Pamangkot sang mga Bumalasa . . .

Gintuga Bala sang Dios ang Yawa?

▪ Suno sa Biblia ang Dios ang “nagtuga sang tanan nga butang,” gani siling sang iban gintuga sang Dios ang Yawa. (Efeso 3:9; Bugna 4:11) Pero ginatudlo sang Biblia nga indi ini matuod.

Si Jehova ang nagtuga sa persona nga nangin Yawa. Para maintiendihan naton kon paano nagluntad ining panguna nga manugpamatok sang Dios, tan-awon naton ang ginasiling sang Kasulatan kay Jehova bilang Manunuga. Aton mabasa: “Ang iya binuhatan himpit; kay ang tanan niyang dalanon katarungan. Dios sang katutum kag walay kalautan, matadlong kag matarung sia.” (Deuteronomio 32:3-5) Base sa sini, masiling naton nga sang una si Satanas perpekto kag matarong, kay isa sia ka anghel sang Dios. Sa Juan 8:44, si Jesus nagsiling nga ang Yawa ‘wala magpabilin nga malig-on sa kamatuoran,’ nga nagapakita nga sang una si Satanas indi butigon kag wala sing sala.

Pero pareho sa iban nga intelihente nga mga tinuga ni Jehova, ang anghel nga nangin Satanas may kahilwayan sa pagpili sa maayo kag malain. Ginpili niya nga magpamatok sa Dios kag ginsulay ang una nga mag-asawa nga magbuylog sa iya. Gani, ginhimo niya ang iya kaugalingon nga Satanas, nga nagakahulugan “Manugpamatok.”—Genesis 3:1-5.

Ginhimo man sining malaut nga espiritu ang iya kaugalingon nga Yawa, nga buot silingon “Manugpasipala.” Si Satanas amo ang sa likod sang man-ug nga nagpahito sang kabutigan para masulay si Eva nga supakon ang maathag nga sugo sang Manunuga. Amo nga gintawag ni Jesus si Satanas nga “amay sang kabutigan.”—Juan 8:44.

Pero paano makahimo sing sala ang isa ka perpekto nga espiritu, nga wala sing kaluyahon kag wala man sing malaut nga impluwensia sa palibot niya? Maathag nga ginhandum niya ang pagsimba nga para lamang sa Dios kag nakita niya nga puede nga sia ang maggahom sa mga tawo imbes nga si Jehova. Sa baylo nga kalimtan, padayon niya ini nga ginhandum asta nga nangita sia sing paagi nga matuman ini. Ini nga proseso ginlaragway sa tulun-an sang Santiago: “Ang kada isa ginatilawan kon ginaganyat sia kag ginahaylo sang iya kaugalingon nga kailigbon. Nian ang kailigbon, kon nakapanamkon na, nagabun-ag sang sala.”—Santiago 1:14, 15; 1 Timoteo 3:6.

Sa pag-ilustrar: May isa ka accountant nga nakakita sing kahigayunan nga islan ang mga rekord para makawatan niya ang kompanya. Mahimo niya kalimtan dayon ining sala nga handum. Pero kon pensaron niya ini pirme, maganyat pa gid sia, kag sa ulihi himuon na niya ini. Kon matabo, sia mismo ang naghimo sa iya kaugalingon nga kawatan. Kon indi niya ini pag-akuon, mangin butigon pa gid sia. Pareho sa sini, ginapensar pirme sining anghel ang sala nga handum kag ginhimo ini. Gingamit niya ang iya kahilwayan sa pagpili para magbutig kag magrebelde sa iya Amay, gani ginhimo niya ang iya kaugalingon nga Satanas nga Yawa.

Maayo lang kay maabot ang tion nga laglagon sang Dios si Satanas nga Yawa. (Roma 16:20) Samtang wala pa ina, ginapaandaman ang mga sumilimba ni Jehova nga Dios batok sa mga pahito ni Satanas kag ginaproteksionan sila sa sini. (2 Corinto 2:11; Efeso 6:11) Gani, himua ang imo masarangan nga ‘pamatukan ang Yawa, kag magapalagyo sia sa imo.’—Santiago 4:7.

[Blurb sa pahina 21]

Ginpili sang isa ka perpekto nga anghel nga pamatukan ang Dios, gani ginhimo niya ang iya kaugalingon nga Satanas