Met Weween ewe “Sopolon”?

“. . . iwe, a ina sopolon.”​—MATTU 24:14, TF.

A CHÖÜFETÄL chommong pworaus usun sopwoloon ei fönüfan. A sokkopat äweween me ren ekkewe puk me kachito, ekkoch leir mi atakirikiir nge ekkoch a longolong woon science. Me rer epwe fis pokiten maun woon kensi pakutang, faü föümmong seni läng epwe purei fönüfan, paiking mi efisi mälapalap, watteen siwilin weather, are än mönün lon space tööki fönüfan.

A pwal sokkopat ekiekin chon lamalam, chommong ra erä pwe ewe “sopolon” epwe amoielo mönümanau meinisin woon fönüfan. Iei alon emön sou käeö lamalam usun Mattu 24:14: “Ei wokisin eü me lein ekkewe wokisin lon Paipel a fokkun lamot . . . Aramas ikenäi ra sap ngeni eü fansoun ninni mi fokkun watte, nge äkkäemön chök ra anchangei met epwe fis lon na atun.”

Ekkena sokkun ekiek ra tunalo eü mettoch mi lamot: Jiowa Kot a “anüküchara” ewe fönüfan, ese “föri pwe epwe kotongau, nge a föri pwe lenien aramas.” (Aisea 45:18) Ina popun, lupwen Jises a fos usun ‘sopolon,’ esap weween nge ei fönüfan epwe talo are meinisin aramas repwe ninilo. A kapas usun ekkewe mi ngaw, iir kewe rese etipeeüfengeni manauer ngeni än Jiowa emmwen mi tong, iir repwe ninilo.

Nengeni ei kapas äwewe: Sipwe erä pwe a wor eü imwom mi ling, iwe, ka mut ngeni aramas ar repwe nonnom lon nge resap mööni. Ekkoch me leir ra kinamwefengen lefiler me tümünüöchü imwom we. Nge, ekkoch ra osukosukfengen me kirikiringaw ngeni ekkewe ekkoch mi mürinnö. Ra atai imwom me ü ngeni om sotun aükatiw ar föfföringaw.

Ifa usun kopwe pwäkini ei osukosuk? Kopwe ataielo imwom we? Aapwi. Eli kopwe mochen atowu ekkewe mi ngaw me förisefäli met ra atai.

 Pwal ina usun met Jiowa epwe föri. A amwökütü ewe sou mak kölfel an epwe makkeei: “Pun ekewe aramasangau repwe käriwu, nge chokewe mi apilülükü ewe Samol mi Lapalap repwe fanüeni ewe fanü. Lon fansoun mochomoch echök ekewe aramasangau resap chüen nom. Inamwo are kopwe küttafichiir lon lenier, nge resap nom ikenan. Nge ekewe chon tipetekison repwe fanüeni ewe fanü o pwapwaäsini ar feiöch me kinamwe mi somwola.”​—Kölfel 37:9-11.

Ewe aposel Piter a pwal fos usun ena mettoch. A makkeei: “Ren än Kot kapas läng me fanüfan ra fis. Fanüfan a fis seni koluk o pwal ren koluk. Iwe, pwal ren koluk, iei kolukun ewe noter, ewe fanüfan me lomlom a tala ren.” (2 Piter 3:5, 6) Lon ei wokisin, Piter a fos usun ewe noter lon fansoun Noa we. Ekkewe aramas mi ngaw ra ninilo, nge fönüfan ese talo. Ewe Noter a fis woon unusen fönüfan a isetiw eü “minen afalafal ngeni chon fofor ingau mwirin.”​—2 Piter 2:6, TF.

Piter a pwal sopwelo le apasa: “A iseis ekkeei lang o fonufanen ei fansoun ngeni ekkei.” Ika sia chök kaülo le älleani ei wokisin me ikkeei, sia tongeni wewengaweiti. Iwe nge, sopwosopwun a erä: “A iseis ir tori ewe ranin apung, ranin an ekkewe aramas ingau poutmwalilo.” A ffat pwe a fos usun niniloon ekkewe mi ngaw nge esap taloon ei fönüfan. Met epwe fis mwirin? Piter a makkeei: “Sia witiwiti lang sefo [än Kot we Mwuun Messaia] o pwal fonufan sefo, [eü mwichen aramas mi pwüng] ikewe pung epwe nonnom ie.”​—2 Piter 3:7, 13, TF.

Än ewe Paipel oesini a pwal pwäratä pwe ewe fansoun “sopolon” a arapoto. Älleani Mattu 24:3-14 me 2 Timoti 3:1-5 pwe kopwe küna pwüngün ena pworaus. *

Ka fen ekieki ika pwata chommong aramas rese tongeni weweiti Mattu 24:14, nge emön mwo semirit a tongeni weweiti? A wor ekkoch popun. Setan a fen achunalo letipen aramas seni ekkewe pworaus mi enlet lon Paipel. (2 Korint 4:4) Pwal och, Kot a fen amonomonalo an kokkot seni chon lamalam tekia nge a pwär ngeni chon tipetekison. Jises a erä: “Semei, en Samolun läng me fanüfan, üa kilisou ngonuk, pun ka amonomona ekei mettoch seni ekewe mi tipachem me silelap, nge ka pwärala ngeni ekewe tipate.” (Mattu 11:25) A ifa me apwapwaan ach nom lein ekkewe mi tipetekison, iir kewe mi weweiti wesewesen weween ewe Mwuun Kot me äpilükülükü ekkewe feiöch epwe toto ngeni ekkewe mi peni ena Mwu!

[Pwóróus fan]

[Sasing lon pekin taropwe 9]

Ewe Mwuun Kot epwe atoto “sopolon” mettoch meinisin mi ngaw woon fönüfan