Ki si sa “lafen”?

“. . . e apre sa, lafen pou arive.”​—MATYE 24:14.

TOU dernyenman dimoun pe koz en kantite konsernan lafen sa lemonn. I annan en varyete liv, film ek magazin ki swa komik oubyen syantifik, ki koz lo diferan fason ki dimoun i krwar lafen pou ete. Zot krwar i en destriksyon ki pou arive swa par en lager nikleer, en kolizyon ant de gro ros dan lespas, en viris mortel, sanzman klima ki pa kapab ganny kontrole oubyen par bann kreatir ekstrateres.

Bann pwennvi relizye osi i varye. Bokou i ansennyen ki “lafen” i vedir lafen tou lavi lo later. En profeser larelizyon ti ekrir sa bann parol profon lo Matye 24:14: “Sa verse i enn ki pli enportan dan tou Parol Bondye . . . Nou zenerasyon pe fer fas avek posibilite en sitan gran destriksyon ki bokou pa pe menm mazinen ki i kapab vin vre.”

Souvandfwa dimoun ki annan bann tel pwennvi i oubliy en keksoz enportan: Zeova in “etablir [later] solidman.” I “pa’n kree li pour nanryen ditou, [me i’n] fer li pour dimoun reste lo la.” (Izai 45:18) Alor ler Zezi ti koz konsernan “lafen,” i pa ti pe esey dir ki later ti pou ganny detrir oubyen ki tou dimoun ti pou ganny detrir. I ti oule dir ki bann move dimoun, setadir bann ki refize pour viv zot lavi an armoni avek gidans Zeova ki pou ganny detrir.

Annou vwar en legzanp. Meton ou ti annan en zoli lakaz e ou ti pe les dimoun reste ladan pour nanryen. Serten sa bann dimoun i viv byen ansanm e zot pran byen swen avek ou lakaz. Par kont, serten i zis fer problenm, lager avek kanmarad e maltret sa bann ki pe fer sa ki byen. Zot andomaz ou propriyete e menm si ou esey anpes zot, zot kontinyen menm.

Ki ou ti pou fer pour regle sa sityasyon? Eski ou ti pou detrir ou lakaz? Non, me petet  ou ti pou tir sa bann move dimoun e repar domaz ki zot in fer.

Zeova pou azir dan sa menm fason. I ti enspir en psalmis pour ekrir: “Bann mesan pour ganny detrir, me sa bann ki esper Zeova, zot pou reste lo later. Dan ankor en ptigin letan, move dimoun pou nepli la; ou pou al get dan son landrwa e i pa pou la. Me bann dimoun ki annan limilite pou posed later, e zot pou sirman trouv bokou plezir dan labondans lape.”​—Psonm 37:9-11.

Zapot Pyer ti koz lo sa menm size. I ti ganny enspire pour ekrir: “Depi byen lontan lesyel ek later in ganny formen par parol Bondye. Later in sorti dan delo, e in ganny formen avek delo, egalman, lemonn ansyen ti ganny detri par delo, sa gran deliz.” (2 Pyer 3:5, 6) Zapot Pyer ti pe koz konsernan sa Deliz dan lepok Noe. Se sa bann move dimoun ki ti ganny detrir me pa later. Sa Deliz ki ti arive lo later antye i “en leson [pour] bann move dimoun dan lavenir.”​—2 Pyer 2:6.

Pyer ti apre dir: “Lesyel ek later in ganny prezerve par sa menm parol, pour ganny detri par dife.” Si nou aret lir sa verse la, nou kapab mal konpran sa ki i ti pe esey dir. Me remarke ki sa verse i kontinyen dir: “Bann move dimoun pou ganny detri.” Pa later ki pou ganny detrir me plito bann move dimoun. Me ki pou arive apre? Pyer ti ekrir: “Nou pe espere dapre son promes en nouvo lesyel [Rwayonm Bondye dan lanmen Kris] ek en nouvo later [bann dimoun ki drwat] kot pou annan lazistis.”​—2 Pyer 3:7, 13.

Bann profesi Labib i osi montre ki sa zour ki “lafen” pou arive i pros. Lir Matye 24:3-14 ek 2 Timote 3:1-5 pour vwar bann keksoz ki montre ki sa i vre. *

Eski ou vwar li drol ki dimoun pa arive konpran Matye 24:14, en verse ki menm en zanfan i kapab konpran? Annou vwar akoz. Satan in avegle bann dimoun pour ki zot pa vwar sa laverite ki presye dan Parol Bondye. (2 Korentyen 4:4) Bondye in osi kasyet son plan avek bann dimoun ki orgeye me in revel li avek bann ki annan limilite. Konsernan sa, Zezi ti dir: “Mon remersi ou Papa, Senyer lesyel ek later, akoz ou’n kasyet avek bann dimoun malen e entelizan tou sa bann keksoz, me ou’n revel li avek bann zanfan.” (Matye 11:25) Pa i en loner pour form parti bann ki annan limilite e ki vreman konpran ki savedir Rwayonm Bondye e ki enpasyan pour ganny sa bann benediksyon ki tou bann ki siport li pou gannyen!

[Not anba lo paz]

[Portre lo paz 9]

Sa Rwayonm pou met en “lafen” avek tou sa ki move lo later