Mga Magbabasa Nangutana . . .

Gilalang ba sa Diyos ang Yawa?

▪ Sanglit giingon sa Bibliya nga ang Diyos “naglalang sa tanang butang,” gihunahuna sa uban nga ang Diyos mao gayod ang naglalang sa Yawa. (Efeso 3:9; Pinadayag 4:11) Tin-awng gipakita sa Bibliya nga Siya wala gayod maglalang sa Yawa.

Gilalang ni Jehova ang persona nga nahimong Yawa. Busa, ang pagtungha niining usa nga mao ang pangunang magsusupak sa Diyos kinahanglang subay sa kon unsay gibutyag sa Bibliya bahin kang Jehova ingong Maglalalang. Bahin kaniya, kini giingon: “Hingpit ang iyang kalihokan, kay ang tanan niyang dalan hustisya. Usa ka Diyos sa pagkamatinumanon, nga kaniya walay inhustisya; matarong ug matul-id siya.” (Deuteronomio 32:3-5) Pinasukad niini, atong ikahinapos nga si Satanas kanhi hingpit ug matarong, nga mao, usa sa mga manulondang anak sa Diyos. Sa Juan 8:44, si Jesus miingon nga ang Yawa “wala mobarog nga lig-on diha sa kamatuoran,” nga nagpailang si Satanas kanhi matinud-anon ug walay sala.

Apan, sama sa ubang intelihenteng mga linalang ni Jehova, ang manulonda nga nahimong Satanas may kagawasan sa pagpili tali sa husto ug sayop. Pinaagi sa iyang pagsupak sa Diyos ug sa pag-agni sa unang magtiayon sa pagduyog kaniya, siya naghimo sa iyang kaugalingon nga Satanas, nga nagkahulogang “Magsusukol.”—Genesis 3:1-5.

Ang maong daotan nga espiritung linalang naghimo usab sa iyang kaugalingon nga Yawa, nga nagkahulogang “Tigbutangbutang.” Si Satanas mao ang dili makitang linalang nga nagpaluyo sa halas ug tusong naglingla kang Eva sa pagsupak sa tin-awng balaod sa Maglalalang. Mao kanay hinungdan nga si Jesus nagtawag kang Satanas nga “ang amahan sa bakak.”—Juan 8:44.

Apan, nganong nakasala man ang hingpit nga espiritung linalang, nga wala man unta siyay mga kahuyangon ni impluwensiya sa palibot? Dayag nga iyang gitinguha ang pagsimba nga iya lamang sa Diyos ug gipangandoy nga ang mga tawo mailalom sa iyang pagmando inay kang Jehova. Inay wad-on kini sa iyang hunahuna, siya nagpadayon hinuon sa pagpamalandong nga mahuptan kini nga pagmando, hangtod nga iya ra gayod kining gibuhat. Susama kini sa gihubit sa basahon ni Santiago: “Ang matag usa masulayan pinaagi sa pagkaganoy ug pagkahaylo sa iyang kaugalingong tinguha. Unya ang tinguha, sa dihang kini makapanamkon na, manganak ug sala.”—Santiago 1:14, 15; 1 Timoteo 3:6.

Sa pag-ilustrar: Hunahunaa ang usa ka accountant nga nakakitag kahigayonan nga doktoran ang mga rekord aron siya makapangawat sa kompaniya. Mahimong wad-on dayon niya kini sa hunahuna. Apan kon siya magsigeg hunahuna niini, nan mosamot ka dako ang iyang tinguha, ug lagmit iya kining himoon. Kon iya kanang buhaton, siya naghimo sa iyang kaugalingon nga kawatan. Kon siya molimod sa iyang sala, siya mahimong bakakon usab. Sa susama, pinaagi sa pag-ugmad ug daotang mga tinguha ug sa pagbuhat niini, ang manulonda nga gilalang sa Diyos migamit sa iyang kagawasan sa pagpili aron manglimbong ug morebelde sa iyang Amahan, ug busa naghimo sa iyang kaugalingon nga Satanas nga Yawa.

Mapasalamaton kita nga sa takdang panahon sa Diyos si Satanas nga Yawa pagalaglagon. (Roma 16:20) Sa kasamtangan, ang mga magsisimba ni Jehova nga Diyos gipahibalo sa mga taktika ni Satanas ug gihatagag proteksiyon batok sa iyang mga malipatlipatong kaugdahan. (2 Corinto 2:11; Efeso 6:11) Busa, kutob sa mahimo, “sukli ang Yawa, ug siya mokalagiw gikan kaninyo.”—Santiago 4:7.

[Blurb sa panid 21]

Pinaagi sa iyang pagsupak sa Diyos, ang hingpit nga manulonda naghimo sa iyang kaugalingon nga Satanas