Wantuku masiya xTachuwin Dios

¿Tiku Jesucristo?

Uma artículo namakgtayayan natekgsa kmiBiblia xtakgalhtin makgapitsi takgalhskinin nema wix max katsiputuna. Komo, lakaskina xtatayananin Jehová tlan natalikgalhtawakgakgoyan umakgolh takgalhskinin.

1. ¿Tiku Jesucristo?

Jesús ni chuna xwanit la amakgapitsin lakchixkuwin. Akxni nina xmin kKatiyatni chatum espíritu xwanit chu xlama kʼakgapun (Juan 8:23). Wa tiku Dios pulana tlawalh. Alistalh makgtayalh xTlat xlakata xtlawalh putum tuku anan. Biblia limapakuwi «nchatum xkam» uma wamputun pi kaj watiya xakstu Jehová tlawalh chu niti makgtayalh. Na talilakgapasa «nTachuwin», xlakata xpalakachuwinan Dios (Juan 1:1-3, 14; kalikgalhtawakga Proverbios 8:22, 23, 30 chu Colosenses 1:15, 16).

2. ¿Tuku xlakata Jesús milh kKatiyatni?

Xlakata Dios tlan xmakamilh xKgawasa unu kKatiyatni, matitaxtilh xlatamat kxpulakni chatum tsumat xalak Judá tiku xwanikan María. Wa xlakata Jesús ni kgalhilh chatum tlat xalak kKatiyatni (Lucas 1:30-35). Pulaktutu tuku xlakata Jesús milh kKatiyatni: 1) namasiya tuku xaxlikana xlakata Dios, 2) xkinkamasiyanin la natlawayaw tuku Dios lakaskin chu 3) namasta xlatamat nema ni xkgalhi talakgalhin xlakata «nalilakgmaxtukgo» latamanin. (Kalikgalhtawakga Mateo 20:28; Juan 18:37.)

3. ¿Tuku xlakata lakaskinaw wi tiku nakinkalakgmaxtuyan?

Akxni wi tiku lakgmaxtukan talakaskin naxokgokan xlakata namakgxtakgkan tiku lakgachiwilikanit. Tlan nawanaw pi kimputumkan kinkalakgachiwilinitan linin. Pero Dios ni wa tuku xlakaskin akxni katlawalh latamanin. Katsiyaw pi chuna xlakata Jehová wanilh Adán pi komo xtlawalh talakgalhin —o ni xkgalhakgaxmatli— xʼama niy. Komo ni xtitlawalh talakgalhin nikxni xnilh. Maski lhuwa ciento kata latamalhku, Adán tsukulh niy, kilhtamaku akxni ni kgalhakgaxmatnilh Dios (Génesis 2:16, 17; 5:5). Wa xlakata Biblia wan pi linin «ntsukulh» o tanulh kkakilhtamaku xpalakata Adán. Putum akinin, xkamanan Adán wa xlakata na lakgalhinanaw chu uma tlawa pi nakgolonaw chu naniyaw. Wa xlakata talakaskin wi tiku nakinkalakgmaxtuyan. (Kalikgalhtawakga Romanos 5:12 chu 6:23.)

 4. ¿Tuku xlakata nilh Jesús?

¿Tiku tlan kxokgolh xlakata nakinkalakgmaxtukanan klinin? Akxni niyaw, lixokgoyaw putum kintalakgalhinkan nema tlawaw. Chu xlakata kimputumkan lakgalhinanin, nitiku tlan xokgoni xtalakgalhin atanu. (Kalikgalhtawakga Salmo 49:7-9.)

Pero Jesús, ni xkgalhi talakgalhin, xlakata xtlat ni xalak Katiyatni xwanit chu ni matitaxtinika talakgalhin. Wa xlakata Jesús ni nilh xpalakata xtalakgalhin, wata nilh xlakata xkalakgmaxtulh latamanin ktalakgalhin. Xlikana, Dios lu kinkapaxkiyan asta makamilh xKgawasa xlakata namakgnikan kimpalakatakan. Chu Jesús na limasiyalh pi kinkapaxkiyan akxni kgalhakgaxmatli xTlat chu mastalh xlatamat xpalakata kintalakgalhinkan. (Kalikgalhtawakga Juan 3:16 chu Romanos 5:18, 19.)

5. ¿Tuku tlawama Jesús la uku?

Jesús kamakuchilh tatatlanin, kamalakastakwanilh tiku xnikgonita chu kamakgtayalh tiku xpatinamakgolh, chuna limasiyalh tuku xʼama tlawa xpalakata xlakskujnin Dios tiku ni makgxtakgkgo (Lucas 18:35-42; Juan 5:28, 29). Akxni Jesús nilh, Dios malakastakwanilh xlakata espíritu xwa chu kʼakgapun xlatamalh (1 Pedro 3:18). Chu lhuwa kilhtamaku titaxtulh asta akxni Jehová Mapakgsina tlawalh xlikalanka Katiyatni (Hebreos 10:12, 13). La uku Jesús kʼakgapun wi xpumapakgsin chu kstalaninanin lichuwinamakgolh «xatlan tamakatsinin» xlikalanka Katiyatni. (Kalikgalhtawakga Daniel 7:13, 14 chu Mateo 24:14.)

Nialh makgas Jesús nalimaklakaskin xlitliwakga xlakata nakamasputu tiku nitlan likatsikgo chu na namasputu putum tapatin nema anan. Lhuwa millones tiku kanajlanikgo Jesús chu kgalhakgaxmatkgo xatapaxuwan nalatamakgo kKatiyatni, nema akgtum paraíso nawan. (Kalikgalhtawakga Salmo 37:9-11.)

Komo tlakg katsiputuna xlakata uma, kaʼakxilhti capítulo 4 xla libro ¿Tuku xlikana masiya Biblia?, nema tlawakgonit xtatayananin Jehova.

[Epígrafe xla página 11]

Lhuwa millones tiku kanajlanikgo Jesús chu kgalhakgaxmatkgo xatapaxuwan nalatamakgo kKatiyatni, nema akgtum paraíso nawan