?“Mɛn’n i awieliɛ’n” i bo’n yɛle benin?

“[...] I sin yɛ mɛn i awieliɛ’n ɔ́ jú-ɔ.”—MATIE 24:14.

KOKO nga nun’n, mɛn’n i awieliɛ’n i su ndɛ’n nga be kannin’n ɔ sɔnnin kpa. Be kan ɲrɛnnɛn sa nga be kwla yo naan mɛn’n w’a nunnun’n be ndɛ fluwa nin flimu fanunfanun wie’m be nun. Kɛ ɔ fɛ i fluwa nin flimu nga be fa yi aɲinsuɛ’n be su lele fa ju siansifuɛ’m be liɛ’m be su’n, be kan sa sɔ’m be ndɛ. Sa sɔ’m be wie yɛle bɔmbu tɛtɛ mɔ be kwla fa nunnun asiɛ’n, ɔ nin like kɛ nzraama sa m’ɔ nin asiɛ’n be kwla yia nun’n. Be wie ekun yɛle tukpacɛ tɛ m’ɔ kwla nunnun sran mun’n annzɛ ninnge kɛ lika m’ɔ lo kɔ i ɲrun’n annzɛ nzue dandan m’ɔ kwla tɔ saci asiɛ wunmuan’n. Annzɛ kusu ninnge wie mɔ be kwla fin lika uflɛ be wa di asiɛ wunmuan’n.

Ɲanmiɛn sulɛ wafawafa’m be kusu be ndɛ liɛ nga be kan’n ti fanunfanun wie. Be nun sunman be kle sran’m be kɛ, kɛ “mɛn i awieliɛ’n” ko ju’n, like fi su tranman lɛ kun. Ɲanmiɛn Ndɛ’n su like suanfuɛ kun kannin Matie 24:14 i ndɛ. Ɔ klɛli ndɛ sroesroe yɛ’n. I waan: “Ɲanmiɛn Ndɛ’n nun’n, ndɛ mma nga be ti cinnjin kpa’n be nun kun yɛle ngalɛ’n [...]. Nunnunlɛ nga be kwla nunnun e blɛ sufuɛ mun mlɔnmlɔn’n, i akunndan bulɛ’n ɔ kun e nun sunman e srɛ.”

Be nga be bu i sɔ akunndan’n, be ɲin kpa sa kun su. Yɛle kɛ Ɲanmiɛn Zoova yoli maan asiɛ’n “yoli cinnjinnjin.” W’a “yi-mɛn i ngbɛn, [sanngɛ] ɔ yili i kɛ be tran su.” (Ezai 45:18) Ɔ maan kɛ Zezi kannin “mɛn i awieliɛ’n” i ndɛ’n, w’a seman kɛ bé núnnún asiɛ bɔbɔ ba’n sekeseke. Kusu w’a seman kɛ bé núnnún klɔ sran’m be ngba. I waan klunwifuɛ mun yɛ bé núnnún be ɔ. Klunwifuɛ sɔ mun yɛle be nga be ɲinfu be kplinman su kɛ bé nánti atin nga klolɛ su Zoova kle be’n i su’n.

Maan e bu sunnzun ase nga i akunndan. Maan ɔ yo e kɛ e le sua klanman kun. Kpɛkun e man sran’m be atin kɛ be tran nun, naan nán maan be tannin i ti kalɛ. Be nga be tran nun’n, be nun wie’m be nin be wiengu’m be tran fɔundi nun, yɛ be nian sua’n i lika kpa. Sanngɛ wie’m be liɛ’n be ajuin yɛle ndɛnngan. Be nin be wiengu’m be di utre, kpɛkun be kle be nga be nian sua’n i lika’n be yalɛ. Be saci sua’n, kpɛkun kannzɛ bɔbɔ e jin be  su kɛ be yaci i sacilɛ’n, be kplinman su. Be te saci sua’n te kɔ.

?Ngue yɛ é yó ɔ? ?É búbú e sua’n? Cɛcɛ e su yoman sɔ. Like nga é yó’n yɛle kɛ é fúan be nga be saci sua’n, kpɛkun é síesíe i ye.

I sɔ kunngba’n yɛ Zoova wá yó ɔ. Ɔ yoli maan jue tofuɛ’n klɛli i kɛ: “Be nga be yo sa tɛ’n, bé kán be bo. Yɛ be nga be fa be wla gua Anannganman su’n, mɛn’n ɔ́ yó be liɛ. Ɔ ka kaan sa, be su wun-man klunwifuɛ’n kun. Sɛ a nian kan ɔ tran lɛ’n, a su wun-man sran. Yalɛfuɛ mun [wun ase kanfuɛ mun] yɛ mɛn’n ɔ́ wá yó be liɛ-ɔ. Be wun jɔ́ be kpa fɔuun!”—Jue Mun 37:9-11.

