Nong Pwony Ki I Lok Pa Lubanga

Yecu Kricito En Anga?

Pwony man nyamo lapeny mogo ma gwok nyo ibedo ka tamogi dok bene nyutti ka ma itwero kwano iye lagamgi ki i Baibul-li. Lucaden pa Jehovah cwinygi bibedo yom me nyamo lagam magi kwedi.

1. Yecu Kricito en anga?

Mapat ki jo me lobo-ni, Yecu okwo i polo calo cwec me cwiny ma peya ginywale i lobo. (Jon 8:23) En obedo cwec mukwongo pa Lubanga, dok en okonyo i cweyo jami mukene-ni ducu. En kene aye ma Jehovah ocweyo en kikome dok meno omiyo kilwonge ni “latin acel keken” pa Lubanga. Yecu otiyo calo Lalok pi Lubanga, pi meno kilwonge bene ni “lok.”​—Jon 1:1-3, 14; kwan Carolok 8: 22, 23, 30; Jo Kolocai 1:15, 16.

2. Pingo Yecu obino i lobo?

Lubanga ocwalo Wode i lobo kun nako kwone ki i polo keto i i anyaka mo ma Lajudaya ma nyinge Maliam ma pud onongo pe ngeyo laco. Pi meno Yecu pe obedo ki wego ma dano. (Luka 1:30-35) Yecu obino i lobo pi tyen lok magi (1) me pwonyo lok ada madok i kom Lubanga, (2) me miyo lanen me timo miti pa Lubanga, (3) me miyo kwone ma labongo roc-ci me “koko jo mapol.”​—Kwan Matayo 20:28; Jon 18:37.

3. Pingo wamito ginkok?

Ginkok obedo wel cente ma kimiyo me gonyo ngat moni ki i kom gin mo. To kacel ki tiyo onongo pe gubedo but yub pa Lubanga pi dano. Wangeyo meno nining? Lubanga owaco bot laco mukwongo, Adam, ni tek en otimo gin ma Baibul lwongo-ni bal-li, en bito woko. Kono onongo Adam pe otim bal onongo en pe obito. Kadi bed kwo pa Adam otum inge mwaki mia mapol ata, en ocako tone inino ma en okwero bedo ki winy bot Lubanga. (Acakki 2:16, 17; 5:5) Adam okubo bot likwaye ducu bal kacel ki adwogine to. Pi meno, to “obino” i lobo kun a ki bot Adam. Man aye gin mumiyo wamito ginkok.​—Kwan Jo Roma 5: 12; 6:23.

  4. Pingo Yecu oto?

Anga ma onongo twero culo ginkok wek ogonywa ki i to? Ka wato nongo waculo pi balwa keken. Pe tye dano mo ma tye ki roc ma onongo twero culo pi bal pa ngat mukene.​—Kwan Jabuli 49:7-9.

Kit macalo Yecu pe olako kwede roc ki bot wego ma dano-ni, en oto, pe pi balle, ento pi bal pa jo mukene. Lubanga ocwalo Wode me to piwa me nyutu marre ma dok pat tutwal-li pi dano. Yecu bene onyutu marre botwa ki winyo Wonne kacel ki miyo kwone pi balwa.​—Kwan Jon 3:16; Jo Roma 5:18, 19.

5. Ngo ma Yecu tye ka timone i kareni?

Yecu onyutu gin ma ebitimo pi jo ducu ma gin luwiny kun cango two, cero jo muto, ki dong laro kwo pa jo ma gitye i peko. (Luka 18:35-42; Jon 5:28, 29) Inge to pa Yecu, Lubanga ocero en me kwo calo cwec me cwiny. (1 Petero 3:18) Lacen Yecu obedo inget Lubanga tung lacuc kun kuro ni Jehovah omiye twero me loc calo Kabaka ma loyo lobo lung. (Jo Ibru 10:12, 13) I kareni Yecu tye ka loc i polo calo Kabaka, kun lulub kore ma i lobo gitye ka tito kwena maber-ri i lobo ducu.​—Kwan Daniel 7:13, 14; Matayo 24:14.

Cokcok-ki, Yecu bitic ki tekone calo Kabaka me kelo agikki me pekki ducu kacel ki jo ma gikelo pekki magi. Dano Milion mapol ata ma ginyutu niyegi i kom Yecu kun giwinyo en gibibedo ki kwo mamit i paradic i lobo.​—Kwan Jabuli 37:9-11.

Pi ngec mukene, nen dul me 4 i buk, Baibul Mono Ada Pwonyo Gin Ango? ma Lucaden pa Jehovah aye gugoyo.

[Cal ma tye i pot karatac 11]

Jo milion mapol ata ma ginyutu niyegi i kom Yecu kun giwinyo en gibinongo mit pa kwo i paradic i lobo