“Pira Bibedo Mitti Mada”
Nyikke Cok Bot Lubanga
“Pira Bibedo Mitti Mada”
LIT tutwal ka waneno danowa me amara deno can dok to. Pol kare wakumu pi rwenyo dano ma kit meno. Tye me kwe cwiny me ngeyone ni Lacwecwa, Lubanga Jehovah, niang ni watye ka kumu. Makato meno, en tye ka kuro nino ma myero eti ki tekone me cero jo muto. Nen kong gen ma Yubu oloko iye ma nonge i Yubu 14:13-15.
Tam kong gin ma obedo ka timme. Yubu, laco ma onongo tye ki niye matek atika-ni, okato ki i atematema magwa adada—man kwako rwenyo jamine me kom, to pa lutinone ducu, ki dong two malit atika. Pi can malit ma en obedo iye, en okok bot Lubanga ni: “Kono do ikana i Sheol [bur lyel]!” (Tyeng 13) Yubu oneno bur lyel calo agikki me pekone. Ki i bur lyel kunnu, calo lonyo ma Lubanga okano, en dong pe bideno can kun winyo arem. *
Yubu mono onongo bibedo matwal i bur lyel? Yubu onongo tye ki gen ni meno pe bitimme. En omedde ki legane ni: “Kono icikka kare wek ipo pira doki!” Yubu onongo tye ki gen ni bedone i bur lyel-li tye pi kare mo manok dok ni wi Jehovah pe biwil i kome. Yubu oporo kare ma ebibedo iye i bur lyel-li ki ‘kare me wang tic’—kare ma kidiye iye adiya me kurone. Pi kare ma romo mene? En owacci wang ma “gigonya.” (Tyeng 14) Bedo agonya meno te lokke ni gonye ki i bur lyel—cer ki i to!
Pingo Yubu onongo tye ki gen ni ebibedo agonya? Pien en onongo ngeyoni Lacwecwa ma lamar-ri paro pi jo ma Giwore ma guto. Yubu owaco ni: “Ka lacen ibilwonga, ci abigamo dogi; pira bibedo mitti mada, pien in aye iketo an.” (Tyeng 15) Yubu oye ni Lubanga aye ocweyo en. Ngat ma Lami Kwo, ma en aye ocweyo Yubu i i minne-ni, romo cero Yubu kadi bed ni oto.—Yubu 10:8, 9; 31:15.
Lok pa Yubu ni pwonyowa kit ma Jehovah lakica kwede: En tye ki wat macok ki jo ma gimine bote calo Yubu, ma giye ni ecwegi dok eyubgi me doko jo ma emaro. (Icaya 64:8) Jehovah tero jo ma wore calo jo ma pigi tek. Jo ma lugen ma guto pigi ‘mitte mada.’ Laco mo ma okwano matut owacci, nyig lok me leb Ibru ma kitiyo kwede ni “labongo akalakala tye i kin lok ma gitego ma ginyutu par ma ngat moni tye kwede i cwinye.” Ada, pe ni Jehovah wiye po i kom jo ma wore keken ento en bene paro me cerogi.
Cwinywa yom ni i buk pa Yubu—ma tye i kin bukke me Baibul ma kikwongo coyogi-ni—Jehovah oneno ni ber me nyutu yubbe me cero jo muto. * En mito ni erib in ki joni me amara ma guto. Man miyo diyowa cwinywa bedo yot. Pingo pe ipwony lok mapol i kom Lubanga man ma lamar-ri ki kit ma iromo yeni en ocweyi wek i dok dano ma ibineno kit ma Yubbe bicobbe kwede?
[Lok ma tye piny]
^ para. 4 Buk acel wacci lok pa Yubu ma owaco ni, ‘ikana-ni,’ te lokke romo bedo ni “gwokke [en] calo gin ma pire tek i kabedo mupye mot labongo ayela.” Buk mukene dok wacci te lokke bene nen calo tye ni “ikana calo lonyo.”
^ para. 8 Me pwonyo lok mukene mapol ma dok i kom cikke me nicer ma tye i Baibul i lobo manyen me kit ma atir, nen dul me 7 i buk me Baibul Mono Ada Pwonyo Gin Ango? ma Lucaden pa Jehovah aye gucoyo.