“Ets taanëm myinäˈäny ja jëjptëgoˈoyën.” (MATEO 24:14, Traducción del Nuevo Mundo)

OYMYÄÄTY yajmaytyaˈaky ko kyutëgoyaˈanyë naxwinyëdë. Yaˈixy mä pelikula, mä liibrë ets mä rebistë wiˈix jyatäˈäny axëëgë naxwinyëdë ets mbäät tmaytyäˈäktë naxiˈiky naˈˈandaˈaky o jyantsy jyënäˈändë. Ta diˈib jënandëp ko yëˈë xyajkutëgoyäˈänëm ko jyantsy tyëgäjtsˈadëˈëtsyë tiempë, tuˈugë mëj tsip mëdë bombë, tuˈugë mëk päˈäm diˈib ninäjxp o tsyokaratäˈänyë naxwinyëdë mët tii diˈib tsoˈomp tsäjpotm o jyäˈtäˈändë extraterrestre.

Pënaty tukniˈˈijxëdëp mä relijyonk nan wiˈixëm jyënäˈändë. Tyukniˈˈixëdë ko ja jëjptëgoˈoyën, yëˈë mä jyëjpkëxäˈäny ja jukyˈäjtën yä Naxwiiny. Tuˈugë ëxpëjkpajn duˈun tnimaytyaˈagyë Mateo 24:14: “Nuˈun tukëˈëyë Diosë yˈAyuk, tyäˈädë bersikulo, yëˈë diˈib mas jëjpˈam [...;] tyäˈädë ndiempëˈäjtëm mbäät twingujäˈtë tuˈugë mëj kutëgoˈoyën diˈib kyaj nëgoo pën tmëwinmäˈänybyäädët wiˈix tyunäˈäny jyatäˈänyëty” (El Evangelio del Reino).

Pënaty duˈun winmääytyëp jyaˈaytyëgooytyëp ko Biiblyë jyënaˈany ko Dios “täˈtspeky ojts tpëjtaˈaky” ja Naxwinyëdë ets ko kyaj “nanëgoobë ojts dyajkojy”, yajkojë duˈun parë “yajtuktsëënët” (Isaías 45:18). Pääty ko Jesus tmaytyaky ja jëjptëgoˈoyën, kyaj yëˈë tmaytyäˈägany ko kyutëgoyaˈanyë Naxwinyëdë o niˈamukë naxwinyëdë jäˈäy. Diˈibë duˈun ojts tmaytyäˈägäˈäny, yëˈë ko kyutëgoyaˈanyë axëkjäˈäy, pënaty kyaj tmëmëdowäˈändë Dios.

Nˈokpëjtakëm tuˈugë ijxpajtën: tuˈugë jäˈäy dyajtsëënë kanäägë familyë mä tuˈugë tëjk diˈib jantsy oy ets kyaj ttukˈajuytyuky. Nääk diˈib jam tsënääytyëp oy jyaˈayˈattë, kyaj tsyiptundë mëdë myëdëjkpäˈä ets kyuentˈäjttëp ja tëjk. Per tam diˈib jeˈeyë dyajjamˈattë jotmay, axëëk ttundë ja diˈib oy jäˈäyˈäjttëp, dyajwindëgoytyë ja jëën tëjk ets kyaj tmëjpëjtäˈäktë wiˈix jyaˈˈanëˈëmxëdë ja jäˈäy diˈib jam yajtsënääyëdëp.

¿Ti tyunëbë tyäˈädë jäˈäy? ¿Jyijtëˈëgëp ja tyëjk? Tsip duˈun ttunët. Diˈib tyunëp yëˈë tkajxpëtsëmët ja diˈib kyaj oy jyaˈayˈattë ets dyaˈˈaˈoyët ja tyëjk.

 Pes nanduˈunë Jyobaa ttunäˈäny. Mä yˈAyuk jyënaˈany: “Yëˈë axëkjäˈäy yaˈëxpoˈtëˈëgandëp, per pënaty yˈawijxtëbë Jyobaa yëˈë jyaˈˈatandëbë naxwinyëdë. Jeˈeyë ja waanë tiempë yˈakweˈemy, etsë axëkjäˈäy kyaj nyekyjaˈˈatäˈäny; ets xyjaˈixäˈäny mä ja lyugäär, per kyaj naty pënnë. Per diˈib yujy tudaˈaky, yëˈë jyaˈˈatandëbë naxwinyëdë, ets tjantsy tyukxondäˈägäˈändë mëjwiin kajaa ja tuˈugyëˈäjtën diˈib jaˈˈatäämp” (Salmos 37:9-11).

