Khuyini “Ukuphela”?
Khuyini “Ukuphela”?
“. . . ngemva kwalokho ukuphela kuzokufika.”—MATEWU 24:14, NW.
MVA nje kube neenkulumo ezinengi ezimalungana nokuphela kwephasi. Iincwadi, amabhayisikobho nabomagazini bamahlaya nebesayensi kuveza iindlela ezihlukahlukeneko zokufika kokuphela. Zihlanganisa nokutjhatjalaliswa ngepi yenukliyasi, ukutjhayisana kwamaplanethi, ingogwana ebulalako, ubujamo bezulu obungalawulekiko, namtjhana abasahleli abahlala emkhathini.
Iinkolo godu zineembono ehlukahlukeneko; ezinengi zifundisa bona “ukuphela” kuzokuqeda koke okuphilako ephasini. Sikhuluma ngoMatewu 24:14, esinye isazi sekolo satlola amezwi abuhlungu naka: “Iveseli lingelinye laqakatheke khulu kilo loke iLizwi lakaZimu . . . Isizukulwana sethu siqalene namathuba wokutjhatjalaliswa ngokupheleleko kangangobana abanengi bethu basaba nokucabanga bona ubujamo buzokuba bumbi kangangani.”
Iimbono enjalo ngokuvamileko ileqisela amehlo iqiniso eliqakathekileko lokobana: UJehova uZimu “walibumba ngokuqinileko” iphasi; “khenge alibumbele ilize, [kodwana] walenzela bona kuhlalwe kilo.” (Isaya 45:18) Ngalokho uJesu nekakhuluma ‘ngokuphela,’ bekangatjho bona iphasi lizokutjhatjalaliswa; godu gade angatjho bona boke abantu bazokutjhatjalaliswa. Bekatjho bona abantu abambi—labo ngekani abangafuni ukuphila ngokuvumelana nesinqophiso sakaJehova sethando—bazokutjhatjalaliswa.
Cabangela umfanekiso naku. Akhe sithi unendlu ehle khulu begodu uvumela abantu bona bahlale kiyo ngesihle. Abanye babahlali, bahlalisana ngokuthula nabanye begodu bayayitlhogomela indlwakho. Nokho, abanye babanga iimraro, balwa nabanye begodu batlhorisa abahlali abaziphethe kuhle. Bonakalisa iindlwakho begodu ngekani bala nokulalela iimzamakho yokubakhalimela.
Ungayilungisa njani indaba le? Ungabhuruza indlwakho? Pheze ngeze. Kungenzeka bewuzokuqotha abahlali abadelelakwaba begodu ulungise umonakalo owenziweko.
UJehova uzokwenza ngendlela efanako. Waphefumulela umrhalani bona atlole: “Abantu abambi bazokususwa, kodwana abathembela kuJehova bazokudla ilifa lephasi. Esikhathini esingaphelisi ihliziyo, omumbi uzabe angasekho; ngokuqinisekileko uzoyiqala indawo yakhe, uzabe angasekho. Kodwana abathobekileko bazokudla ilifa lephasi, begodu bazokufumana ithabo nokuthula okukhulu.”—IRhalani 37:9-11.
Umpostoli uPitrosi wakhuluma ngendaba efanako. Aphefumulelwe, watlola: “Amazulu bekavele akhona endulo, nokobana uZimu wakhuluma ngelizwi lakhe, kwabunjwa iphasi ngemanzini, laba ngaphakathi kwamanzi. Iphaselo ebelikhona labhujiswa ngamanzi wekukhulamungu.” (2 KaPitrosi 3:5, 6) Lapha umpostoli uqalise kuKukhulamungu wangeenkhathi zakaNuwa. Kwatjhatjalaliswa abantu abangamsabiko uZimu, ingasi iphasi. UKukhulamungu wephasi loke wabeka “isibonelo salokho okuzakwenzeka kilabo abangamesabiko uZimu.”—2 KaPitrosi 2:6.
Yeke uPitrosi wangezelela: “Izulu nephasi okukhona gadesi kubekelwe umlilo.” Nesingajama lapho, besingafumana umbono ongasiwo. Nokho, tjheja bona iveselo liragela phambili lithi: “Kuyobhujiswa khona abangamsabiko uZimu.” Akuzukubhujiswa iphasi kodwana abantu abangamsabiko uZimu. Yini elandelako? UPitrosi watlola: “Kunamazulu amatjha [uMbuso kaZimu ngoMesiya] nomhlaba omutjha [isintu esilungileko] silinde malungana nesithembiso sakhe, lapho kuyokubusa khona ukulunga.”—2 KaPitrosi 3:7, 13.
Godu isiporofido seBhayibhili sitjengisa bona isikhathi ‘sokuphela’ siseduze. Funda uMatewu 24:3-14 no-2 Thimothi 3:1-5 ukubona amatshwayo atjengisa bona lokho kuliqiniso. *
Akukumangazi bona kunerarano engaka ngoMatewu 24:14, ivesi ngitjho nomntwana omncani angalizwisisa? Kunamabanga walokho. USathana uphophaze abantu bona bangawatholi amaqiniso aligugu afumaneka eLizwini lakaZimu. (2 KwebeKorinte 4:4) Godu, uZimu ufihle iinhloso zakhe kilabo abazikhakhazisako wazivezela labo abathobekileko. Malungana nalokhu, uJesu wathi: “Baba, Kosi yezulu nephasi! Ngiyakuthokoza, ngombana utjengisile kwabangakafundi okufihlele abahlakaniphileko, nabafundileko, [wakwambulela abentwana, NW.]” (Matewu 11:25) Qala bona kulidumo kangangani ukuba hlangana nabathobekileko abazwisisa bona uMbuso kaZimu uyini begodu abaqale phambili embusisweni ozozilethela labo abawusekelako!
[Umtlolo waphasi]
^ isig. 11 Ukufumana imininingwana ezeleko, qala isahluko-9 sencwadi ethi Khuyini Kwamambala Okufundiswa YiBhayibhili? egadangiswa boFakazi BakaJehova.
[Isithombe ekhasini 9]
UMbuso uzoletha “ukuphela” kibo boke ubumbi ephasini