“Naggatissaq” suua?
“Naggatissaq” suua?
“. . . taavalu naggatissaq nalliutissaaq.” — MATTHÆUSI 24:14.
NUNARSUUP piuneerunnissaanik takorluukkat ikinngillat. Atuakkani, filmini atuagassianilu ullut naggatissaat assigiinngitsorpassuartigut, soorlu quianartunngorlugu imaluunniit ilisimatuussutsimut tunngasunngortillugu, sammineqarpoq. Takorluukkat ilagaat atombombit atorneqarnerat, asteroidet aporaannerat, virusi toqussutaasoq, silap pissusiata allanngornera unitsitassaanngitsoq akeqqallu avataarsuaneersut pissutaallutik suujunnaarsitaaneq.
Aamma upperisarsiornikkut takorluukkat amerlaqaat; amerlasuut ajoqersuutigaat “naggatissaq” tassaassasoq nunarsuarmi uumassuseerunnera. Teologi Matthæusi 24:14 pillugu nikallornartumik ima allappoq: “Versi taanna Guutip oqaasiani pingaarnersat ilagaat . . . Uagut nalitsinni kinguaariit ima suujunnaarsitaaratarsinnaatigipput allaat qanoq amiilaarnartiginissaanik ikinnerpaanit takorloorneqarsinnaalluni.”
Taamatulli takorluuinerni pingaarutilik una sianiginngitsuusaarneqarpoq: Jehova Guuti nunarsuarmik ‘tunngaviliisuuvoq’; “soqanngitsussanngorlugu pinngortinngilaa, kisianni najugaqarfissanngortillugu”. (Esaja 45:18) Tassa Jiisusip “naggatissaq” eqqartoramiuk isumaqanngilaq nunarsuaq inuilluunniit tamarmik piuneerussaajumaartut. Isumaqarpoq inuit ajortut — Jehovap asannittumik siunnersuinera naapertorlugu naalasseriillutik inuujumanngitsut — piuneerussaajumaartut.
Assersuuteqariarta. Takorlooruk nuannersumik illoqartutit, taannalu akeqanngitsumik allanut atortippat. Atuisut ilaat eqqissillutik inooqatigiipput illulu paarilluarlugu. Allalli ajornartorsiortitsiuarput; kamaattarput atuisullu paarsilluartut ajortumik pisarlugit. Illumik innarliisarput taamaalioqqunagillu pigaluaraangakkit qisuariarneq ajorput.
Qanoq iliussagaluarpit? Illu aserortissagaluarpiuk? Ilimananngilaq. Ilimanarpoq atuisut paarsinerluttut anisissagitit aserugaallu iluarsaallugit.
Jehova taamatupajaaq iliussaaq. Tussiaasiortoq isumassarsisillugu ima allattippaa: “[Pinerluttut] piiagaasussaapput, [Jehovamulli] neriuttut nuna kingornutissavaat. Iluanngitsoq erniinnaq peeruttussaavoq, inaani takuniaraluarukku peerutereersimassaaq. Kisianni qanilaartut nuna kingornutissavaat pilluangaarnertillu nuannaarutigissallugu.” — Tussiaat 37:9-11.
Aamma apustilip Petrusip tamanna eqqartorpaa. Isumassarsisitaalluni ima allappoq: “Itsarsuarmiilli [qilaqarpoq] nunaqarlunilu Guutip oqaasiagut imermit imikkullu pinngortumik, taamaattumillu silarsuaq taamanernisaq imermit qarsunneqarluni piujunnaarpoq.” (2 Petrusi 3:5, 6) Uani apustilip pivaa Noap nalaani ulersuaq. Taamanikkut silarsuaq piujunnaartoq nunarsuunngilaq, piuneerunneqartulli tassaapput guutiitsut. Silarsuaq tamakkerlugu ulersuaq tamanna ‘siunissami kinguaariinni iluaatsuujumaartunut sioorasaarutissanngorpoq’. — 2 Petrusi 2:6.
Petrusi ima nangippoq: ‘Qilaat nunalu maannakkut ittut utaqqisitaapput iluaatsut nungutitaanissaanni ikuallagaanissaminnut.’ Piuneerussaasussaq tassaanngilaq nunarsuaq, tassaallutilli inuit ajortut. Tamatuma kingorna susoqassava? Petrusi ima allappoq: ‘Neriorsuutaa naapertorlugu ilimagisaraavut qilaat nutaat [Guutip naalagaaffia Missiarsikkoortoq] nunalu nutaaq [innuttaaqatigiit naapertuilluartut] iluassutsip najugarisassai.’ — 2 Petrusi 3:7, 13.
Aamma siulittuutit Biibilimeersut ersersippaat “naggatissaq” qanittuararsuusoq. Taamaanneranut uppernarsaataasut uku atuakkit: Matthæusi 24:3-14 aamma 2 Timotheusi 3:1-5. *
Matthæusi 24:14, versi allaat meeqqap paasisinnaasaa, taama paatsiveerusimaarutaatiginera eqqumiigaajuk? Paatsiveerusimaarutaanera assigiinngitsunik pissuteqarpoq. Saatanip inuit tappiillisippai sallusuissutinik erlinnartunik Guutip oqaasianeersunik takunnissinnaaqqunagit. (2 Korinthimiut 4:4) Aammattaaq Guutip siunertani makitasuunut isertorpaa maniguuttunullu saqqummersillugu. Tamatumunnga tunngatillugu Jiisusi ima oqarpoq: “Unnersiutigaakkit Ataataq, qilaap nunallu Naalagaat, ilisimasunut sianisuunullu tamanna isertorakku saqqummersilluguli meerannguanut.” (Matthæusi 11:25) Maniguuttunut Guutip naalagaaffiata suuneranik paasinnilluartunut naalagaaffimmillu tamatuminnga tapersersuisut tamarmik pilluaqqussutisiassaattut pilluaqqussutisinissamik qilanaarinnittunut ilaanerup immikkut pisinnaatitaaffiunerata angissusia!
[Quppernerup ataani ilanngussaq]
^ imm. 11 Amerlanerusunik paasissutissaqarpoq atuakkami Biibilimi sorpiaat ajoqersuutigineqarpat?-mi kapitali 9-mi. Jehovap Nalunaajaasuinit saqqummersinneqartoq.
[Qupp. 9-mi assiliartaq]
Nunarsuarmi ajussuseq Naalagaaffimmit ‘naggaserneqassaaq’
