Leisiman e aksi . . .

Na Gado meki Didibri?

▪ Fu di Bijbel e taki dati na Gado „meki ala sani”, meki son sma e denki taki a musu de so taki Gado meki Didibri (Efeisesma 3:9; Openbaring 4:11). Bijbel e sori krin taki a no Gado meki Didibri.

Yehovah ben meki a sma di kon tron Didibri. Sobun, en na a moro bigi gensman fu Gado. Ma fa disi e kruderi nanga san Bijbel e tyari kon na krin fu Yehovah leki a Mekiman? Bijbel e taki fu wi Mekiman: „A e du sani di bun dorodoro. A e krutu ala sani na wan reti fasi. A de wan getrow Gado di no e du kruktudu. A lobi retidu èn a e du sani na wan reti fasi” (Deuteronomium 32:3-5). Den wortu disi e sori taki wan ten ben de di Satan ben de sondro fowtu èn a ben du san reti fu di a ben de wan fu den yeye manpikin fu Gado. Na ini Yohanes 8:44, Yesus ben taki dati Didibri „no ben tanapu kánkan na ini a waarheid”. Dati e sori taki wan ten ben de di Satan ben taki san tru èn a no ben du ogri.

Ma neleki ala den tra engel fu Yehovah, na engel di kon tron Satan ben kan bosroiti gi ensrefi fu du san bun noso san no bun. Di a bosroiti fu gens Gado èn a meki a fosi libisma trowpaar teki en sei, dan a meki ensrefi kon tron Satan, san wani taki „Gensman”.​—Genesis 3:1-5.

Na ogri yeye dati, meki ensrefi kon tron Didibri tu, san wani taki „Ogri-ati leiman”. Satan ben meki a gersi leki a sneki ben taki, èn na wan koni fasi a gebroiki lei fu kori Eva so taki a trangayesi a krin wet di a Mekiman ben gi. Dati meki Yesus ben kari Satan „a tata fu ala lei”.​—Yohanes 8:44.

Na engel disi di ben bun dorodoro no ben abi nowan swakifasi, èn ogri no ben de lontu en di ben kan abi krakti na en tapu. Ma fa a du kon taki a du ogri? Soleki fa a sori, dan a ben angri fu sma anbegi en, aladi Gado wawan abi a reti taki sma anbegi En. Boiti dati, a ben si wan fasi fu meki libisma kon na ondro a tiri fu en na presi fu di fu Yehovah. Na presi fu puru a prakseri na en ede taki a wani tiri, a tan denki a sani disi èn te fu kaba a du san a ben abi na prakseri. A Bijbel buku Yakobus e sori fa a sani disi e pasa: „Ma ibri sma e kisi tesi fu di en eigi lostu e hari en èn e kori en. Dan te a lostu kon lepi, a e tyari sondu kon.”​—Yakobus 1:14, 15; 1 Timoteyus 3:6.

Fu eksempre: Kon meki wi taki dati wan sma di e luku den moni afersi fu wan bisnis e si taki a kan drai sani na so wan fasi taki a kan fufuru moni fu a bisnis fu kon gudu. A kan puru a prakseri dati wantewante na en ede. Ma efu a e tan prakseri a sani dati, dan a o bigin lobi a tori disi èn te fu kaba a o du en. Fu taki en leti, te a du dati, dan a e meki ensrefi tron wan fufuruman. Efu a e lei fu na ogri di a du, dan a e kon tron wan leiman tu. Na wan srefi sortu fasi na engel di Gado ben meki, ben tan prakseri den ogri sani di a ben abi na en ede èn a ben go du den sani dati. Na so a gebroiki a grani di a abi fu teki en eigi bosroiti, fu kori sma èn fu opo ensrefi teige en Tata. Sobun, a meki ensrefi kon tron Satan Didibri.

Koloku taki Gado poti wan ten te a o pori Satan Didibri (Romesma 16:20). Fosi a ten dati doro, den anbegiman fu Yehovah Gado e kon sabi san Satan abi na prakseri èn den e kisi kibri fu den triki fu en (2 Korentesma 2:11; Efeisesma 6:11). Fu dati ede, du ala san yu man fu ’kakafutu gi Didibri, èn a sa lon gowe fu yu’.​—Yakobus 4:7.

[Prenspari pisi na tapu bladzijde 21]

Di na engel di ben bun dorodoro bosroiti fu gens Gado, dan a meki ensrefi kon tron Satan