Babadi ba Rena ba a Botšiša . . .

Na Modimo o Bopile Diabolo?

▪ Ka ge Beibele e re Modimo o “bopile dilo ka moka,” ba bangwe ba ile ba phetha ka gore Modimo o swanetše go ba a bopile Diabolo. (Baefeso 3:9; Kutollo 4:11) Beibele e bontšha gabotse gore ga se a dira bjalo.

Jehofa o bopile motho yo a ilego a fetoga Diabolo. Ka baka leo, go ba gona ga motho yo e le moganetši yo mogolo wa Modimo go swanetše go tswalanywa le seo Mangwalo a se utollago ka Jehofa bjalo ka Mmopi. Ge a bolela ka yena a re: “Mediro ya gagwe e phethagetše, gobane ditsela tša gagwe ka moka ke tša toka. Ke Modimo yo a botegago, yoo go yena go se nago go hloka toka; o lokile e bile o letlile.” (Doiteronomio 32:3-5) Go tšwa polelong ye, re ka phetha ka gore Sathane ka nako e nngwe o kile a ba yo a phethagetšego le yo a nago le toka, ka go lebanya re ka re, e be e le yo mongwe wa barwa ba Modimo ba barongwa. Go Johane 8:44, Jesu o boletše gore Diabolo “ga se a ka a ema a tiile therešong,” a era gore Sathane o be a kile a botega e bile a se na molato.

Lega go le bjalo, go swana le dibopiwa ka moka tše bohlale tša Jehofa, morongwa yo a ilego a fetoga Sathane o be a na le tokologo ya go kgetha se se lokilego le se se fošagetšego. Ka go kgetha tsela ya go ganetša Modimo le go tutuetša batho ba pele ba babedi gore ba mo tlatše, o ile a itira Sathane, e lego lentšu leo le rago gore “Moganetši.”—Genesi 3:1-5.

Sebopiwa seo se kgopo sa moya se ile sa ba sa itira Diabolo, yeo e rago gore “Mothomeletši.” Sathane e be e le moikgakanyi yo a sa bonagalego yo a bego a diriša noga gomme ka maano a diriša maaka go radia Efa gore a tshele molao woo o hlalositšwego gabotse wa Mmopi. Ke ka baka leo Jesu a biditšego Sathane a re ke “tatago maaka.”—Johane 8:44.

Lega go le bjalo, ke bjang sebopiwa se se phethagetšego sa moya—seo se se nago mafokodi a ka gare goba ditutuetšo tše mpe—se ka sekamelago bobeng? Go molaleng gore se be se kganyoga borapedi bjoo e lego bja Modimo a nnoši gomme sa bona kgonagalo ya go dira gore batho ba bušwe ke sona go e na le go bušwa ke Jehofa. Ka go tšwela pele se hlagolela kgopolo ye ya go ba mmuši go e na le go e lahla, se ile sa dumelela kgopolo ye e gola go fihlela ge mafelelong se gata mogato. Megato yeo e hlaloswa ka pukung ya Jakobo, e rego: “Yo mongwe le yo mongwe o lekwa ka go gogwa le go goketšwa ke kganyogo ya gagwe. Ke moka kganyogo ge e gotše e tswala sebe.”—Jakobo 1:14, 15; 1 Timotheo 3:6.

Ka mohlala: Nagana ka ramatlotlo yo a bonago sebaka sa go šarakanya dipego e le gore a ikhole ka go utswetša khamphani. A ka akgofela go phaela ka thoko kgopolo yeo e fošagetšego. Go fapana le moo, ge e ba a ka hlagolela kgopolo yeo, gona e tla gola gomme a ka dira ka go dumelelana le yona. Ge e ba a ka dira bjalo, ge e le gabotse o iphetoša lehodu. Ge e ba a bolela maaka ka bosenyi bjoo, o fetoga le moaketši. Ka tsela e swanago, ka go hlagolela dikgopolo tše di fošagetšego le go di phethagatša, morongwa yo Modimo a mmopilego o dirišitše tokologo ya gagwe ya boikgethelo go fora le go rabela kgahlanong le Tatagwe, ka gona a iphetoša Sathane Diabolo.

Se se kgahlišago ke gore Sathane Diabolo o tla fedišwa ka nako ya Modimo e swanetšego. (Baroma 16:20) Go sa le bjalo, barapedi ba Jehofa Modimo ba lemošwa ka maano a Sathane gomme ba šireletšwa ditirong tša gagwe tša bohwirihwiri. (2 Bakorinthe 2:11; Baefeso 6:11) Ka gona, ka mešegofela, ‘ganetša Diabolo, yena o tla go tšhaba.’—Jakobo 4:7.

[Ntlhakgolo go letlakala 21]

Sebopiwa se se phethagetšego sa moya se ile sa iphetoša Sathane ka go kgetha go ganetša Modimo