Longoka Muna Nkand’a Nzambi

Nani i Yesu Kristu?

Elongi diadi difimpanga yuvu lenda kiyuvula mu kuma kia Yesu. Disonganga mpe una lenda zayila mvutu muna Nkand’aku a Nzambi. Mbangi za Yave beyangalala kusadisa mu zaya mvutu za yuvu yaku.

1. Nani i Yesu Kristu?

Nswaswani yo wantu akaka, o Yesu una kayizidi ko ova ntoto, wateka zinga kun’ezulu nze vangwa kia mwanda. (Yoane 8:23) Yesu i vangwa kiantete kia Nzambi ye wansadisa muna sema lekwa yawonso. Yandi kaka wasemwa kwa yandi kibeni Yave, i kuma keyikilwanga vo Mwana “amosi kaka” a Nzambi. Yesu wakala mpe se Nkunzi a Nzambi. I kuma keyikilwanga vo “Diambu.”—Yoane 1:1-3, 14; tanga Ngana 8:22, 23, 30; Kolosai 1:15, 16.

2. Yesu nkia kuma kayizila ova ntoto?

O Nzambi muna fila Mwan’andi ova ntoto wasia o moyo andi muna vumu kia Maria wa mwenze a Yuda. Muna kuma kiaki, Yesu kakala ye se dia kimuntu ko. (Luka 1:30-35) Yesu wayiza ova ntoto (1) muna longa e ludi mu kuma kia Nzambi, (2) muna songa mbandu ya vanga luzolo lwa Nzambi ye (3) muna tambik’o moyo andi alunga se “lukûlu.”—Tanga Matai 20:28; Yoane 18:37.

3. Ekuma tuvwididi lukûlu o mfunu?

Lukûlu i ntalu ifutwanga mu kûla muntu una mu ubundu. O lufwa ye kinunu ke kiakala ko mun’ekani dia Nzambi mu kuma kia wantu. Aweyi tuzayidi wo? Nzambi wavovesa Adami wa muntu antete vo, kele vo ovangidi dina diyikilwanga mu Nkand’a Nzambi vo sumu, wadi fwa. Kele vo Adami kasumuka ko, kadi fwa ko. Kana una vo Adami wazinga mvu miayingi, wafwa muna lumbu kina kakolamena Nzambi. (Etuku 2:16, 17; 5:5) Adami wasambukisa esumu diandi ye tumbu kia lufwa kwa wan’andi awonso. Muna kuma kiaki, lufwa ‘lwakota’ mu nza yawonso muna Adami. E kiaki i kuma tuvwididi lukûlu o mfunu.—Tanga Roma 5:12; 6:23.

  4. Ekuma Yesu kafwila?

Nani wafwana futa lukûlu muna kutuvevola muna lufwa? Vava tufwanga tumbu ki’esumu dia yeto kibeni tufutanga. Ka vena muntu ko walembi lunga lenda kôla nkw’andi mun’esumu.—Tanga Nkunga 49:7-9.

Wau vo Yesu kasambukila esumu dia mase mandi ko ova ntoto, kafwila mu kuma ki’esumu diandi ko, kansi wafwa mu kuma kia sumu di’akaka. Muna kuma kia zola kwandi kwampwena muna wantu, Nzambi watuma Mwan’andi kafwa muna weto dieto. Yesu mpe wasonga zola muna lemvokela S’andi yo tambika moyo andi muna masumu meto.—Tanga Yoane 3:16; Roma 5:18, 19.

5. Yesu adieyi kevanganga owau?

Muna wuka mbevo, fula mafwa ye tanina wantu muna vonza, Yesu wasonga mana kesinga vanga kuna sentu mu kuma kia wantu awonso alemvoka. (Luka 18:35-42; Yoane 5:28, 29) Vava Yesu kafwa, Nzambi wamfula nze muntu a kimwanda. (1 Petelo 3:18) I bosi, Yesu wavingila kuna koko kwalunene kwa Nzambi yavana Yave kanyadika nze Ntinu a nza yawonso. (Ayibere 10:12, 13) Owau Yesu Ntinu kun’ezulu, alongoki andi ova ntoto besamunanga e nsangu zambote mu nza yawonso.—Tanga Daniele 7:13, 14; Matai 24:14.

Ke kolo ko, Yesu osadila wisa kiandi kia Kintinu mu sukisa mpasi zawonso y’awana betwasanga zo. Ndonga bekwikilanga yo lemvokela Yesu bevwa moyo muna paradiso ova ntoto.—Tanga Nkunga 37:9-11.

Muna zaya diaka mambu makaka, tala kapu kia 4 kia nkanda wau, wavaikiswa kwa Mbangi za Yave. O Nkand’a Nzambi ADieyi Kieleka Kelonganga?

[Foto ina muna lukaya lwa 25]

Ndonga bekwikilanga yo lemvokela Yesu bevwa moyo muna paradiso ova ntoto