„Wan kondre di lai merki nanga oni”

DI YEHOVAH GADO frulusu den Israelsma na ini katibo na Egepte, dan a pramisi fu tyari den ’go na wan bun èn bigi kondre. A ben o tyari den go na wan kondre di lai merki nanga oni.’​—Exodus 3:8.

Di den Israelsma ben e tan na ini a Pramisi Kondre, dan den ben e kweki kaw, skapu, nanga krabita, èn na so den ben abi bun furu merki. Ma dan fa a ben de nanga na oni? Son sma e bribi taki a wortu oni abi fu du nanga a sukru fu froktu soleki dadel, figa, noso droifi. Te Bijbel e taki fu oni fu wasiwasi, dan nofo tron dati ben de busi-oni. Na oni disi no ben de fu wasiwasi di sma ben e kweki (Krutuman 14:8, 9; 1 Samuel 14:27; Mateyus 3:1, 4). A de so trutru taki a kondre ben „lai” oni neleki fa a ben lai merki?

Wi e kon sabi moro fu a tori disi te wi e luku san sabiman di e ondrosuku owruten sani feni no so langa pasa na ini Israel. Wan Hebrew Universiteit ben taki disi fu den sani di den feni: „Disi na a moro owru onigodo di sma feni na wan presi na ini den owruten kondre fu owstusei, na so Professor (Amihai) Mazar taki. Na onigodo de fu a ten fu a di fu 10 yarihondro bifo Krestes te go miti a bigin fu a di fu 9 yarihondro bifo Krestes.”

Den sabiman ben feni moro leki 30 onigodo di ben de sei nanga sei na ini dri rèi, èn den e denki taki sowan 100 onigodo ben de na ini a heri kontren drape. Di den ondrosuku den onigodo, dan den feni pisi fu wasiwasi èn sosrefi onikaka. Sabiman e denki taki „sma ben man puru sowan 500 kilo oni ibri yari na den onigodo disi”.

Na ini owruten, sma no ben nyan oni nomo, ma den ben gebroiki onikaka tu te den ben meki sani fu isri nanga leer. Sma ben e gebroiki onikaka tu te den ben skrifi sani na tapu udu planga. Den ben kanti na onikaka na tapu a planga èn den ben kan skrifi wan boskopu na ini en. Wan sma ben kan smèlter na onikaka èn gebroiki en baka fu skrifi na ini. San den sabiman kon frustan fu a sani disi di den feni?

Na Universiteit ben taki moro fara: „Aladi Bijbel no e taki dati sma ben e kweki wasiwasi na ini Israel na a ten dati, toku den onigodo di den feni na Tel Rehov e sori taki sma ben e kweki wasiwasi èn den ben puru oni fu den godo. Boiti dati, a e sori tu taki a bisnis disi ben drai bun sensi a ten di [Salomo] ben bow a tempel. Sobun, te Bijbel e taki fu ’oni’, dan a kan de so taki a abi fu du nanga oni fu wasiwasi.”

[Sma di abi a reti fu a prenki na tapu bladzijde 15]

Institute of Archaeology/​Hebrew University © Tel Rehov Excavations