I Yini “Makumu”?

“. . . kutani hi kona makumu ma nga ta fika.”—MATEWU 24:14.

KU NI swilo swo tala leswi vuriwaka malunghana ni makumu. Tibuku, tifilimi ni timagazini swi vulavula ngopfu hi makumu, minkarhi yin’wana ku endliwa mafenya hi mhaka leyi naswona hambi ku ri sayense ya vulavula ha wona. Swi tlhela swi vula leswaku makumu ma ta tisiwa hi nyimpi ya nyutliya, ku onhaka ka pulanete ya hina leyitsongo, switsongwatsongwana leswi dlayaka, ku cinca-cinca ka maxelo loku nga lawulekiki kumbe hi swi-fa-mona leswi humaka empfhukeni.

Mavonelo ya vukhongeri na wona a ma fani emhakeni leyi; byo tala byi dyondzisa leswaku “makumu” ma ta herisa swivumbiwa hinkwaswo leswi hanyaka laha misaveni. Loko mufundhisi un’wana a vulavula hileswi nga eka Matewu 24:14, u vule marito lama tsemaka nhlana a ku: “Ndzimana leyi i yin’wana ya tindzimana ta nkoka swinene eRitweni ra Xikwembu . . . Vana va hina va langutane ni ndzoviso lowu loko hi wu ehleketa wu chavisaka swinene.”

Hakanyingi mavonelo yo tano ma bakanya mhaka yin’wana ya nkoka swinene: Yehovha Xikwembu u ‘simeke misava yi tiya, a nga yi tumbuluxelanga swa hava, kambe u yi vumbele leswaku ku akiwa eka yona.’ (Esaya 45:18) Kutani loko Yesu a vulavula hi “makumu,” a a nga vuli swona leswaku vanhu ni misava swi ta herisiwa. A a vula leswaku ku ta herisiwa vanhu vo homboloka, lava hi ku tiomisa nhloko va alaka ku hanya hi ku pfumelelana ni nkongomiso wa Yehovha wa rirhandzu.

Anakanya hi xikombiso lexi. A hi nge u ni kaya ro saseka naswona u pfumelela vanhu leswaku va tshama eka rona mahala. Van’wana va vona va hanyisana kahle ni van’wana naswona va ri khathalela kahle kaya ra wena. Kasi van’wana va vona va ku pandzisa ni nhloko, va lwa naswona va xanisa lavan’wana. Va onha nhundzu ya wena naswona a va yingisi hambiloko u va tsundzuxa.

I yini leswi a wu ta swi endla leswaku u lulamisa mhaka leyi? Xana a wu ta lovisa kaya ra wena? Nikatsongo.  Swi le rivaleni leswaku a wu ta hlongola vanhu volavo lava nga riki na mahanyelo kutani u lunghisa leswi va swi onheke.

Yehovha na yena u ta endla hilaha ku fanaka. U huhutele mupisalema ku tsala a ku: “Lava endlaka swo biha va ta herisiwa, kambe lava tshembaka Yehovha hi vona lava nga ta dya ndzhaka ya misava. Hi nkarhinyana, lowo homboloka a nge he vi kona; kunene u ta languta endhawini yakwe, u ta va a nga ri kona. Kambe lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.”—Pisalema 37:9-11.

Muapostola Petro u vulavule hi mhaka leyi fanaka. U huhuteriwe ku tsala a ku: “Khale a ku ri ni matilo ni misava leyi yimeke yi vumbana ehandle ka mati ni le xikarhi ka mati hi rito ra Xikwembu; naswona misava ya nkarhi wolowo yi lovisiwile ha wona loko mati ma yi khubumeta.” (2 Petro 3:5, 6) Eka ndzimana leyi, muapostola Petro a a vulavula hi Ndhambi ya nkarhi wa Nowa. Vanhu lava nga xi chaviki Xikwembu va lovisiwile, kambe misava a yi lovisiwanga. Ndhambi yoleyo leyi a yi ri emisaveni hinkwayo yi “vekela vanhu lava nga xiximiki Xikwembu xikombiso xa swilo leswi taka.”—2 Petro 2:6.

Petro u tlhele a ku: “Matilo ni misava leyi nga kona sweswi swi hlayiseriwe ndzilo.” Loko ho hlaya hi yima laha, hi nga gimeta hi mhaka leyi hoxeke. Xiya leswaku ndzimana leyi yi ya emahlweni yi ku: “Ni . . . ndzoviso wa vanhu lava va nga xi xiximiki Xikwembu.” Ndzoviso lowu taka a hi wa misava, kambe i wa vanhu lava nga xi chaviki Xikwembu. I yini leswi nga ta endleka endzhaku ka sweswo? Petro u tsale a ku: “Ku ni matilo lamantshwa [Mfumo wa Xikwembu lowu rhangeriwaka hi Mesiya] ni misava leyintshwa [vanhu vo lulama] leswi hi swi rindzeleke hi ku ya hi xitshembiso xa yena, naswona ku ta va ni ku lulama eka swona.”—2 Petro 3:7, 13.

Vuprofeta bya Bibele byi tlhela byi kombisa leswaku nkarhi wa leswaku “makumu” ma fika wu tshinele. Hlaya Matewu 24:3-14 na 2 Timotiya 3:1-5 leswaku u twa hi swiendlakalo leswi tiyisekisaka mhaka leyi. *

Xana swa ku hlamarisa ku tiva leswaku vanhu vo tala a va swi twisisi leswi Matewu 24:14 yi vulaka swona, ku nga ndzimana leyi twisisiwaka ni hi vana? Ku ni swivangelo leswi vangaka leswi. Xin’wana xa swona hileswaku Sathana u pfale vanhu mahlo leswaku va nga wu voni ntiyiso lowu nga eRitweni ra Xikwembu. (2 Vakorinto 4:4) Nakambe, Xikwembu xi fihlele vanhu lava tikurisaka swikongomelo swa xona kutani xi swi paluxela lava titsongahataka. Malunghana ni mhaka leyi, Yesu u te: “Tatana, ndza ku dzunisa erivaleni, Hosi ya tilo ni misava, hikuva swilo leswi u swi fihlele lavo tlhariha ni lava nga ni ku twisisa kutani u swi hlavutele swihlangi.” (Matewu 11:25) Hakunene i lunghelo ku va un’wana wa lava titsongahataka lava twisisaka leswi Mfumo wa Xikwembu wu nga swona naswona va languteleke mikateko leyi nga ta wu tisela vanhu lava wu seketelaka!

[Nhlamuselo ya le hansi]

[Xifaniso lexi nga eka tluka 9]

Mfumo wu ta ‘herisa’ vuhomboloki hinkwabyo emisaveni