Ro Rej Riiti Bok ko Ad Rej Kajjitõk . . .

Anij ear ke kõm̦anm̦an Tepil̦ eo?

▪ Baibõl̦ eo ej kwal̦o̦k bwe Anij ear “kõm̦anm̦an men ko otemjej.” Kõn men in, jet armej rej l̦õmn̦ak bwe Anij ear bareinwõt kõm̦anm̦an Tepil̦ eo. (Epesõs 3:9; Revelesõn 4:11) Bõtab, Baibõl̦ eo ej kalikkar bwe Anij ear jab kõm̦anm̦ane Tepil̦ eo.

Jeova Anij ear kõm̦anm̦an aolep enjel̦ ro. Juon iaan enjel̦ rein ear oktak im erom Tepil̦ eo. Ewi wãween ad jel̦ã bwe aolep men in kõm̦anm̦an ko an Jeova ilo jinoin rar weeppãn? Baibõl̦ eo ej ba: “Kõmmõn ko an otemjej rejimwe im wãnik; Anij . . . etiljek im mol; Kõmmõn ko an remmõn im jejjet.” (Duteronomi 32:3-5, UBS) Ekkar ñan eoon in, Setan ear juon iaan enjel̦ ro nejin Anij. Ear weeppãn im wãnõk ke Jeova ear kõm̦anm̦ane. Ekkar ñan Jon 8:44, Jijej ear ba bwe Tepil̦ eo ear jab to an “jutak ilo m̦ool” eo. Men in ej kalikkar bwe ilo kar jinoin, Tepil̦ eo ear juon enjel̦ eweeppãn im ear jerbal ñan Anij ilo m̦ool.

Jeova ear lel̦o̦k ñan aolep enjel̦ ro im armej ro maroñ eo ñan kõm̦m̦an aer make jokãlõt. Ewõr maroñ in ippãn Tepil̦ eo bareinwõt. Innem ear kããlõt ñan jum̦ae Anij im ear kapoiki armej ro ruo m̦oktata ñan kobal̦o̦k ippãn. Ilo wãween in, ear make kõm̦m̦an bwe en erom Setan. Naan in Setan ej mel̦el̦ein “Ri Jum̦ae.”—Jenesis 3:1-5.

Enjel̦ in enana ear bareinwõt make kõm̦m̦an bwe en erom Tepil̦ eo. Naan in Tepil̦ ej mel̦el̦ein “Ri Ruruwe.” Ewi wãween an kar erom men in? Eokwe, ear kajerbale juon jedpãnit ñan m̦on̦e Iv bwe en jab pokake kien eo an Jeova. Eñin unin Jijej ear ba bwe Setan ej “jemãn riab.”—Jon 8:44.

Ilo jinoin, ear ejjel̦o̦k nana im ear ejjel̦o̦k ri nana. Ak kiiõ, ewi wãween an kar enjel̦ in me eweeppãn maroñ kar oktak im kõn̦aan kõm̦m̦ani men ko renana? Eokwe, ear kõn̦aan bwe armej ro ren kabuñ ñan e im jab ñan Jeova. Bareinwõt, ear kõn̦aan irooj ioon aolep armej ro. Ijello̦kun an jol̦o̦k l̦õmn̦ak in jãn e, ear likũt wõt ilo bũruon. Tokãlik, ear em̦m̦akũt ekkar ñan kõn̦aan eo an enana. Bok in Jemes ej kõmel̦el̦eiki wãween in ear wal̦o̦k. Ej ba: “Ak kabo ñõn juõn armij ej itok jen kõnan ko an renana rej kejebwãbweiki im aujidi. Innem kõnan kein renana rej keotak jerawiwi, im ñe jerawiwi ej ekkeke im lab ej keotak mij.”—Jemes 1:14, 15, UBS; 1 Timote 3:6, UBS.

Ñan waanjoñak: Juon ri jerbal ilo juon m̦õn wia ekõn̦aan ko̦o̦te jããn ko an m̦õn wia eo. Armej in emaroñ jol̦o̦ke l̦õmn̦ak in enana. Bõtab el̦aññe ejjab, l̦õmn̦ak in emaroñ kõm̦m̦akũte bwe en ko̦o̦t. Ñe enaaj ãindein, ear make kõm̦m̦an bwe en erom ri ko̦o̦t. Innem ñe renaaj ekajete im ejjab kwal̦o̦k m̦ool, ear make kõm̦m̦an bwe en ri riab. Eñin men eo ear wal̦o̦k ñan enjel̦ eo enana. Ear jab m̦õkaj im jol̦o̦k kõn̦aan eo an enana, im tokãlik ear kõm̦m̦ane. Enjel̦ in ear make kããlõt bwe en riab n̦ae im jum̦aeiki Jemen. Kõn men in, enjel̦ in make ear kõm̦m̦an bwe en erom Setan Tepil̦ eo.

M̦õttan wõt jidik ilo iien eo em̦õj an Anij karõke, enaaj ko̦kkure Setan Tepil̦ eo. (Rom 16:20) M̦ae tõreen̦, Jeova ej kakkõl armej ro doon bwe ren kõjparok er jãn jerbal im l̦õmn̦ak ko retao an Setan. (2 Korint 2:11; Epesõs 6:11) Kõn men in, kõj aolep jen “jum̦ae tepil̦, im enaaj ko jãn” kõj.—Jemes 4:7.

[Picture on page 9]

Ke juon enjel̦ eweeppãn ear jum̦ae Anij, ear make kõm̦m̦an bwe en oktak im erom Setan Tepil̦ eo