“Buat hotu nia rohan” katak sá?

“. . . buat hotu nia rohan sei toʼo mai.”—MATEUS 24:14.

OHIN loron ema barak koʼalia buat oioin kona-ba mundu neʼe nia rohan. Ema hakerek livru no halo filme ba labarik no ema boot hodi konta kona-ba oinsá mundu neʼe sei lakon. Porezemplu, sira inventa istória katak mundu nia rohan sei mai liuhusi funu bomba nukleár, fatuk boot iha mundu nia liʼur neʼebé xoke mundu neʼe, virus neʼebé oho ema barak, mudansa ambiente, ka inimigu husi planeta seluk neʼebé ataka mundu neʼe.

Relijiaun barak mós iha hanoin oioin kona-ba neʼe; sira barak hanorin katak kuandu mundu nia “rohan” toʼo mai, ida-neʼe sei halakon buat hotu neʼebé moris iha mundu neʼe. Profesór teolojia nian ida fó sai ninia hanoin kona-ba liafuan iha Mateus 24:14 hodi dehan: “Versíkulu neʼe mak liafuan neʼebé importante liu hotu iha Maromak nia Liafuan . . . Ita-nia jerasaun sei hasoru situasaun aat, situasaun neʼe karik envolve dezastre neʼebé bele halakon mundu tomak, tan neʼe ema barak liu lakohi hanoin kona-ba ida-neʼe.”

Maibé ema neʼebé iha hanoin hanesan neʼe haluha buat neʼebé importante: Maromak Jeová mak ida neʼebé “halo mundu neʼe ho metin”; nia “la kria ho saugati deʼit, [maibé] halo mundu hodi ema hela iha mundu neʼe”. (Isaías [Yesaya] 45:18) Tan neʼe kuandu Jesus koʼalia kona-ba “buat hotu nia rohan”, nia la dehan katak mundu neʼe sei lakon, ka, katak ema hotu sei lakon. Maibé Jesus koʼalia kona-ba ema aat, katak sira neʼebé ho ulun-toos lakohi moris tuir Maromak Jeová nia matadalan, sira mak sei lakon.

Hanoin toʼok ai-knanoik ida-neʼe. Ita iha uma ida neʼebé kapás ho kuartu barak. Ita fó uma neʼe ba ema atu sira hela no lalika selu. Sira balu hela ho hakmatek no tau matan didiʼak ba Ita-nia uma. Maibé, sira seluk fali hamosu problema barak, sira istori malu no abuza ema sira neʼebé diʼak. Sira mós estraga Ita-nia uma no maski Ita  hakaʼas an atu hapara sira, maibé sira ulun-toos no lakohi halo tuir Ita.

Saida mak Ita sei halo atu hadiʼa situasaun neʼe? Ita sei sobu Ita-nia uma ka lae? Lae. Karik Ita sei duni sai ema neʼebé halo aat no hadiʼa buat neʼebé aat iha uma neʼe.

Maromak Jeová mós sei halo hanesan ba ema aat sira. Maromak nia atan ida hakerek: “Ema aat sira rasik sei lakon hotu, maibé ema neʼebé tau fiar nafatin ba Maromak Jeová sei simu rai. No tempu uitoan tan, ema laran-aat sei la iha, no imi sei hateke duni ba ninia fatin, no nia sei la iha. Maibé ema laran-maus sei simu rai, no sira sei haksolok tebes ho dame neʼebé la iha rohan.”—Salmo (Mazmur) 37:9-11.

Apóstolu Pedro mós koʼalia kona-ba buat neʼebé hanesan. Ho espíritu santu nia ajuda, nia hakerek: “Hodi Maromak nia liafuan, kleur ona mak lalehan sira mosu, no rai sai husi bee; no tan bee ida-neʼe, mundu iha tempu neʼebá lakon mout.” (2 Pedro 3:5, 6) Iha versíkulu sira-neʼe apóstolu Pedro koʼalia kona-ba Rai-Nabeen neʼebé akontese iha Noé nia tempu. Klaru katak ita-nia mundu la lakon, maibé mundu neʼebé lakon mout mak ema aat. Rai-Nabeen boot neʼe sai hanesan “ezemplu ida ba ema neʼebé la fiar Maromak”.—2 Pedro 2:6.

Apóstolu Pedro hatete: “Lalehan no rai ohin neʼe nian marka tiha ba ahi.” Kuandu ita lee toʼo iha neʼe deʼit, karik ita bele hanoin sala. Maibé apóstolu Pedro hatete tan: “Naʼi sei halo lakon ema aat sira.” Klaru katak rai sei la lakon maibé ema aat deʼit. Tuirmai saida tan mak sei akontese? Apóstolu Pedro hatutan tan: “Ita hein lalehan foun [Maromak nia Ukun liuhusi Jesus] no rai foun [ema laran-loos neʼebé hela iha rai], iha neʼebé justisa sei hela ba nafatin.”—2 Pedro 3:7, 13.

Sinál sira neʼebé Bíblia fó-hatene nanis hatudu katak “buat hotu nia rohan” besik ona. Ita bele lee iha Mateus 24:3-14 no 2 Timoteo 3:1-5 atu hatene liután kona-ba sinál sira-neʼe, neʼebé hatudu katak liafuan sira-neʼe sai loos daudauk. *

Karik agora Ita hanoin tansá mak iha konfuzaun barak kona-ba liafuan iha Mateus 24:14. Tuir loloos, ema iha konfuzaun tanba Satanás taka ema nia hanoin atu sira la bele hatene lia-loos furak sira neʼebé hakerek iha Maromak nia Liafuan. (2 Korinto 4:4) No mós, Maromak subar nia matenek husi ema neʼebé foti-an, maibé nia hatudu sai ninia matenek ba ema neʼebé haraik-an. Jesus koʼalia kona-ba neʼe hodi dehan: “Aman, Naʼi lalehan no rai nian, haʼu hahiʼi Ita tan Ita subar tiha buat hirak-neʼe ba ema matenek no neon-naʼin sira hodi hatudu ba kiʼik oan sira.” (Mateus 11:25) Ita sente agradese loos atu sai parte husi ema neʼebé haraik-an hodi komprende saida mak Maromak nia Ukun. No ita hein ba tempu neʼebé Maromak sei haraik bensaun ba sira neʼebé apoia ninia ukun!

[Nota–rodapé]

[Dezeñu iha pájina 9]

Maromak nia Ukun sei halakon buat aat iha mundu tomak