“Onthyulilo” oityi?

“. . . iya konyima onthyulilo aiya.”—MATEUS 24:14.

KONONTHELE ambuho mbouye ovanthu vapopia unene konthele yonthyulilo. Omikanda, no nosinema, vilingwa novanongo vouye vipopia unene konthele yononkhumbi ononene mambukamoneka monthiki yekoyeso. Mononkhumbi omo muakutikinya ovita viomauta omanene, no nonthungululu mambulivete kumwe, nomauvela maamane ovanthu, nomivo mavipiluluka, ine omamanya maatoko keulu.

Vonongeleya tupu vena omalusoke elikalaila; ovanyingi valongesa okuti “onthyulilo” maiya okumanako atyiho tyina omuenyo kombanda yoohi. Okupopia konthele ya Mateus 24:14, omulongesi umwe wahoneka okuti: “Oversikulu ei oyo yakolela vali Mondaka aiho ya Huku . . . Ovanthu vo hono vekahi mehanyu enene, kavehi puonthue venemone otyiponga otyinene ngotyo.”

Omalusoke ngoo aponya motyili tyimwe tyakolela: Jeova Huku “katungile oohi opo mukale vala tyihena natyike. [Mahi] weitunga opo mukale ovanthu.” (Isaías 45:18) Ngotyo, etyi Jesus apopia konthele “yonthyulilo,” oe katile oohi maiya okuhanyuapo; tupu katile ovanthu aveho maveya okuhanyuako. Mahi ankho ulekesa okuti onondingavivi, vana vokuhetavela okulandula ehongolelo ewa lia Jeova maveya okuhanyuako.

Tala ongeleka ei: Soka ñgeno una ondyuo imwe ongwa oyeke ovanthu vakalemo otyali. Vamwe vena ombembwa pokati kavo nokuyunga nawa ondyuo yove. Mahi, ovakuavo vaeta ovitateka ovinyingi, nokulwisa vakuavo, nokuleva vokuna ovituwa oviwa. Avahimbika okunyona ondyuo yove nokuhetavela etyi uvepopila.

Oityi ove una okulinga opo utetulule otyitateka otyo? Okuti mohanyepo ondyuo yove? Au. Tyafuile, motaatamo vala onomphuki nokulinga nawa ondyuo yove.

 Na Jeova otyo makalinga. Oe watuma omuhoneki wo no salmu ahoneke okuti: “Onondingavivi mavakanyimuako, mahi vana vakevelela ku Jeova ovo mavakapiñgana oohi. Apa katutu, ondingavivi kamaikakalako vali. Mokatala pana ankho ikala, mahi kukeivasapo vali. Mahi, ovatendi mavakapiñgana oohi, iya avakakala nombembwa onene.”—Salmo 37:9-11.

Apostolu Petulu nae watumua okuhoneka konthele yotyo okuti: “Tyetyi, mokonda yehando liavo, kavanoñgonokele otyili tyokuti tunde kohale mokonda yondaka ya Huku kuali eulu, noohi yatumbuluka kohi yomeva, aikala pokati komeva. Iya moluotyo, ouye wo kononthiki ombo, auhanyaunwako nomeva ombila onene.” (2 Pedro 3:5, 6) Apa o apostolu upopia konthele Yefindya lio kononthiki mba Noe. Ovanthu onondingavivi vahanyenueko, mahi oohi kayahanyenueko. Efindya olio liouye auho “lialekesa etyi matyikeya okumoneka nonondingavivi komutwe.”—2 Pedro 2:6.

Petulu wayawisako okuti: “Eulu noohi vikahiko hono, viapakwa pala otupia.” Inkha tuhulila vala apa, matukala nolusoke luapenga. Tala okuti oversikulu oyo itualako okupopia okuti: “Ehanyauko liovanthu onondingavivi.” Ehanyauno hapala oohi mahi opala ovanthu vahaumbila Huku. Oityi tyilandulako? Petulu wahoneka okuti: “Mahi, kuna eulu epe [Ouhamba wa Mesiya wa Huku] noohi omphe [ovanthu ovaviuki] tukahi nokukevelela ngetyi Huku alaa, muna mamukakala ouviuki.”—2 Pedro 3:7, 13.

Omaulo Ombimbiliya tupu alekesa okuti “onthyulilo” ikahi popepi. Tanga Mateus 24:3-14 na 2 Timóteo 3:1-5 opo utale etyi tyilekesa okuti otyo otyili. a

Katyihuvisa okutala enguanguano enene ovanthu vena konthele ya Mateus 24:14, oversikulu imwe ipondola okunoñgonokwa alo umwe nomona? Pena ehunga limwe. Satanasi ukahi nokutyilika ovanthu opo vehelilongese otyili tyakolela tyikahi Mondaka ya Huku. (2 Coríntios 4:4) Tupu, Huku waholeka ehando liae kovomalityindailo etyihololola kovokueliola omutima. Konthele yotyo, Jesus wati: “Ame ndyikuhivilika mounyingi, Tate, Muene weulu noohi, mokonda waholeka ovipuka evi kovanongo no vokualunguka, mahi wevihololola kovatutu.” (Mateus 11:25) Tyahumbwa unene okukala pokati kavana veliola omutima, vanoñgonoka oityi Ouhamba wa Huku, nokukevelela ononkhano onongwa mauwetela vana vaama kouhamba oo!

[Onondaka Poutoi]

[Olutalatu pefo 9]

Ouhamba wa Huku maukaeta “onthyulilo” pala ovivi aviho kombanda yoohi