Akoto Piɛli kannin sa sɔ’n i ndɛ wie. Ɲanmiɛn maan ɔ klɛli i kɛ: “Lalafuɛ nun kɛ Nyanmiɛn kannin ndɛ kun’n, kpɛkuun asiɛ’n nin nyanmiɛn su lɔ’n be trannin lɛ. Asiɛ’n fin nzue’n nun yɛ ɔ fiteli-ɔ, ɔ o nzue i afiɛn. Yɛ nzue kunngba’n kusu, kɛ ɔ yi katali asiɛ’n su’n, ɔ nunnunnin laa mɛn liɛ’n.” (2 Piɛr 3:5, 6) Nzue dan ng’ɔ tɔli Nowe blɛ su’n, i ndɛ yɛ Piɛli kɛnnin i wa ɔ. Ɲanmiɛn nunnunnin sran nga be bumɛn i wie’n, sanngɛ asiɛ bɔbɔ ba’n kali lɛ. Ɲanmiɛn tɔli anannganman su nzue sɔ’n “fa kleli be nga be sro-mɛn i’n kɛ kɛ be liɛ’n ɔ́ wá yó sɔ-ɔ.”—2 Piɛr 2:6.

I sin Piɛli kan guali su kɛ: “Maan be sie nyanmiɛn su lɔ’n nin asiɛ nga be o lɛ ndɛ’n, be lɛ maan sin di be.” Sɛ ndɛ mma sɔ’n i bue ngalɛ’n ngunmin su yɛ e fa e ɲin e sie’n, é fɔ́n. Sanngɛ maan e sie i nzɔliɛ kɛ ndɛ mma’n kɛn i ekun kɛ: “Bé bú sran nga be sro-man Nyanmiɛn’n be fɔ [...] bé sáci be.” Ɔ maan nán asiɛ’n yɛ Ɲanmiɛn núnnún i ɔ, be nga be sroman Ɲanmiɛn’n yɛ ɔ́ núnnún be ɔ. ?Kɛ ɔ ko nunnun be’n, ngue sa yɛ ɔ́ bɛ́ i sin ɔn? Piɛli klɛli i kɛ: “Nyanmiɛn seli kɛ ɔ́ mán e nyanmiɛn su lɔ [Mɛsi i sielɛ blɛ’n] nin asiɛ uflɛ [sran kpa mun], lɔ yɛ be nga be yo sa kpa’n bé trán-an. I yɛ e su minndɛ i-ɔ.”—2 Piɛr 3:7, 13.

Kasiɛ nga Ɲanmiɛn boli be Biblu’n nun’n, be kle kɛ “mɛn i awieliɛ’n” w’a wie ju. An kanngan Matie 24:3-14 ɔ nin 2 Timote 3:1-5 be nun. Amún wá wún sa nga be kle kɛ mɛn’n i awieliɛ’n w’a mantan koko sakpa’n. *

Matie 24:14 i su ndɛ nga sran’m be kan’n, ɔ kwla sanngan sran akunndan. Kusu nn ba kanngan mun bɔbɔ’n be kwla wun i wlɛ. ?I sɔ liɛ’n boman e nuan? Sɛ ɔ bo e nuan’n ɔ ti su. Afin Satan sacili sran’m be akunndan’n naan b’a wunman ndɛ cinnjin nga be o Ɲanmiɛn Ndɛ’n nun’n be wlɛ. (2 Korɛntfuɛ Mun 4:4) Asa ekun’n, Ɲanmiɛn fali like nga i waan ɔ́ yó’n fiɛli i tutrefuɛ’m be wun. Sanngɛ ɔ yili i nglo kleli wun ase kanfuɛ mun. I su ndɛ nga Zezi kannin’n yɛ. I waan: “N Si, ɔ bɔ a ti nyanmiɛn su lɔ’n nin asiɛ’n be Min’n, kwla o, yɛlɛ kɛ a fa ninnge nga mun fiali ngwlɛlɛfuɛ nin be bɔ be si sa’n be wun, sanngɛ a yi be nglo kleli be bɔ be ti kɛ ba kanngan mun sa’n.” (Matie 11:25) Wun ase kanfuɛ’m be si Ɲanmiɛn Sielɛ’n i kpa. Yɛ suralɛ nga be kwlaa nga be suan Sielɛ sɔ’n i bo’n bé ɲɛ́n i’n, be ɲin kwla tran su wie. Sɛ e o i sɔfuɛ’m be nun wie’n nn nanwlɛ e le cenjele like dan kun!

[Ja ngua lɛ ndɛ’n]

[Foto, bue 9]

“Mɛn i awieliɛ’n” nun’n Ɲanmiɛn Sielɛ’n núnnún sa tɛ yolɛ’n kwlaa asiɛ’n su.