Di Longe O Mak’â Nzambi

Jezú Kristu Nanhi?

O mbandu íii, ia-nda tambuijila o ibhuidisu nange i ua di bhangele kiá, ia-nda kulondekesa se kuebhi ku u tena ku sanga o itambuijilu mu Bibidia iê. O Jimbangi ja Jihova, a mesena kiavulu ku di longa o itambuijilu íii ni eie.

1. Jezú Kristu Nanhi?

Jezú ua kexile ku diulu ande dia kuíza mu ixi. (Nzuá 8:23) Muéne a dianga o ku mu bhanga kua Nzambi, muéne ua kuatekesa ué mu ku bhanga o ima ioso. Mukonda muéne a dianga ku mu bhanga kua Jihova, a mu ixana “Thungunu.” Jezú uexile o Mukunji ua Nzambi, mukonda dia kiki a mu ixana ué, “o Diambu.”—Nzuá 1:1-3, 14; tanga Jisabhu 8:22, 23, 30; Kolose 1:15, 16.

2. Mukonda diahi Jezú uéza mu ixi?

Nzambi ua tumikisa Mon’ê mu ixi, mu ta o muenhu uê mu mala dia muzeletete Madiia, mukua Judeia. Kienhiki, Jezú ka mu vuala ni tata mu xitu. (Luka 1:30-35) Ima itatu ia bheka Jezú mu ixi. (1) ku longa o kidi kia lungu ni Nzambi, (2) ku bhana phangu ia lungu ni ku bhanga o vondadi ia Nzambi, ni (3) ku bhana o muenhu uê ua iuka mu “kukula.”—Tanga Matesu 20:28; Nzuá 18:37.

3. Mukonda diahi kua bhingile ku tu kula?

O kukula, o kifutu kia bhana phala ku bhulula muthu. O kufuá ni ku kuka, ki kuxile vondadi ia Nzambi, kioso kia bhange o athu mu ixi. Kiebhi ki tua k’ijiia? Nzambi ua zuela ku diiala dia dianga, Adá, kuila se muéne ua tele kituxi kála ki zuela o Bibidia, ueji fuá. Maji se Adá ka tele kituxi, muéne keji kufuá. Adá ueji kala ku muenhu ua kalelaku, sé dizubhilu, muéne uafú mu kizuua kia bhukumukina Nzambi. (Dimatekenu 2:16, 17; 5:5) Adá ua bhitisa o kituxi kiê ni kufuá ku an’ê oso. Mukonda dia kiki, o kufuá kua “bokona” mu ngongo, mu kaxi ka Adá. Mukonda dia kiki, etu tua bhingile ku tu kula.—Tanga Loma 5:12; 6:23.

  4. Mukonda diahi Jezú uafú?

Nanhi ueji tu kula, phala ku tu bhulula mu kufuá? Kioso ki tu fuá, tu futa o kituxi kietu. Se-ku muthu mukuá ituxi, ueji tena ku futa o kituxi kia mukuá.—Tanga Jisálamu 49:7-9.

Mukonda Jezú ka lundula o kituxi kia tata mu xitu, muéne kafú mukonda dia ituxi iê, maji mukonda dia ituxi ia akuâ. Nzambi ua tumikisa o Mon’ê phala ku fuila bhu kididi kietu, phala kulondekesa o henda Iê ia dikota ku athu. Jezú ua londekesa ué o henda iê ko kuetu, mu ku belesela Tat’ê, ni ku bhana o muenhu uê phala ku futa o ituxi ietu.—Tanga Nzuá 3:16; Loma 5:18, 19.

5. Ihi ia mu bhanga Jezú lelu?

Mu ku saka o jihaxi, ku fukununa athu, ni ku bhulula athu akexile mu iluezu, Jezú ua londekesa o kima kia-nda bhanga mu ngongo, ku athu a belesela. (Luka 18:35-42; Nzuá 5:28, 29) Kioso Jezú kiafú, Nzambi ua mu fukununa mu ukexilu ua nzumbi. (1 Phetele 3:18) Jezú ua kingila ku mbandu ia kadilu ka Nzambi, katé Jihova kieji mu bhana o kutena kua ku tumina kála Sobha mu ixi ioso. (Jihebeleu 10:12, 13) Lelu, Jezú ua mu tumina kála Sobha ku diulu, o akaiedi’ê mu ixi, a mu boka o njimbu iambote ku mundu uoso.—Tanga Daniiele 7:13, 14; Matesu 24:14.

Kua kambe ngó, Jezú mu kutena kuê, kála Sobha, ua-nda zubha o jiphaxi joso mu ngongo, ni ku buika athu oso ene mu talesa hadi ku akuâ. Athu oso ene mu belesela, ala ni kixikanu kua Jezú, a-nda tambula o muenhu ua kalelaku mu palaízu mu ixi.—Tanga Jisálamu 37:9-11.

Phala kuijiia dingi, tanga o kibatulu 4 kia divulu didi, a di bhange ku Jimbangi ja Jihova. Mu Kidi Ihi i Longa o Bibidia?

[Foto ku bandu 11]

Athu oso ene mu belesela, ala ni kixikanu kua Jezú, a-nda tambula o muenhu ua kalelaku mu palaízu mu ixi