‘Oootao Amɛsɛɛ Gbɛ’
Tsi Obɛŋkɛ Nyɔŋmɔ
‘Oootao Amɛsɛɛ Gbɛ’
KƐ́ WƆNA wɔsuɔlɔ ko ni miipiŋ ni no sɛɛ lɛ egbo lɛ edɔɔ wɔ waa. Ŋwanejee ko bɛ akɛ wɔyeɔ enɛ he awerɛho babaoo. Shi eji nɔ ni shɛjeɔ mɔ mii akɛ wɔɔle akɛ Yehowa Nyɔŋmɔ, wɔ-Bɔlɔ lɛ, nuɔ wɔwerɛhoyeli lɛ shishi. Nɔ ni fe fɛɛ lɛ, eeshwe waa ni ekɛ ehewalɛ kple lɛ atsu nii kɛtee gbohii lɛ ashi kɛba wala mli ekoŋŋ. Kwɛmɔ bɔ ni Hiob tsɔɔ hiɛnɔkamɔ ni tamɔ nɛkɛ lɛ mli yɛ ewiemɔi ni yɔɔ Hiob 14:13-15 lɛ.
Susumɔ shihilɛ mli ni Hiob wie wiemɔi nɛɛ he okwɛ. Hiob ji nuu ko ni yɔɔ hemɔkɛyeli ni mli wa waa, shi ekɛ shihilɛi ni jaraa waa kpe—enibii fɛɛ ŋmɛɛ lɛ, ebii ni esumɔɔ amɛ waa lɛ fɛɛ gboi, ni hela ko ni naa wa mɔ lɛ. Beni ekɛ shihilɛi ni jaraa nɛɛ kpeɔ lɛ, ebo etsɛ Nyɔŋmɔ akɛ: “Miná ní kulɛ oŋɔ mi otée yɛ gbohiiaje.” (Kuku 13) Hiob na gbohiiaje akɛ no baaha epiŋmɔ lɛ sɛɛ afo. Tamɔ jwetri ko ni Nyɔŋmɔ eŋɔtee lɛ, Hiob nu he akɛ enaŋ nɔ̃, ni epiŋŋ hu yɛ jɛmɛ. *
Ani Hiob baahi gbohiiaje kɛya naanɔ? Jeee nakai kwraa ji Hiob susumɔ. Etsa nɔ esɔle akɛ: “Mina ní kulɛ . . . oto be oha mi, ní okai mi!” Hiob yɛ hiɛnɔkamɔ ni mli wa akɛ ebaahi gbohiiaje be kukuoo ko, ni akɛ Yehowa hiɛ kpaŋ enɔ. Hiob kɛ be ni ebaaye yɛ gbohiiaje lɛ to ‘sɔɔmɔ be’ he—be ni esa akɛ emɛ ni enyɛŋ he nɔ ko efee. Ebaamɛ kɛyashi mɛɛ be? Ekɛɛ akɛ: “Kɛyashi be aaashɛ ni aaaŋmɛɛ mihe.” (Kuku 14, Ga Biblia hee) Enɛ tsɔɔ akɛ abaaŋmɛɛ ehe kɛjɛ gbohiiaje—loo abaatee lɛ shi kɛjɛ gbohii lɛ ateŋ!
Mɛni hewɔ ni Hiob heɔ yeɔ akɛ abaaŋmɛɛ ehe lɛ? Ejaakɛ ele bɔ ni wɔ-Bɔlɔ ni yɔɔ suɔmɔ lɛ nuɔ he ehaa yɛ E-nɔkwa jálɔi ni egboi lɛ ahe. Hiob kɛɛ akɛ: “Kulɛ oootsɛ́, ni mahereo nɔ; ni oootao onine naa nitsumɔ lɛ sɛɛ gbɛ.” (Kuku 15) Hiob kpɛlɛ nɔ akɛ Nyɔŋmɔ ninenaa nitsumɔ ji lɛ. Ekã shi faŋŋ akɛ, Wala-Halɔ lɛ ní shɔ̃ Hiob yɛ enyɛ musuŋ lɛ baanyɛ atee lɛ shi kɛba wala mli kɛ́ egbo.—Hiob 10:8, 9; 31:15.
Hiob wiemɔ lɛ haa wɔnaa bɔ ni Yehowa musuŋ tsɔɔ lɛ ehaa: Esumɔɔ mɛi ni kɛ amɛhe fɔ̃ɔ enɔ, taakɛ Hiob hu fee lɛ, ni amɛhaa eshɔ̃ɔ amɛ koni amɛfee mɛi ni saa ehiɛ lɛ jogbaŋŋ lɛ. (Yesaia 64:8) Yehowa anɔkwa jálɔi lɛ ajara wa yɛ ehiɛ. ‘Eeetao’ enɔkwafoi ni egboi lɛ ‘asɛɛ gbɛ,’ loo eeshwe waa ni ena amɛ. Nilelɔ ko wie akɛ, Hebri wiemɔ ni atsɔɔ shishi akɛ ‘eeetao amɛsɛɛ gbɛ’ lɛ ji “wiemɔi ni henumɔ yɔɔ mli waa ni akɛtsɔɔ shwelɛ ni ayɔɔ akɛ ana mɔ ko lɛ ateŋ ekome.” Hɛɛ, jeee akɛ Yehowa kaiɔ ejálɔi lɛ kɛkɛ, shi eeshwe hu ni ekɛ amɛ aba wala mli ekoŋŋ.
Miishɛɛ sane ji akɛ, Yehowa ha ana yiŋ ni eto akɛ ebaatee gbohii ashi lɛ yɛ Hiob wolo lɛ, ni ji Biblia mli woji ni aŋma klɛŋklɛŋ lɛ ateŋ ekome lɛ mli. * Eesumɔ ni okɛ osuɔlɔi ni egboi lɛ akpe ekoŋŋ. Anɔkwa sane nɛɛ ni ooona ole lɛ haŋ oye awerɛho babaoo. Mɛni hewɔ okaseee Nyɔŋmɔ ni yɔɔ suɔmɔ nɛɛ he nii babaoo ni oha esaa bo koni beni E-yiŋtoi nɛɛ baaba mli lɛ okɛ ohiŋmɛi ana?—w11-E 03/1.
[Shishigbɛ niŋmai]
^ kk. 4 Wolo ko kɛɛ akɛ, Hiob wiemɔi ni ji “oŋɔ mi otée” lɛ baanyɛ atsɔɔ akɛ, “ni okɛ [mi] ato he ko shweshweeshwe tamɔ jwetri ko ni jara wa.” Wolo kroko hu kɛɛ akɛ, wiemɔ nɛɛ baanyɛ atsɔɔ akɛ, “okɛ mi atee akɛ jwetri ko.”
^ kk. 8 Kɛ́ ootao ole Biblia mli shiwoo ni kɔɔ gbohii ni abaatee amɛ shi kɛya jalɛ jeŋ hee lɛ mli lɛ he nii babaoo lɛ he lɛ, kwɛmɔ Mɛni Biblia lɛ Tsɔɔ Diɛŋtsɛ? wolo ni Yehowa Odasefoi fee lɛ yitso 7 lɛ mli.