Apostëlë Pedro nanduˈun tkujäˈäyë: “Jantsy jekyëp taayëmë natyë tsäjp esë nax, diˈibë Dios mët ja yˈayuk pyëjtak es nan nyëëwimbëtsëmët, es dyaˈity nëëgujkoty, es mët ja nëë, ja ayoˈonduu, Dios dyajkutëgooy ja naxwinyëdë jäˈäyëty” (2 Peedrʉ 3:5, 6). Pedro, yëˈë yää myaytyak ja Ayoˈonduu diˈib mä Noé. Ko myiiny ja Ayoˈonduu kyaj kyutëgooy ja Naxwinyëdë, yëˈë kutëgooy ja axëkjäˈäy. “Tyäˈädë oj wyeˈemy extëmë ijxpajtën wiˈix jyäˈtäˈäny kyëbatäˈändë ja axëkjäˈäytyëjk” (2 Peedrʉ 2:6).

Pedro ta net jyënany: “Tsäjp esë nax diˈibë jaa tyam, Dios të jyënaˈany ko yajtoyaampy”. Ko jeˈeyë ngäjpxëm axtë yää, mbäät tëgatsy njaygyujkëm. Per ok, ta yajkäjpxwäˈätsy, pes ta yˈakjënäˈäny: “Ko naty dyajkutëgoyaˈany ja pekyjyaˈayëty”. Pääty axëkjäˈäyën kutëgoyäämp, kyaj yëˈëjëtyë Naxwinyëdë. ¿Ets ti net tunan jatanëp? Pedro tnimaytyaˈaky: “Perë Dios të twandaˈaky xymyoˈoyäˈänëm ja jembyë tsäjp [Diosë yˈAnaˈamën mä Jesus tyunäˈäny Rey] esë jembyë naxwinyëdë [jäˈäy diˈib jukyˈäjttëp tëyˈäjtën mëët] mä tëgekyë yajtunët diˈibë tëyˈäjtën” (2 Peedrʉ 3:7, 13).

Tijaty ojts yajnaskäjpxë mä Biiblyë, yëˈë xytyukˈijxëm ko “ja jëjptëgoˈoyën” wingon yˈijnë. Mët yëˈëyë ko ngäjpxëmë Matewʉ 24:3-14 etsë 2 Timotee 3:1-5, ta nbëjkëmë kuentë ko jantsy duˈunë duˈun. *

Extëm të nˈijxëm, Matewʉ 24:14 pojënë yajjaygyukë. ¡Axtë jyaygyukëbë ënäˈkuˈunk! Per ¿tiko mayë jäˈäy kyaj tjaygyukëdë wiˈix nyikejy? Tam tiko kyaj tjaygyukëdë. Yëˈko ja Mëjkuˈu të yajjuˈunxëdë jyot wyinmäˈäny yëˈë kyaj nyaˈixyëty es kyudëˈx kyujäjëdët ja tëyˈäjtën diˈib yajpatp mä Biiblyë (2 Korintʉ 4:4). Dios nan tyukwinguyuˈtsypyë yˈAyuk ja diˈib mëj këjxm nayajnäjxëp ets yëˈëyë tyuknijäˈäp ja yujy tudaˈakypyë. Päätyë Jesus tˈanmääyë tyeety: “Nˈawdäjtypyëts mij diˈibë Wintsënˈäjtp tsäjpotm es yä naxwiiny, jaˈa ko mij të xyuˈutsy ja mˈayuk mët ja jäˈäyëty diˈibë yajtijtëp ëxpekyëty es wijyjyaˈayëty, per mij të xytyukˈixy ja jäˈäy diˈibë dëˈën extëm ënäˈkuˈungëty” (Matewʉ 11:25). ¡Jantsy jotkujk nayjäˈäwëm ko nyajpatëm mëdë jäˈäy diˈib jyaygyujkëdëp tidën yˈandijpy ja Diosë yˈAnaˈamën ets tpuwäˈägëdë! Niˈamukë mbäät nˈawijx njëjpˈijxëm ja kunuˈkxën diˈib yajminaampy.

[Notë diˈib noky ëxˈääy]

[Letrë diˈib miimp mä dibujë mä pajina 9]

Diosë yˈAnaˈamën yëˈë yajjëjptëgoyaambyë axëkˈäjtën