“. . . bese-ke kuyefika kuphela.”​—MATEWU 24:14.

SEKUYE kwakhulunywa tintfo letinyenti mayelana nekuphela kwemhlaba. Tincwadzi, emabhayisikobho, kanye nabomagazini labakhuluma ngetindzaba letihlekisako nobe tesayensi, batsi kunetinhlekelele letehlukehlukene letisondzelako. Tihlanganisa imphi yenukliya, kushayisana kwemaplanethi lamancane, emagciwane labulalako, kushintja kwesimo selitulu lokungalawuleki, kanye netidalwa letihlaselako letivela emkhatsini.

Tinkholo nato tinemibono leyehlukehlukene; letinyenti tifundzisa kutsi “kuphela” kutawucedza tonkhe tintfo letiphilako emhlabeni. Ngesikhatsi lesinye sati senkholo sikhuluma nga-Matewu 24:14, sabhala nankha emavi lesabisako: “Leli ngulelinye lemavesi labaluleke kakhulu eVini laNkulunkulu . . . Situkulwane setfu sisengotini yekubhujiswa ngalokuphelele kangangekutsi asifuni nekuwucabanga umphumela lomubi waloko.”

Imibono lenjalo iyashayisana nanali liciniso lelibalulekile: Nkulunkulu Jehova “wawusekela” umhlaba, futsi “akazange awudalele kutsi ubete lutfo, kodvwa wawubumbela kutsi uhlale bantfu.” (Isaya 45:18) Ngako-ke, ngesikhatsi Jesu akhuluma ‘ngekuphela,’ abengasho kutsi umhlaba utawubhujiswa, nobe kutsi bantfu batawubhujiswa bonkhe. Kunaloko abesho kutsi bantfu lababi​—labo labatimisele kungaphili ngesicondziso saJehova selutsandvo—​batawubhujiswa.

Cabanga nganangu umfanekiso: Asesitsi unelikhaya lelihle loye wavumela bantfu kutsi bahlale kulo mahhala. Labanye balabo bantfu baphilisana ngekuthula futsi bayalinakekela lelikhaya lakho. Nanobe kunjalo, labanye babangela tinkinga letinyenti, balwa bodvwa, futsi bahlupha laba labanekuthula. Balimata imphahla yakho futsi bachubekela embili nemkhuba wabo ngisho nobe utsi uyabakhuta.

 Yini lobewungayenta kute ulungise lenkinga? Bewungalibhidlita yini likhaya lakho? Cha, bewungeke. Bewungacosha laba labahluphako futsi ulungise lomonakalo labawentile.

NaJehova utawukwenta lokufananako. Waphefumulela umhlabeli kutsi abhale: “Benti balokubi batawushabalaliswa; kodvwa labalindzela Simakadze bayakudla lifa lemhlaba. Emvakwesikhashana benti balokubi bayawunyamalala, uyakutsi uyabafuna bangabe basatfolakala. Kodvwa labamnene bayawulidla lifa lemhlaba, bahlale kahle, batijabulise ngekuthula lokukhulu.”​—Tihlabelelo 37:9-11.

Umphostoli Phetro wakhuluma ngendzaba lefananako. Njengobe abephefumulelwe, wabhala: “Emazulu abevele asakhona kadzenidzeni, [futsi] Nkulunkulu wakhuluma ngelivi lakhe, kwavela umhlaba emantini, wabasemkhatsini wemanti. Kwabuye kwaba ngiwo lawo manti, umhlaba lowabuye wabhujiswa ngawo.” (2 Phetro 3:5, 6) Kulamavesi, lomphostoli ukhuluma ngaZamcolo wangesikhatsi saNowa. Bantfu labebangamhloniphi Nkulunkulu babhujiswa, kodvwa umhlaba awuzange ubhujiswe. LoZamcolo ‘usibonelo kulabo labangamesabi Nkulunkulu.’​—2 Phetro 2:6.

Phetro wachubeka watsi: “Emazulu nemhlaba lokukhona nyalo kugcinelwe umlilo.” Kube besingagcina ngekufundza lamavi, besingatfola umbono loliphutsa. Caphela kutsi lelivesi lichubeka litsi: “Lapho kuyawubhujiswa khona labangamesabi Nkulunkulu.” Angeke kubhujiswe umhlaba, kodvwa kutawubhujiswa bantfu labangamesabi Nkulunkulu. Yini letawukwenteka emvakwaloko? Phetro wabhala: “Kepha ngesetsembiso sakhe silindzele emazulu lamasha [uMbuso waNkulunkulu loholwa nguMesiya], nemhlaba lomusha [bantfu labalungile], lapho kubusela khona kulunga.”​—2 Phetro 3:7, 13.

Siphrofetho seliBhayibheli siveta nekutsi “kuphela” sekusedvute. Fundza Matewu 24:3-14 kanye na-2 Thimothi 3:1-5 kute ubone tintfo letifakazela kutsi loku kuliciniso. a

Ucabanga kutsi kuyamangalisa yini kutsi kunekudideka lokunyenti ngaMatewu 24:14, lokulivesi ngisho nemntfwana langalicondza melula? Kunetizatfu letibangela loku. Sathane uphumphutsekise bantfu emacinisweni labalulekile latfolakala eVini laNkulunkulu. (2 Khorinte 4:4) Ngetulu kwaloko, Nkulunkulu utifihlile tinjongo takhe kubantfu labatigabatisako, watembulela labatfobekile. Mayelana nalendzaba, Jesu watsi: “Ngiyabonga, Babe, Nkhosi yelizulu nemhlaba, ngobe ukufihlile loku kulabahlakaniphile nalabanekucondza, wakwembula kulabo lababantfwana.” (Matewu 11:25) Kuyajabulisa kakhulu kuba semkhatsini walabo labatfobekile labacondzako kutsi uMbuso waNkulunkulu uyini vele, nalabangabuka embili etibusisweni lotawutiletsa kubo bonkhe labawusekelako.

[Umbhalo longentansi]

[Sitfombe ekhasini 9]

UMbuso utawuletsa “kuphela” emhlabeni, ucedze bonkhe bubi