Eme Họ “Urere” Na?

“. . . kẹsena urere u te zi te.”—MATIU 24:14.

EME kpahe urere akpọ na e da oria kpobi fia. Te ebe, ifimu, gbe emagazini, erọ eme atahwẹ gbe enọ egba-eriariẹ i kere, e ta eware sa-sa kpahe ẹdẹ okpẹtu jọ nọ ọ rẹriẹ ovao dhe akpọ na. Eware jọ nọ a fodẹ inọ e te wha okpẹtu nana ze họ, ẹmo okpemuotọ, emama odhiwu nọ i ti kpeke, ẹyao nọ o ti kpe ahwo, ikpisoi, ẹroro hayo ifou nọ e rẹ te ga thesiwa, hayo egwara jọ nọ i re ti no idedeghe ze.

Egagọ i wo eriwo sa-sa re kpahe ẹme nana; ibuobu rai a re wuhrẹ nọ oware nọ u wo uzuazọ kpobi evaọ otọakpọ o te raha evaọ ẹdẹ “urere.” Nọ owuhrẹ-egagọ jọ ọ jẹ ta kpahe ẹme Matiu 24:14 na, o kere eme ọwhewhe nana: “Onana yọ ojọ evaọ usu eme nọ e mai wuzou evaọ Ẹme Ọghẹnẹ . . . Oge mai na ọ rẹriẹ ovao dhe ọraha-muotọ nọ o muozọ te epanọ umutho ahwo jọ ọvo a wo udu nọ a rẹ sai ro roro kpahe iẹe.”

Eriwo otiọye na o bi gbolaro kẹ oware jọ: Jihova Ọghẹnẹ ọ ma akpọ na je “ru ei dikihẹ;” “ọ ma riẹ kẹ ozighi hi, ọ ma ae re a ria ae.” (Aizaya 45:18) Fikiere, okenọ Jesu ọ fodẹ “urere” na, orọnọ ọ jẹ ta nọ a te raha otọakpọ na ha; yọ orọnọ ọ jẹ ta nọ a te raha ahwo-akpọ kpobi muotọ họ. Oware nọ ọ jẹ ta kpahe na họ, a te raha ahwo nọ a bi veghe uzou, nọ a gwọlọ yeri uzuazọ rai lele ọkpọvio oyoyou nọ o bi no obọ Jihova ze he.

Roro kpahe oriruo nana. Ma rehọ iẹe nọ who wo uwou uwoma jọ nọ whọ rọ kẹ ahwo inọ a rria ọvọvẹ. Otu rai jọ a bi yeri uzuazọ rai dhedhẹ kugbe amọfa evaọ ighẹ na jẹ be rẹrote uwou ra na ziezi. Rekọ efa jọ ẹbẹbẹ ọvo a be whaze, be họre ohwohwo jẹ be gwọlọ ẹme otu nọ ọ be rẹrote ighẹ na ziezi na. A be raha eware evaọ ighẹ na yọ a be daezọ dede he nọ whọ be ta kẹ ae nọ a seba.

 Eme who re ru ro ku ẹbẹbẹ na họ? Kọ who re kporo uwou ra fihotọ? O wọhọ nọ ere who ti ru hu. Ẹsejọhọ who ti le ikpehre ahwo na no ighẹ ra whọ vẹ ruẹrẹ eware nọ a raha na.

Epọvo na Jihova o ti ru. Ọ rọ ẹzi riẹ kẹ ọso-ilezi na kere nọ: “A ti kpe iru-umuomu na kufiẹ; rekọ enọ e be hẹrẹ ỌNOWO kpobi, a rẹ te rehọ otọ na reuku. Omoke kakao, iru-umuomu e gbẹ te jọ họ; dede nọ wha bi ri oria riẹ ziezi na, ọ rẹ te jọ etẹe he. Rekọ enọ e rọ oma kpotọ, e rẹ te rọ otọ na reuku; oma o rẹ te were ae evaọ omofọwẹ.”—Olezi 37:9-11.

Pita ukọ na ọ ta kpahe oware ovona. Ẹzi Ọghẹnẹ ọ wọ riẹ kere nọ: “Ihru e [rrọ] anhwọ ọgbọ, gbe otọ-oyaya nọ a rọ ame ru no ame ze . . . ẹvo nọ [o ku] akpọ ọyena ọ tẹ raha iẹe.” (2 Pita 3:5, 6) Ukọ na ọ jọ etenẹ ta ẹme kpahe Ẹvo ọrọ edẹ Noa. Akpọ ọrọ ahwo nọ a riẹ Ọghẹnẹ hẹ ọ raha kufiẹ, rekọ otọakpọ na o raha ha. Ẹvo ologbo yena nọ o ku akpọ soso na o rrọ “oriruo rọ kẹ enọ e hae te jọ erọ Ọghẹnẹ hẹ.”—2 Pita 2:6.

Pita o fibae nọ: “A . . . ruẹrẹ ihru gbe akpọ nọ erọ enẹna kpahe kẹ erae.” Ma te no etenẹ kuhọ, ma rẹ sai rri ẹme na thọ. Muẹrohọ inọ owọ ikere nana o nyaharo ta nọ: “Gbe ẹraha otu nọ ekare erọ Ọghẹnẹ.” Orọnikọ otọakpọ na a te raha ha, rekọ ahwo nọ a riẹ Ọghẹnẹ hẹ. Kọ eme o ti lele iei? Pita o kere nọ: “Wọhọ epaọ eya riẹ, ma rẹ hẹrẹ ihru ekpokpọ [Uvie Mesaya nọ Ọghẹnẹ o ro mu] avọ akpọ ọkpokpọ [ahwo-akpọ ikiẹrẹe] enọ ẹrẹreokie ọ be ria.”—2 Pita 3:7, 13.

Eruẹaruẹ Ebaibol i dhesẹ re inọ okenọ “urere” na o te rọ ze o kẹle no. Se Matiu 24:3-14 gbe 2 Timoti 3:1-5 re whọ ruẹ eware nọ i dhesẹ nọ onana uzẹme. *

Kọ u bi gbe owhẹ unu inọ ahwo a bi wo otoriẹ obe Matiu 24:14 thọ, oria ikere nọ makọ ọmaha dede ọ rẹ sai wo otoriẹ riẹe? Eware buobu e riẹ nọ e wha onana ze. Setan o wuhu iroro ahwo di no re a siọ uzẹme oghaghae nọ o rrọ Ebaibol na ba ẹriẹ. (2 Ahwo Kọrint 4:4) Ofariẹ, Ọghẹnẹ ọ ko ẹjiroro riẹ dhere no ahwo nọ a re fu uke, o te dhesẹ iẹe kẹ otu nọ o wo omaurokpotọ. Onana o soriẹ nọ Jesu ọ rọ ta nọ: “Ọsẹ Ọnowo odhiwu gbe akpọ, me yere owhẹ, epanọ who si eware enana no dhere iwoareghẹ gbe enọ e riẹ, whọ tẹ rehọ ae via kẹ emọ efofa.” (Matiu 11:25) Ọghọ riẹ ọ rro kẹhẹ re ohwo ọ jọ usu ahwo omaurokpotọ nọ i wo otoriẹ oware nọ Uvie Ọghẹnẹ o ginẹ rrọ, enọ e rẹ sai rẹro eghale nọ Uvie na o te wha se ahwo nọ e tha riẹ uke!

[Oruvẹ-obotọ]

[Uwoho nọ o rrọ ẹwẹ-obe avọ 9]

Uvie na o te wha “urere” emuemu kpobi ze