‘Ua ka Kuatela Henda’
Zukama Kua Nzambi
‘Ua ka Kuatela Henda’
KIMA kia iibha ku mona muthu tua mu zolo, ku tala hadi ni kufuá. Kiki ki tu bhekela ndolo iavulu. Maji kima kiambote kuijiia kuila o Mubhangi uetu, Jihova Nzambi, u mona o hadi i tu bhita na-iu. Mu kiki, mu kutena kuê, muéne ua mesene ku bheka ku muenhu oso afú. Xinganeka o kidielelu kia kexile nakiu Jobe, kála kia ki tange mu divulu dia Jobe 14:13-15.
Xinganeka mu phangu íii. Jobe, diiala dia kixikanu, ua bhiti mu ibhidi iavulu—kála o uadiama, o kufuá kua tuana tuê tua kazola, ni ku kala ni uhaxi ua iibha. Mu ima ioso íii, muéne ua dikola kua Nzambi: “Tamanu ua ngi suekele mu mbila!” (Velusu 13) Phala Jobe, o Mbila ieji zubha o hadi ioso ia kexile mu bhita na-iu. Kála jimbongo jo’sueke kua Nzambi, muéne keji tala dingi hadi, mba kuívua ndolo. *
O kuila Jobe ueji kala mu Mbila katé ku hádia? Jobe uejidile kuila keji nangenena-mu. Muéne ua suluka mu kusamba: “Tamanu . . . u ngi [xindile] kizuua, hé u ngi lembalala kiua!” Jobe uejidile kuila keji nangenena mu Mbila, mukonda Jihova keji mu jimba mu mbila. Jobe ua sokesa o kithangana kieji bhita mu Mbila kála o ku “lua ita”—kithangana kia ku kinga. Thembu ikuxi ieji kingila? Muéne uambe, “katé kia ngi lungulula dingi lua mukuá.” (Velusu 14) O ku lungulula dingi lua mukuá, kulombolola ku tunda mu Mbila—mba ku mu fukununa dingi!
Mukonda diahi Jobe ka kexile ni phata kuila ueji vutuka ku muenhu? Muéne uejidile kiebhi ki divua o Mubhangi uetu ua henda kioso kifuá selevende Iê ia fiiele. Jobe uixi: “Eie-phe ueji ku ng’ixana, eme hé ngi ku’itaia; Ngana, kuatela henda ku kikalakalu kia maku-mé!” (Velusu 15) Jobe ua kijidile kuila muéne uexile kikalakalu kia maku a Nzambi. O Mubhani ua Muenhu, ua iudika Jobe mu divumu dia manh’a, u tena ku mu bheka dingi ku muenhu.—Jobe 10:8, 9; 31:15.
O izuelu ia Jobe, i tu longa kuila Jihova muthu ua henda: Muéne u bhana valolo ku athu oso a kala ni ídifua kála ia Jobe, u a tula bhu maku mê, phala ku a umba, ni ku a bhanga athu a uabha bhu pholo iê. (Izaia 64:8) Jihova u bhana valolo ku abhezi’ê a fiiele. Se kufuá selevende iê ia fiiele, muéne u mu “kuatela henda.” Saí diiala ngijiie uambe, mu kizuelu kia Hebalaiku, “o kizuelu kiki, kiala ni kutena kua dikota, kilondekesa o vondadi ia muthu ia ku bhanga kima.” Mu kiki, Jihova ka-nda bhulula ngó o abhezi’ê, maji ua-nda ku a bheka dingi ku muenhu.
O divulu dia Jobe—o divulu dia Bibidia—dia dianga ku londekesa o vondadi ia Jihova ia lungu ni kikanenu kiê, kia ku bheka dingi ku muenhu athu oso afú. * Muéne ua mesena kuila eie u kala kumoxi ni jindandu jê jafú kiá. O kikanenu kiki, ki tena ku ku kuatekesa ku dibhana ni ndolo ia ku funda muthu ua kazola. Phala-hi ku mateka kiá o ku di longa ia lungu ni Nzambi ia henda, ni kiebhi ki u tena kuehela ku ku umba, phala ni u mone o ikanenu ioso ia bhange Muéne ku di kuimbila?
[Tanga mu luji]
^ kax. 4 Saí Divulu diambe kuma o izuelu ia Jobe, “ngi suekele,” ilombolola, “ngi funde mu kididi kia kondama, kála kima kiala ni valolo ia dikota.” O divulu dia mukuá diambe kuma, o kizuelu kiki kilombolola, “ngi sueke kála jimbongo.”
^ kax. 8 Phala kuijiia dingi ia lungu ni kikanenu kia Bibidia kia lungu ni difukunukinu phala ku kala ku mundu uobhe, tanga o divulu Mu Kidi Ihi i Longa o Bibidia? mu kibatulu 7, a di bhange ku Jimbangi ja Jihova.
