Ua Fesili Mai le ʻAufaitau . . .

Pe na faia e le Atua le Tiapolo?

▪ Talu ai o loo faapea mai le Tusi Paia, o le Atua na “foafoaina mea uma,” ua manatu ai nisi na foafoaina foʻi la e le Atua le Tiapolo. (Efeso 3:9; Faaaliga 4:11) Ae ua faamanino mai i le Tusi Paia, e na te leʻi foafoaina le Tiapolo.

Na foafoaina e Ieova le agelu o lē na avea mulimuli ane ma Tiapolo. O lea la, pe a tatou malamalama i mea o loo taʻua i le Tusi Paia e faatatau iā Ieova Lē na foafoaina mea uma, ona tatou iloa ai lea pe na faapefea ona iai le Tiapolo. Ua taʻua Ieova o Lē: “E atoatoa ona lelei ana gaoioiga, auā e tonu ona ala uma. O le Atua faamaoni, e lē o iā te ia se faiga lē tonu; e amiotonu ma amio saʻo o ia.” (Teuteronome 32:3-5) E tatou te iloa mai i lenā faamatalaga, sa iai se taimi na lelei atoatoa ma amiotonu ai Satani, o se tasi o atalii agelu o le Atua. Na fetalai Iesu i le Ioane 8:44, “e leʻi tumau lava o ia i le upu moni,” o lona uiga sa iai se taimi na faamaoni ai Satani ma lē ponā.

Ae peitaʻi, sa iai i le agelu lea na avea ma Satani le saʻolotoga e filifili ai i le mea saʻo ma le mea sesē, e pei foʻi o isi foafoaga atamamai uma a Ieova. O lona filifili e tetee i le Atua ma faaosooso le uluaʻi ulugalii e ʻau ma ia, ua avea ai o ia lava ma Satani, o lona uiga “O Lē tetee.”—Kenese 3:1-5.

Na avea foʻi lenā foafoaga agaga amioleaga ma Tiapolo, o lona uiga “O Lē taufaaleaga.” O Satani, o le taufaasesē lē vaaia lea na faaaogā le gata e maileia Eva i ana pepelo, ma lē usiusitaʻi ai i le tulafono a Lē na faia i laʻua. O le pogai lenā ua taʻua ai e Iesu Satani, o “le tamā o le pepelo.”—Ioane 8:44.

Ae e faapefea ona faasesēina se foafoaga agaga e lelei atoatoa, ma e leai ni ona vaivaiga po o ni aafiaga leaga mai isi? E foliga mai, sa ia faanaunau i le tapuaʻiga lea e na o le Atua e avatu i ai, ma na ia iloa e mafai ona gauaʻi atu tagata iā te ia, ae lē o Ieova. O lona mafaufau pea i le fia avea ma pule nai lo o le faateʻa ese o na manatu, na ia faatino ai loa ona faanaunauga. Ua faamatalaina lenā gaoioiga i le tusi o Iakopo: “Ua faaosoosoina tagata taʻitoʻatasi ona ua tosina ma maileia i ona lava tuʻinanau. Auā a tō le tuʻinanau, ona fanau mai ai lea o le agasala.”—Iakopo 1:14, 15; 1 Timoteo 3:6.

O se faataʻitaʻiga: Seʻi manatu i se tagata e tausia faamaumauga o tupe a se kamupani, ma ua ia maua se avanoa e sui ai faamaumauga ma gaoia ai tupe a le kamupani. E mafai ona ia faateʻa ese ia manatu sesē. Ae afai e mafaufau pea i ai, e oo ina manaʻo e fai ma faatino loa. O lona faia faapea, ua avea ai o ia ma gaoi. Afai e lē taʻutino maia lana solitulafono, ua avea foʻi o ia ma pepelo. I se auala talitutusa, o le mafaufau pea i faanaunauga sesē ma faatino, na faaaogā ai e le agelu lea na foafoaina e Ieova lona saʻolotoga e filifili ai, e taufaasesē ma tetee ai i lona Tamā, ma avea ai loa ma Satani le Tiapolo.

O le mea e lelei ai ona o le a faaumatia e le Atua Satani i lana taimi atofaina. (Roma 16:20) Ae o lea ua faailoa atu i tagata tapuaʻi o Ieova togafiti a Satani, faapea ma le auala e puipuia ai i latou. (2 Korinito 2:11; Efeso 6:11) O lea la, ia matuā “tetee atu i le Tiapolo, ona sola ese ai lea o ia mai iā te outou.”—Iakopo 4:7.

[Faamatalaga i le itulau 21]

O lona filifili e tetee i le Atua ua faia ai e le agelu lelei atoatoa o ia lava ma Satani