Nso Idi “Utịt”?

“. . . ndien adan̄aoro ke utịt edidi.”—MATTHEW 24:14.

MME owo mfịn ẹtịn̄ ata ediwak n̄kpọ ẹban̄a utịt. Mme n̄wed, ndise vidio, mme magazine—edide eke mbubru m̀mê eke ntaifiọk—ẹtịn̄ nsio nsio n̄kpọ ẹban̄a usen nsobo. Mmọ ẹtịn̄ nte ekọn̄ nuclear, ekondo en̄wen ndiduọ ntọ isọn̄ emi, ndiọi unam udọn̄ọ, eyo ndifiop m̀mê ndibịt n̄kaha, ye mme esen esen n̄kpọ emi ẹtode ekondo en̄wen ẹdisobode ererimbot emi.

Nsio nsio ido ukpono n̄ko ẹtịn̄ nsio nsio n̄kpọ. Ediwak mmọ ẹkpep ke ẹyesobo kpukpru se idude ke isọn̄ ke ini “utịt” edidide. Ekpep ukpepn̄kpọ ido ukpono kiet ekewet ntem aban̄a Matthew 24:14: “Kiet ke otu ata akpan ufan̄ikọ N̄wed Abasi edi emi . . . Ata idiọk nsobo ọmọn̄ esịm emana emi, ndien ata ediwak owo ikereke-kere nte enye edidiọkde iketre.”

Mbon emi ẹkerede n̄kpọ ntem ẹsifre ke Bible ọdọhọ ke Jehovah Abasi ‘okobot isọn̄ emi, ibotke enye ke ikpîkpu, edi obot man ẹdụn̄ ke esịt.’ (Isaiah 45:18) Ntre, ke ini Jesus eketịn̄de aban̄a utịt, ikọ esie ikọwọrọke ke ẹyesobo isọn̄ m̀mê ofụri ubonowo. Ikọ esie ọkọwọrọ ke ẹdisobo ndiọi owo—mbon emi ẹsọn̄de ibuot ẹsịn nditiene ima ima ndausụn̄ Jehovah.

Kere ban̄a uwụtn̄kpọ emi. Yak idọhọ ke emenyene ata ediye ufọk emi ayakde mme owo ẹdụn̄ ke mfọn. Ndusụk mbon emi ẹdụn̄de ke ufọk oro ẹtie emem emem ye mbon en̄wen, ẹnyụn̄ ẹse ẹban̄a ufọk oro. Edi ndusụk ẹsịn ntịme, ẹn̄wana en̄wan, ẹnyụn̄ ẹtọk mbon oro ẹtiede emem emem. Mmọ ẹbiat ufọk fo inyụn̄ inyịmeke ndikop se etịn̄de.

Nso ke akpanam? Ndi okpowụri ufọk oro osio? Anaedi ukpuwụrike. Ekeme ndidi ekpebịn ndiọi owo oro osio ke ufọk fo, onyụn̄ ọdiọn̄ se mmọ ẹbiatde.

 Se Jehovah edinyụn̄ inamde edi oro. Enye ama anam andiwet psalm ewet ete: “Ẹyesịbe mme anamidiọk ẹfep, edi mmọ eke ẹdoride enyịn ke Jehovah ẹyeda isọn̄ ẹnyene. Ndien ayak esisịt, idiọkowo ididụhe aba; afo oyonyụn̄ etịn̄ enyịn ke ebiet esie, ndien enye ididụhe. Edi mbon nsụkidem ẹyeda isọn̄ ẹnyene, ediwak emem oyonyụn̄ adat mmọ esịt.”—Psalm 37:9-11.

Apostle Peter ama ewet aban̄a ukem n̄kpọ emi. Abasi ama anam enye ewet ete: “Enyọn̄ ama odu toto ke eset ye isọn̄ emi ẹkedade ikọ Abasi ẹnam ọwọrọ ke mmọn̄ ọsọn̄ọ ada, emi onyụn̄ odude ke ufọt mmọn̄; ndien kpa mme n̄kpọ oro ke ẹkeda ẹsobo ererimbot emi okodude adan̄aoro ke ini ẹkedade ukwọ ẹfụk enye.” (2 Peter 3:5, 6) Apostle emi eketịn̄ aban̄a Ukwọ eyo Noah ke itien̄wed emi. Idịghe isọn̄ ke ẹkesobo, edi ẹkesobo mbon emi mîketen̄eke Abasi. Ukwọ emi okofụkde ofụri ererimbot mi ekenịm “uwụtn̄kpọ ọnọ mbon emi mîten̄eke Abasi kaban̄a mme n̄kpọ emi ẹdidide.”—2 Peter 2:6.

Ekem Peter ama adian do ete: “Ẹmụm enyọn̄ ye isọn̄ emi ẹdude ke emi ẹnịm ẹnọ ikan̄.” Itien̄wed emi idin̄wan̄ake nnyịn edieke ikotde itre do. Edieke esede oyokụt ke itien̄wed oro etịn̄ n̄ko aban̄a “usen emi edisobode mmọ eke mîten̄eke Abasi.” Mbon emi mîten̄eke Abasi ke ẹyom ndisobo idịghe isọn̄. Nso en̄wen idu ke itien̄wed oro? Peter ekewet ete: “Nnyịn itie ibet mbufa enyọn̄ [Obio Ubọn̄ Messiah Abasi] ye obufa isọn̄ [ndinen owo] emi enye ọkọn̄wọn̄ọde, ndien edi do ke edinen ido edidụn̄.”—2 Peter 3:7, 13.

Mme ntịn̄nnịm ikọ Bible n̄ko ẹwụt ke utịt enen̄ede ekpere. Kot Matthew 24:3-14 ye 2 Timothy 3:1-5 man okụt mme n̄kpọ oro ẹnamde idiọn̄ọ ke utịt ekpere. *

Ndi akpa fi idem nte Matthew 24:14—itien̄wed emi ekemede ndin̄wan̄a idem ata ekpri eyenọwọn̄—mîn̄wan̄ake mme owo? Enyene se inamde etie ntre. Satan anam ikike mme owo ekịm mbak ọsọn̄urua akpanikọ emi odude ke Bible idin̄wan̄a mmọ. (2 Corinth 4:4) N̄ko, Abasi iyarakede uduak esie inọ mbon ntan̄idem edi ayarade ọnọ mbon nsụhọdeidem. Emi akanam Jesus otoro Ete esie ete: “Mmotoro fi an̄wan̄wa, Ete, Ọbọn̄ enyọn̄ ye isọn̄, koro afo emedịp mbon ọniọn̄ ye mbon ikike mme n̄kpọ emi onyụn̄ ayarade mmọ ọnọ nseknditọ.” (Matthew 11:25) Nso akwa ukpono ke edi ntem ndisịne ke otu mbon nsụhọdeidem emi ẹnen̄erede ẹdiọn̄ọ se Obio Ubọn̄ Abasi edide, emi ẹnyụn̄ ẹtiede ẹbet mme edidiọn̄ oro Obio Ubọn̄ emi edidade ọsọk mbon emi ẹdade ẹnọ ukara emi!

[Ikọ Idakisọn̄]

[Ndise ke page 9]

Ọbio Ubọn̄ Abasi eyetre kpukpru idiọkido ke isọn̄