me yubo jami ducu wek obed maber? Mono i bibalo paco-ni woko? Pe ibitimone. Ibiryemo jo ma kitgi raco  ma gibedo iye-ni woko ci iyubo jami ma guballe-ni.

Jehovah bene bitimo kit meno. En omiyo lacoc me Jabuli ocoyo ni: ‘Lutim tim maraco gibityekogi woko; ento jo ma gigeno Rwot [Jehovah] gibicamo lobo. Odong kare manok, ci dano ma kite rac dong bibedo pe matwal; kadi ingii i kabedone maber, ibinongo ni en dong pe kunnu. Ento jo mamwol aye gibicamo lobo; gibibedo ki yomcwiny pi kuc madwong ma gibilimo.’​—Jabuli 37:9-11.

Lakwena Petero bene oloko i kom gin acel-lu. Pi cwiny pa Lubanga, en ocoyo ni: “polo yam onongo obedo tye con, ki lobo bene ma giketo ki pii mua ki i pii, pi lok ma Lubanga oloko. Pii bene aye ma yam otyeko lobo me kare maca ka pii aluka ocorre omwonyo woko.” (2 Petero 3:5, 6) Lakwena Petero oloko kany i kom Pii Aluka me kare pa Nua ca. Dano ma kitgi raco ma onongo pe gilworo Lubanga-ni kityekogi woko, ento pe kityeko lobo [ngom]. Pii Aluka meno ma otyeko lobo-ni tye macalo lanen bot “jo ma pe bilworo Lubanga i kare me anyim.”​—2 Petero 2:6.

Petero omedo ni: “polo ki lobo me kare man dong gikano pi kuro mac.” Ka ni wagik kenyo, ci waromo bedo ki tam marac. Nge ni tyeng man medde kun wacci: “Ki tyeko dano ma pe gilworo Lubanga.” Man pe obedo tyeko lobo [ngom] ento jo ma pe gilworo Lubanga. Dong ngo ma lubo? Petero ocoyo ni: “Watye ka kuro polo manyen [Ker pa Lubanga ma Meciya aye Loyo] ki lobo manyen [dul dano ma kitgi atir], ka ma kit ma atir bedo iye.”—2 Petero 3:7, 13.

Lok pa lunebi me Baibul bene nyutu ni kare me “agikki piny” dong onyiko cok. Kwan Matayo 24:3-14 ki 2 Temceo 3:1-5 wek inen ni lanyut magi kara ada gitye. *

Mono itamo ni tye me ur pien lanywen mapol tye i kom Matayo 24:14, tyeng ma kadi wa latin matidi bene twero niang-ngi? Tye tyen lok mapol pi lanywen man. Catan oumo tam pa dano woko wek pe gunen ber pa ada ma tye i Lok pa Lubanga. (2 Jo Korint 4:4) Ki bene, Lubanga okano yubbe woko ki bot jo ma luwakke ento onyutugi bot jo mamwol. Pi tyen lok man Yecu owaco ni: “Apwoyi Wora, in Rwot [Jehovah] me polo ki me lobo, pien ikano lok magi woko ki bot luryeko ki lunge-piny, ci inyutogi bot litino lukere.” (Matayo 11:25) Pud dong tye me woro madit atika me bedo i kin jo mamwol ma giniang gin ma Ker pa Lubanga obedo dok ma gitye ka kuro mot ma Ker-ri bikelone pi jo ma gicwako!

[Lok ma tye piny]

[Cal ma tye i pot karatac 9]

Ker-ri bikelo “agikki piny” pa jami ducu maraco ma tye i lobo